اتصلت وحدة من اهلنا على اختي
تقول فيه ناس يسألون عني ويبون يعرفون كم مواليدي بالضبط ووين اشتغل وطبيعة عملي
اختي عطتها المعلومات
ودقت علي تبشرني بعدها على طول

انتظرنا اسبوع اسبوعين ولم يتصل بنا احد

دقت اختي تستفسر شنو صار على الموضوع
قالت لها الحرمة ان الناس شايفين اختج في احد المناسبات واعجبتهم بس باقي العمر يتأكدون منه لانهم اسألوا ناس ومحد عطاهم مواليدي بالضبط
وولأسف كالعادة حاجز العمر انهى الخطبة
فأنا اكبر من الرجل بثلاث سنوات

الله يسامح كل من قال الزواج قسمة ونصيب
بسبب هالكلمة والتسليم بها
صار لها انعكاسات سلبية
صاروا البنات مايطلعون ولا يرحون مناسبات اجتماعية
وكل ماأحد نصحهم وقال اطلعوا خلوا الناس تشوفكم
قالوا مانبي نعرض انفسنا واذا لنا نصيب راح يجي حتى لو ماطلعنا

وانا اعترف اني كنت منهم
ولاهلي ايضا دور في هالشي
يعني تلقانا نطلع للاسواق والاماكن الترفيهية
اما العروس والمناسبات الاجتماعية فنقصرها على الاقارب المقربين فقط
ونعتذر عن الذهاب لاي مناسبات اخرى اما لان مالنا خلق او لان الاهل مايحبون السهر في العروس
او لان الاعداد للمناسبات يتطلب وقت ومال
وصرنا ما نهتم لها
ليش نروح
اذا على الوناسة يكفي الصديقات بالعمل او بالدراسة والذهاب للاماكن الترفيهية مع الاهل
واذا على الزواج يقولون (( الزواج قسمة ونصيب))


انتم تدرون وين النصيب؟؟؟؟

المشكلة ان لدينا مفهوم خاطيء عن الايمان بالقضاء والقدر

نعم نقول الزواج قسمة ونصيب ولكن هالمقولة تقال بعد وقوع القدر
يعني وحدة انخطبت و وما تمت الخطبة
هنا نقول الزواج قسمة نصيب
مو نقولها في كل وقت
ولا نؤثر على البنات في بذل الاسباب
اعرف وحدة من الامهات تشتكي على الناس حال بنتها
تقول تعبت من بنتها كل شوي تتنقل فينا من عرس للثاني
والام تقول لها لا تتعبين نفسك (( الزواج قسمة ونصيب واذا لك نصيب بتاخذينه بدون عروس ولا زيارات؟؟؟؟)



نصيحة لا تتوقفوا عن بذل الاسباب وطرق كل الابواب المؤدية للزواج وابذلوا كل ما في استطاعتكم ولا تيأسون او تتأخرون
لا تصيرون نفسي ما حسيت بقيمة بذل الاسباب وقيمة حضور المناسبات والاعراس الا بعد فوات الاوان وكبر سني
مو بس المناسبات حتى أي مكان فيه نساء مثل الصالوانات والدورات
بس ألحين شنو الفايدة
ماعاد تنفع
العمر قضى على أي امل لي بالزواج وماعاد لي طريق الا الخطابات ( الله يستر منهم)


ويا فرحة ماتمت