أنا متزوجة من 7 شهور تقريبـًا .. أكثر شي شدني أوافق على زوجي لمن خطبني انه عنده ولد أمه متوفيه بحادث سيارة .. عمره 5 سنوات

من ثاني اسبوع من الزواج سكن الولد معانا .. ويشهد الله اني أحبه محبه كبيرة

وما أشوف إلا إني خلفته .. والولد اتعلق فيه لدرجة كبيرة وما ينام إلا في حضني





بس المشاكل ورانا ورانا .. الولد نفسيته تعبانة .. ويتأثر بكلام أهل امه ..

يقولو له آذيها ويسمع كلامهم ويرجع يعتذر ويقول آسف ماما هم قالو لي آذيها .. اضربها .. صيح عليها .. عاندها .. لا تسمع كلامها .. افتن بينها وبين بابا عشان يخاصمها.. إياك تناديها ماما ترى أمك الله يرحمها تزعل ..





وطول الفترة اللي عاشها معانا يشهد الله اني ما مديت يدي عليه ولا مرة .. لو عاقبته بسبب غلط سواه يكون بإني ما أرد عليه لمن يكلمني أو أحرمه من الشكولاته أو الخرجة أو التمشية إذا سوى شي كبير ..



المشكلة ان الولد صار عنده كذب بطريقة مو طبيعية ..



لمن يخرج معايا يتحكى مع الناس رجال أو حريم .. يقول كلام كذب يفتري بيه عليه وعلى أبوه .. ويحرجني قدمهم وقدام أهلي بشكل كبير ..



يقول بابا طماع ولا يخرجني مكان .. ووالله العظيم انه كذاااب

عمري ماشفت أب حنون زي زوجي .. اسبوعيًا يمشيه .. ياخذه البقالة ياخذ كل اللي مشتهيه .. ما يقصر معاه في المصروف ولا الأكل ولا اللبس ولا التمشية



يقول ماما تعذبني قدام الناس .. لمن سألته كيف أعذبك ؟

قال ما تتكلمي معايا لمن أسوي غلط

الناس يفهموا كلامه غير

ويشوفوني أنا وأبوه ظالمين



يتكلم على كل شي يشوفه في البيت زي خلاف صار بيني وبين أبوه مثلا ..

كنت حامل وأسلبت .. صار يقول للناس بابا قتله ..

ويقول ما عندنا أكل في البيت وعمره بيتنا ما فضي .. الحمد لله زوجي كا فينا بعد الله ومقاضينا من أحسن ما يكون ..



المشكلة انه شاف الظلم بيت جدته .. ضرب بدون رحمه .. بالسلك والحزام .. محد يهتم فيه وفي نظافته .. كان شعره مليان قمل وتحت أظافره سواد ووسخ وملابسه كانت وسخانه ..



بعد ما ماتت أمه عاش بيت جدته سنة و سته شهور عانا فيها معاناة مو هينة

بجد مو عارفين أنا وأبوه كيف نتصرف ..



أتمنى منكم النصيحة .. بالله لا تبخلوا عليه بيها

المشاركة الأصلية كتبت بواسطة أطيـــــــاف السلام عليكم و رحمة الله و بركاته أنصحكم بأن تستمروا بنفس أسلوبكم المعتدل في تربيته و أن تدخلوه في مدارس تحفيظ القرآن التابعة للمساجد ليتعلم أصول المعاملة الحسنة مع أهل الخير و الصلاح و إذا ذهب إلى بيت أهل أمه فلا تتركوه يطيل البقاء ماداموا سيقومون بما قلتِه عنهم أرى أن تكتفو بأن يذهب به والده لهم و يجلس معه حوالي ساعة إلى ساعة و نصف كل أسبوع مرة لكي يصل أخواله استمري في تربيتك الحسنه له و لا تكوني شديدة عليه و لا متراخية معه و احتسبي الأجر في ذلك

أنا سجلته في مدرسة تحفيظ تابعة لدور التحافيظ والآن أسعى انه يلتحق بتحفيظ جامع الحي
أما مشكلة انه ما يبات عند جدته أسأل الله انه يقدرني عليها لأنه حينفتح بسببها باب مشااااكل معاهم
أسأل الله انه يلهمنا السداد
ولا تنسي أختك بدعوة في ظهر الغيب انه يقدرها على تحمل الأمانة ويدفع عنها شر الأشرار

جزاكِ الله كل خير أختي أطياف على نصيحتك

المشاركة الأصلية كتبت بواسطة كريستال عزيزتي نفس الشي اسلوبك كويس الطفل خياله واسع كتير والظاهر انه في حد معلمه او شايف امثله من هالنوعيه كتير والطفل بميل للتقليد انا نصيحتي نفس نصيحة اطياف زيارة بيت امه ماتتعدى الساعة في كل مره او الساعتين حتى تقللوا تاثيرهم عليه الله يجزاك الخير على تربيته وان شاء الله بميزان حسناتك والله يرزقك بالذرية الصالحه حطي دايما قدام عينك دايما انه يتيم الام وانه محتاج للحنان حاولي تحسسيه بحبك ومع الايام الا مايتغير موفقه حياتي