أخواني صباح الخير

مدري عرفتوني أو لا أنا ألي كنت خاطب وقدمت المهر نهاية الأسبوع الماضي وأكيد عرفتوا كيف جبت المهر

http://www.66n.com/forums/showthread.php?t=96567

المهم يوم الخميس الماضي رحت أنا والوالد وأخوي وقدمنا المهر وكنت مبسوط وكل أهلي مبسوطين،و بعد ما طلعنا من عندهم بساعة كلمت أبو البنت عشان أحدد موعد الملكة وصراحة كنت مستعجل وقلت له خلها الأسبوع الجاي وخير البر عاجله

المهم تفاجأة أنه يقول لي المهر قليل وما يوفي مستلزمات البنت (المهر كان ثلاثين ألف ريال) وقال لي أنه بنات خالتها توهم متزوجين ومهرهم كان أربعين وخمسين ألف

طبعاً بالإضافة إلى المهر يبون شبكة وزواج كامل ومصاريفه كلها علي

يعني يبي لي أكثر من مائة وخمسين ألف عشان اتزوج

طبعاً كلمت أمي وقلت لها لي ما قلتي أنهم يبون مهر كذا وكذا قلت هم قالوا لي أنهم ما تهمهم الفلوس وهم يشترون الرجال ومن هالكلام

طبعاً أنا قلت لأمي أنا ما عندي غير هالمبلغ قولي لهم هالكلام، كلمتهم أمي وقالوا بيردون علينا بالموافقه أو لا،،

صراحه أنا ألي كنت مخطط عليه أقدم مهر ثلاثين ألف نفس ألي قدمته وأشتري دبل الخطبة وبعض الهدايا

وطبعاً أنا اشتغل في الرياض والأهل والبنت في الدمام يعني بعد الزواج بستأجر شقة وبأثثها وكل هذا يحتاج مصاريف

أنا أقدر أتسلف عشرة آلاف ريال أو أكثر وادفعها لكن أنا ما أبي يكون علي دين لأنه في النهاية بيكون المتضرر الوحيد أنا وزوجتي، وكل ألي ناوي أقدمه لهم من عرق جبيني ما أخذت من أبوي ولا أمي ولا من أحد وصعبه أخذ من أهلي لأنهم توهم شارين بيت جديد ولا أبي أثقل عليهم زيادة،،،

صراحة ما اعتقد ألي أنا بقدمه لهم قليل ولا هو كثير في نفس الوقت بس يقول الرسول صلى الله عليه وسلم :"أكثر الزواج بركة أيسره مؤونه"

أنا الحمد لله راتبي زين يعني بعد الزواج ما راح اقصر عليها بشيء

طبعاً أنا انتظر ردهم علينا وأتمنى يوافقون لأني والله تعبت عشان أتزوج أحس أني محتاج للزواج بشكل كبير وضروري

وش رأيكم أخواني هل المهر ألي قدمته قليل ولا يكفي ويحق لهم يرفضون أو لا وما هي نصايحكم لي جزاكم الله خير الجزاء

ولا تنسوني من صالح الدعاء