(قصص) واللبيب بالإشارة يفهم 2 - منتدى عالم الأسرة والمجتمع

12-02-2009, 06:23 AM

زوج في المستقبل

عضو مثالي

تاريخ التسجيل: Nov 2005

المشاركات: 663

(قصص) واللبيب بالإشارة يفهم 2

قصة -1-

(أبو سلطان في السوبرماركت واقف بالسرا اللي عند الكاشير وهو يدف عربية مليانة مقاضي)
إمام مسجد الحارة(عبدالملك) يكلم أبو سلطان مازحا : هذا أنت يبو سلطان صاحب هالمقاضي ؟؟
أبو سلطان : أوووه هلا بالشيخ عبدالملك ، المعذرة ما دريت إنك وراي .
الشيخ عبدالملك : لا عادي أصلن أنا توي انتبه لك ، وشلونك ، وشلون الأهل ، وشلون سلطان وأخوانه ؟
أبو سلطان : أبشرك كلنا بخير وعافية .
الشيخ عبدالملك : اللي يشوفك يبو سلطان أنت وهالمقاضي يحسب إن عندك (سبات شتوي) ولا إنك بتهاجر‎ ‎.
أبو سلطان : ههههه يا شيخ خلها على الله ، العيال كثروا والمصاريف زادت وماعاد صرنا نلحق .
الشيخ عبدالملك : إيييه الله يعينك ، كل شي بأجره يبو سلطان .
أبو سلطان (متعجب) : (كل شي بأجره) ؟!! وش شايفني يا شيخ ، شايفني أتصدق على أيتام وأرامل علشان تقول لي (كل شي بأجره) ترا هذولي عيالي .
الشيخ عبدالملك : طيب وإذا صاروا عيالك !! يعني مالك أجر إذا صرفت عليهم ؟ زي ما إن لك أجر إذا تصدقت على الأيتام والأرامل فكذلك لك أجر إذا صرفت على عيالك يبو سلطان .
أبو سلطان : عجيييب !!! والله أول مرة أسمع هالكلام ، يعني كل اللي صرفته على عيالي من أول ما تزوجت إلى الآن أباخذ أجره ؟
الشيخ عبدالملك : والله إذا إنك أحتسبته عند الله فأكيد لك أجره .
أبو سلطان : معليش ياشيخ عبدالملك ، وشلون أحتسبه عند الله ، ما فهمت .
الشيخ عبدالملك : أنا أفهمك ، الآن لو إنك ما شريت لعيالك أغراضهم اللي يحتاجونها وتركتهم وأهملتهم ، بيعاقبك الله ولا لأ ؟
أبو سلطان : إلا بيعاقبني .
الشيخ عبدالملك : كذلك إذا شريت لهم أغراضهم اللي يحتاجونها فلك أجر وثواب يعني بالعربي أي شي تشتريه لعيالك تحط في بالك إنك شريته عبادة وطاعة لله وإنك ممتثل أمر الله في هالشي اللي بتشتريه ، أما تشتريه لأنك متعود تشتري لعيالك وبس فهذا مالك أجر عليه لأنك ما نويته لله .
أبو سلطان : أهااااا كذا يعني ، والله ليتني داري من زمان عن هالفايدة .
الشيخ عبدالملك : ما فات إلا الشر ، المستقبل قدامك يا رجال .

