انا عضوة جديدة في هذا المنتدى
واللي شجعني اكثر اني اعرض مشكلتي هني ان المنتدى فيه آراء الجنسين
النساء والرجال
وهذا الشي اللي انا احتاجه

احتاج راي الكل
والمشكلة:
المشكلة وما فيها اني اعلامية
يعني شغلي باختصار اني اتابع فعاليات ديرتي واغطيها اعلاميا

بالفترة الاخيرة صارت فعالية حضرها مجموعة من الشخصيات المشهورة عربيا
وكنت انا وسط الحدث اشوف شغلي

وبحكم عملي هذا لازم اني التقي بالكل
واللي ما اقدر اكلمه وقت الفعالية اعطيه تلفوني حتى نلتقي بعدها

المهم
واحد من هذي الشخصيات فعلا ما قدرت التقيه لشدة ازدحام جدول عمله
فكلمني بثاني يوم انه فاضي واقدر اشوفه
رحت مع صديقتي وبنتي
وعملت له اللقاء كامل

الانسان هذا ظل يمسج لي بين فترات متباعدة حتى يسال عني انا وبنتي وكنت اشكره على ذوقه وسؤاله عنا

لكن بعد فترة تفاجئت بمكالمة خارجية منه بعد ما سافر ديرته وقال لي:
انا ادري انك متزوجة وسعيدة جدا مع زوجك، لكن كل اللي اطلبه انك تسمعيني، لان مو من عادتي اخفي شي بداخلي لاني احس نفسي مراقب، واعترف لي انه ظل يفكر فيني وايد وانه يحبني، ولو كنت مو متزوجة كان بدون تفكير تقدم لي يطلب يدي

انصدمت
قلت له: المطلوب؟؟؟
قال: ولا شي، ما اطلب منك ولا شي، غير انك سمعتي كلامي اللي حبيت اقوله بس حتى ارتاح، وكل اللي احتاجه اني اسمع صوتج على طول حتى ارتاح نفسيا

وانتهت مكالمته
وابتدا كلامه يالمني ويارقني، لاني عن جد احب زوجي بجنووووووون،


وراها على طول انقطع هو عني
صرت اتصل فيه وما يرد، امسج له وهم ما يرد، ما يرد وبشكل فظيييييييييييييييع، يعني بحياتي ومن خلال عملي الاعلامي ومعرفتي بشخصيات مهمة ورؤساء ووزراء وحكام دول بعد، ما عرفت احد فيهم اتصل فيه وما يرد، او اكتب له مسج وما يرد، هني حسيت نفسي خلاااااااااااااص تعلقت

ورا شهر واحد بس من مصارحته كلمته ورد، وصار يتكلم معاي عادي واعتذر انه كان مشغول ومو قادر يرد، وبوحدة من المكالمات سالني اياها صريحة: تحبيني؟؟
وكررها وايد وايد وايد ليما اعترفت له اني احبه

وظلينا نتكلم في الحب
وغرقنا فيه
وزوجي مو عارف من امر هالموضوع شي


لكنه اكتشف في النهاية بسبب الرسائل اللي كانت بينا
الشخص هذا مو بديرتي
لكني اشوفه يوميا على شاشة التلفزيون

وانا اعلامية يتابعني هو ايضا بنفس الطريقة ونتكلم بشكل مستمر بالتلفون

وزوجي مشهور

بعد ما عرف زوجي بحقيقة الموضوع تالم وايد وقال لي ان هذا الشخص سيء السمعة وانه ما يتورع عن الخوض في اعراض الناس وانه يعرفه زين، واصدقاء زوجي وصلوا لزوجي ان هذا الشخص اتكلم علينا وايد وقال عني اني الاحقه وهو ما يرد علي، وقلت لحبيبي هالكلام فنكر، وقال لي واجهي الاشخاص اللي تكلموا وقالوا على لساني هالكلام فيني حتى نعرف من الكاذب ومن الصادق،
المهم ان زوجي كلم حبيبي وتهاوش معاه لثاني مرة ، مرة لما اعترف لي بحبه وعرف زوجي، ومرة ثانية المرة هذي بسبب مسجاتنا
حبيبي الحين ما يرد علي نهائيا آخر مسج كتبه لي : انا مشغول بكلمك بعدين، وكان هذا قبل خمسة ايام تقريبا، وصرت كلما اتصل فيه ما يرد نهاااااااااااااائيا وانا متاكدة انه يشوف التلفون بس ما يرد

انا مو عارفة شنو اللي دار بينه وبين زوجي، وليش مو قابل يكلمني، علما اني بآخر مكالمة قلت له ان هذي آخر مكالمة وآخر مسج لان صادني حادث وهو حتى ما سال فيني، فقال لي انه ما درى عن الحادث، وقال لي : ارتاحي وكلميني بعدين
فقلت له ما راح اتكلم
لكني رديت اتصلت بس هو ما يرد

ابي ارجع مثل ما كنت
ذيج الانسانة اللي تحب زوجها وبيتها
ابي انسى هالموضوع ولا كانه شي صار

بس مو عارفة شلون
كلما اقول ببتعد احس فيه شي يدفعني مرة ثانية له
مع العلم انه ما مرة اتصل فيني غير المرة الاولى اللي اعترف لي انه يحبني، وكنت انا اللي اتصل على طول وكان بكل مرة ياكد لي انه يحبني، وحتى مسجاتي ما يرد عليها الا نادرا جدا..

حاولت انساه وما قدرت خصوصا اني اشوفه يوميا على التلفزيون ، وبنتي تحبه وايد لان القناة مخصصة للاطفال، وتذكر اسمه جدامي مليون مرة في اليوم

نصحوني
هاوشوني
زفوني
بس قولوا لي شلون اقوي ايماني ؟؟؟؟؟؟؟شلون؟؟؟