صباح الخير
ودي أفضفض بأشياء تثقل كاهلي وتجعلني دوم أكرر : أنا لست سعيدة في حياتي الزوجية
ودي أكون مثل اللي أقرأ مواضيعهن ماشاء الله العضوات اللي تمدح زوجها ولو كانت عيوب الدنيا فيه
واللي تحاول تحسن من علاقتها بزوجها وتكون هي اللي تقدم ع الخطوة لتحسين العلاقة وما تنتظر زوجها ...
المشكلة إني تزوجت بزوج جدا جدا مشغول ..بس ع الأقل كل يوم أشوفه ولو كانت سويعات الحمدلله غيري بالشهور وحتى بالسنين ما يشوفون أزواجهم وخاصة المغتربين ! ولكن حتى لو كان معي فكره يكون شارد لأنه شغله مرة معقد
عندنا ولدين مثل القمر الله يخليهم لنا ..بس لما أغضب أو أزعل من زوجي أرد في عيالي وأطنشهم بعدين يكسرون خاطري وأدلعهم وألعب معاهم وأقول في نفسي أنا أم سيئة !
فيه مشكلة أخرى تعيق التواصل بيني وبينه وهو إني عكسه في كل شي يعني نقيضه ..وما فيه شي مشترك بيننا الا أشياء بسيطة جدا جدا تكاد لا تذكر
يعني تفكيره غيييييييييييييير وانا تفكيري غيييييييييييير حتى ثقافتنا تختلف ودائما يقول راي وانا ابغي العكس و من ثم اقول راي فهو يناقضني وهكذا في ها الدوامة
وطبعا زوجي مو مثل باقي الأزواج حتى لما عرف اني حامل بمولودي الأول تفاجأ والصدمة بدت ع وجهه !!! تصوروا
يمكن أنا هنا قاعدة أكتب السياءات اللي في زوجي وبتقولون لي اكتبي حسناته وقارني بين الايجابيات والسلبيات ..حاولت أكثر من مرة بس احس كل ها الأساليب تفشل !
وقبل شهر وشوي صارت بينا مشادة وكلام مو حلو بالمرة بالسيارة امام الأولاد انتهت بصراخي في السيارة وبكائي وبعدين جمعت اغراضي وقلت له بروح بيت اهلي ولا لي رجعة .. بس بعدين هدا الموقف ومو لازم اذكر هنا كيف او بالتفاصيل المملة بس عدت السالفة على خير
ومن بعد ها السالفة صار زوجي عصبي معاي وتغير شوي علي .. وحتى اني ذكرت له ها الشي ولمحت له انك متغير علي من بعد ذاك الموقف ولكنه يقول لي يمكن الشغل ومضغوط ...
قلت له خذ لك اجازة ترتاح فيها وتريحنا وياك ... اعصابه مشدودة واعصابنا تنشد وياه
طبعا رفض وتحجج انه ما يقدر يترك الشغل الحين وفيه زحمة وما الى ذلك ...
وانا من فترة بعيدة احاول اقنعه اننا نطلع من فترة لفترة ونغير جو ... والحمدلله اني قدرت اخليه يطلعنا طلعة لوحدنا او مع اليهال مشوار تفرجة مرة او مرتين بالشهر
وأيضا كنت ومازلت اعاني من فراغ عاطفي خاصة بعد انجابي طفلي الثاني ومن يومين ثلاثة كلمته بالسالفة وقلت له انك حتى وردة ما تفاجأني فيها لما تدخل علي ...طبعا نفس الأعذار دايما !!!!!
الحين أنا صرت عصبية وعلى أتفه الأسباب يصير بيننا كلام كلمة مني وكلمة منه ونتزاعل وننام وننسى بكره .. وكل هذا يتراكم ويتراكم
وبصراحة الحين فقدت الأمل اني احسن علاقتي واعيش حياة سعيدة مثل الأخريات وأحاول الحين اهتم بنفسي بس والاقي لي شغل يشغلني عن زوجي شوي يمكن طاقتي افرغها في الشغل احسن من انني اتشاجر وياه ونختلف على كل شي ... هل تفكيري صح ؟ احس ان مسؤوليتي بتكبر اكثر وافكر في عيالي بجد احسهم مظلومين مع اني احاول اسويلهم مشاوير ونزهات عائلية انا وزوجي بس خلافاتنا الصغيرة تنعكس عليهم واحنا ما نحس
آسفة طولت عليكم بس كل ها الأفكار تدور في راسي وما توقف لدرجة اني اعاني من ارق زايد ها الأيام
احس بحمل كبير ع صدري ومب قادرة أشتكي لأحد واذا اشتكيت لزوجي يقول صدق انكم الحريم تكفرن العشير
!!
أهلي وأصدقائي يظنون إني سعيدة وأنا أحاول أتخفى بالملابس الحلوة والاكسسوارات وأجدد الأحذية و الماركات الغالية ... بس ما أعتقد فيه حد يدري أنا كيف أعاني داخليا !!! أحيانا أسأل نفسي هل أنا أحب زوجي فعلا !
الله يبعد عنكم الضيق والكدر وتكون حياتكم سعيدة
تصبحون على خير
15-04-2010, 01:26 AM
ضوابط المشاركة
العرض العادي