قصة -2-

(فهد واقف قدام التسريحة والفوطة على راسه ، وتوه طالع من الحمام بعدما تروش)
فهد : إلا على فكرة يا نوال ، غرشة العطر هذي وراك محتفظة فيها إلى الآن مع إنها فاضية ؟ تراي ما أحب أشوف شي زايد وماله لازمة ع التسريحة .
نوال : لا تكفى ، إلا هالعطر هذا ، لا ترميه ، خله كذا مكانه .
فهد : أووف وش هالحرص ، أخاف إنك ساحرتني وحاطة السحر بهالغرشة ، تسوينها يالتعبانة .
نوال : من زينك ، وش أسحر فيك وش أخلي .
فهد : طيب وليه محتفظة بهالغرشة أجل ؟
نوال : هذي -الله يسلمك- هدية من صديقتي تهاني ، بيوم زواجي أهدتني هالهدية ، وبصراحة تهاني غالية علي مرة ، ومواقفها معي كثيرة ، يكفي إنها أقدم صديقة عندي ، أذكر أني تعرفت عليها في ثاني متوسط ، ولأن الدنيا فرقتنا وصرت أنا بديرة وهي بديرة فضلت إني أحتفظ بهديتها علشان ما أنساها .
فهد (بضحكة ساخرة ولا تخلو من استفزاز) : هههه صدق إنكم حريم ، من 10 سنوات محتفظة بهالغرشة !!!
نوال : وراك تضحك ، ولا علشان محد أهداك هدية يوم زواجك .
فهد : إلا أهدوني ، أنا أخوياي أهدوني فلوس مهو مثلك غرشة عطر ومدري إيش .
نوال : طيب وش أستفدت ؟!! كل هالفلوس راحت ، يعني ما بقى من هدايا أخوياك ولا شي علشان تتذكرهم فيها .
فهد (وهو يأخذ نفس عميق) : إييييه ، تبين الصراحة ، ما بقى من هداياهم ولا شي ، أذكر إن مجموع هداياهم كانت 13ألف ريال ، وصرفتها كلها في شهر العسل .
ثم يقول فهد : إلا هدية وحدة إلا الآن أنا محتفظ فيها وإن شاء الله إني ما أنساها طول عمري .
نوال : غريبة ، ما أشوفك محتفظ بشي .
فهد : بلاك ما تدرين وش السالفة .
نوال : وش السالفة ؟
فهد : هذا -يا طويلة العمر- قبل زواجي باسبوع ، وفي آخر اجتماع لنا في الاستراحة قبل زواجي ، كان وقتها أغلب الشباب معطيني هداياهم وما بقى إلا كم واحد ، المهم الباقين عطوني هداياهم إلا معاذ ، وأصلن أنا ما كنت حاط في بالي إن معاذ بيهديني شي لأن حالته المادية ضعيفة نوعا ما ، غير كذا إنه يصرف على أمه واخوانه بعد وفات أبوه ، وبعد ما تعشينا وبدوا الشباب يمشون لبيوتهم ناداني معاذ وأخذني على جنب وقالي كلام إلى الأن أذكره ، والله كأن الموقف هذا أمس صاير .
فهد : .........
نوال : إيه كمّل تراك حمستني .
فهد : قالي معاذ : أسمع يا فهد يعلم الله إني من أول ما سمعت بخبر زواجك وأنا أحاول أوفر من المصروف علشان أهدي لك شي ، بس الاسبوع الماضي أخوي الصغير سرق مفاتيح السيارة وأنا نايم وأخذ السيارة وصدم فيها سيارة ثانية ، وكل اللي جمعته لك راح بهالصدمة .
فهد (مقاطعا) : لا عادي يا معاذ معذور والله، وحنا أخوان ما بينا هالأمور ، وش دعوة .
معاذ : خلني أكمل ، وعلشان كذا أبنصحك نصيحة أتمنى إنك تستفيد منها في حياتك .
فهد : سم آمر ، بس ماودي أتعبك في الكلام ، تراي قريت كتب كثيرة عن الزواج وعن الحياة السعيدة وكيفية حل المشاكل .
معاذ : لا ما أقصد هذا ، شف يا فهد قبل ما تبدا حياتك مع زوجتك حاول إن كل عمل تعمله تكون نيتك صالحة وحاول إنك تحتسب الأجر من الله في كل شي تعمله تجاه زوجتك ، حتى الامور الخاصة بينك وبين زوجتك ،واعذرني على هالكلمة يا فهد ، أنا ودي إنك تستفيد ولا يضيع الأجر عليك ، النبي صلى الله عليه وسلم يقول : (وفي بضع أحدكم صدقة) قالوا يا رسول الله أيأتي أحدنا شهوته ويكون له فيها أجر؟ قال: (أرأيتم لو وضعها في حرام أكان عليه فيها وزر ، فكذلك إذا وضعها في الحلال كان له أجر) ويقول النبي صلى الله عليه وسلم : (وإنك لن تنفق نفقة إلا أجرت عليها حتى اللقمة ترفعها إلى فِيّ امرأتك) .
معاذ : يا فهد إن كانوا الشباب أهدوك هدية تنفعك في الدنيا فأنا بهديك هدية بتنفعك بالآخرة إن شاء الله ، وهذا الكلام قالي إياه أبوي -الله يرحمه- قبل ما أتزوج وأنا حبيت إنك تستفيد منه زي ما استفدت منه أنا في حياتي .
فهد يكلم نوال : ومن ذاك الوقت إلى الحين يا نوال وأنا أحتسب الأجر في كل شي أسويه تجاهكِ ، حتى لما نروح نتعشى بمطعم أدفع الحساب وأنا أرجو من الله إنه يآجرني عليه ، وكان كلام معاذ أغلى هدية جتني من أخوياي ، لأنها إلى الأن باقية عندي .

والله من وراء القصد

__________________

ليكن حالك كحال الشاعر الذي يقول :

رضـيت بـما قسـم الله لــي
وفـوضت أمـري إلى خالقـي
لقد أحسن الله فيـما مضى
كـذلك يــحسن فيـما بـقـي
ـــــــــــــــــــــــــ

ما سد لي مطلع ضاقت ثنيته

إلا وجدت وراء الضيق متسعـا
ـــــــــــــــــــــــــ

عسى الكرب الذي أمسيت فيه

يـكـون وراءه الــفـــرج الـــقــريـب
ـــــــــــــــــــــــــ

وما مسني ضر ففوضت أمره

إلى الـمـلك الجـبـار إلا تيسرا
ـــــــــــــــــــــــــ

قضى الله أن العسر يتبعه اليسر

التعديل الأخير تم بواسطة زوج في المستقبل ; 12-02-2009 الساعة 06:27 AM

12-02-2009, 09:35 AM

GREEN222

VIP

تاريخ التسجيل: Jun 2008

المشاركات: 11,121

كلام جميل جدا

اتمنى مواضيع كثيره مثل هذه العظات الجميله

__________________
http://live.gph.gov.sa/
اللهم اني استودعك اولادي

12-02-2009, 09:43 AM

أم مزنة

عضو نشيط جدا

تاريخ التسجيل: Dec 2006

المشاركات: 238

الله يصلح لنا و لك النية والذرية

يزاج الله خير اخوي على الأسلوب الرائع

__________________
اللهم ثبت جنيني و يسر حمله وسهل ولادته واجعله سليم معافي يارب واجعله من الصالحين .

13-02-2009, 09:40 PM

ريفاان

VIP

تاريخ التسجيل: Feb 2005

المشاركات: 2,618

مادري ليه خنقتني العبره على القصة الثانيه

وربي روووووووووووئعه

الله يسعدك ربي ويحفظك ياخوي

__________________
سبحان الله وبحمده

14-02-2009, 01:05 AM

زهور البستان

عضو نشيط جدا

تاريخ التسجيل: Jul 2005

المشاركات: 489

كلام جدا جدا رائع وجميل

__________________
اللهم احفظ لي زوجي واولادي

14-02-2009, 01:44 AM

طيـ القلب ـب

عضو مميز

تاريخ التسجيل: Feb 2007

المشاركات: 2,363

قصص رائعة بمعنى الكلمة

__________________
اللهم لك الحمد حمدا كثيرا

14-02-2009, 04:26 AM

دانة سبيع

موقوف

تاريخ التسجيل: Jan 2009

المشاركات: 116

يعطيك الف عافية قصص قيمة وجزاك الله كل خير

روعة وحللوني خذت الرابط وارسلتة لخواتي واخواني المتزوجين منتدى رائع

لاتنسوني من دعواتكم فانابحاجة ماسة الية ولكم بالمثل

14-02-2009, 05:04 AM

حرم المعلم

عضو متألق

تاريخ التسجيل: Nov 2007

المشاركات: 1,830

الله يجعلها في ميزان حسناتك

__________________

من القلب كل الشكر لك بكر الشايب والله يرزقك ماتتمنين

14-02-2009, 08:33 AM

همـــس القلــوب

قلب المنتدى النابض

تاريخ التسجيل: Nov 2007

المشاركات: 1,483

راااااااائعه جدا

فعلا دايم اقول لأهلي وحولي كل شي بااجره وصارت امي تقوله وايضا جدتي الله يحفظهم ولله الحمد

واقوله لوالدي كلما تدفع وتحتسب الأجر كان افضل

واذا ضاع حقك عند الناس اي شي تتوقعه وتحتسب لله فلن يضيع عند الله والحمدالله

الف شكر ووفقك الله لكل خير

__________________
للمتزوجين..من يريد منا الذريه فلنستغفر كل يوم وكل دقيقه
من دعاء زكرياسورة الأنبياء..نقول دائمافي السجود(ربي لاتذرني فردا وانت خير الوارثين) وآل عمران(رب هب لي من لدنك ذرية طيبة انك سميع الدعاء) لغيرمتزوجين..من يريد منا الزواج فلنستغفر كل يوم مع الدعاء..نقول دائما في السجود (ربي اني لما انزلت اليي من خير فقير) لطلب الوظيفه والمال وغيرالكثير...فلنستغفركثيرا..دعواتكم لي بالزوج الصالح ولإخواتي المسلمات
اللهم ارزقنا ازواج صالحين عاجلا غير آجل اللهم آمييين

التعديل الأخير تم بواسطة همـــس القلــوب ; 14-02-2009 الساعة 08:36 AM

16-02-2009, 12:12 AM

#10

زوج في المستقبل

عضو مثالي

تاريخ التسجيل: Nov 2005

المشاركات: 663

أشكر للجميع مشاركتهم

GREEN222

أهلا بأختي ، هي تذكرة أكثر من كونها موعضة (أو على حد قولكِ : عظة)

أم مزنة

أهلا بأم مزنة ، إنتِ تقولين : (يزاج الله خير اخوي) ، اللي أعرفه إما يزاج الله خير أختي ، أو يزاك الله خير أخوي ، ولا أنا غلطان

ريفاان

أهلا بكِ ، علشان القصة الثانية فيه شخصية أنثوية ( لا تخليني أتهور وأألف لكم رواية محترمة

)

زهور البستان

شكرا لكِ أختي على هذا الإطراء

طيـ القلب ـب

شكرا لك أخي على هذا المدح

دانة سبيع

حياكِ الله يا أختي ، أبد إن كنتِ تعتقدين إن الموضوع فيه فايدة أرسليه لمن تحبين

حرم المعلم

آمين ، شكرا لكِ

همـــس القلــوب

شكرا لكِ أختي على هذه المشاركة ، وموضوع احتساب الأجر موضوع كبير ومهم ( جميل أن الإنسان يحتسب الأجر في جميع حياته ، فتكون حياته كلها طاعة )

__________________

التعديل الأخير تم بواسطة cutiepie ; 16-02-2009 الساعة 08:52 AM

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه