العيد جاء لكن ما له أي طعم(مستجدات بالرد 62)
ا
لسلام عليكم ورحمة الله وبركاته ...
حبيت أفضفض واعذروني على إزعاجكم في يوم العيد لكن والله إني أشعر بضيق ومرارة
وظلم ذوي القربى أشد مرارة *** على المرء من وقع الحسام المهند
كل عام وأنتم بخير وصحة وسلامة .. أنا قبل شوي رجعت من صلاة العيد وكلي أسى وحزن بسبب المشاكل اللي ما لها داعي أصلاً .
المشكلة :
أصلا المشاكل من زمان متأصلة وعلى أشياء تافهه لا تذكر .
قبل اسبوعين تقريباً تكلمت مع زوجتي بكلام هادئ وأخذت أبين لها أنني ما أكرهها أبداً بل بالعكس وحاولت أفهمها إن الحياة الزوجية يجب أن يكون فيها تنازلات من الطرفين .
المشكلة إنها بدأت تلين لكن مع وضع شروط وهي توعدني نسافر إلى (.......) ونجلس يومين قلت طيب أوعدك وبدأت تستغل طيبتي ورغبتي في الصلح وبدأ معاها مشاوير السوق كل يوم للبحث عن لبس مناسب ووالله إني فريت معاها 4 مرات حتى مرة من بعد صلاة التراويح حتى قبل الفجر ووالله إني لما نمت صحيت معضل ، ما تركنا محل إلا ودخلناه طبعا ما ناسبها شيء وكانت تقول لا تطفش أقول طيب طبعا في أحد الأسواق وجدت لبس وقالت ناسبها وأنا حسيت إنها مترددة قربت منها وهمست في أذنها وقلت لا تأخذي شيئ إلا وإنتي مقتنعة فيه تماماً قالت خلاص هذا مناسب ورح أخذه. طلبت المقاس المناسب ورحت للكاشير وحاسبت عليها وكان الوقت قريب الفجر والبيت مشوااااااااار المهم خرجنا من المحل ولما قربنا من بوابة السوق قالت رجعه أبي أشتري اللبس اللي شفته في المحل الفلاني . قلت لا خلاص ما نرجع ما يمدينا الوقت ضيق مرة.
رجعنا للبيت وإلا ثاني يوم تطلب تروح السوق خامس مرة قلت طيب لكن خلي العيال عند أمك لأنهم متعبين في السوق وما نقدر ناخذ راحتنا وعلى مضض قالت طيب ومشينا لما قربنا من سوق كبير بدأت الحالة لأني عاتبتها لأنها ما عجبها شيئ ومزاجها صعب وطبعا أكون أنا الضحية وحقيقة كان عتابي لها بهدوء لكنها بدأت تنفعل وتصيح في السيارة وبدأ مشوار البكاء والتظلم وإني أظلم الناس ووووووووووووووووووووووووو وجاتها حالة العصبية حتى قلت لها ترا الناس في السيارات الثانية ملاحظينا .
المهم عصبت أنا وهي كمان عصبت ورجعتها للبيت بدون ما نروح السوق ، ومن يومها بدأت العقوبات الاقتصادية في البيت ، طبيخ مافي أرجع قريب المغرب البيت ما فيه شيئ يعني فطور لا ، كلام ما في إلا بقدر الحاجة الماسة .
جاء يوم العيد وكأنه ما في عيد راحت تنام ونومت العيال قبل الفجر ولا لبستهم ولا خرجوا معاي لصلاة العيد وهذا انا رجعت من الصلاة مهموم وجاتني على جوالي 3 رسائل كل وحدة أكبر من أختها تذكرني بمواقفها الزينة معاي وتختم كل رسالة بالدعاء علي .
أنا الآن جالس وحيد في مكتبي والله ما ودي أشوف أحد ولا أروح لأحد ، أكثر الأعياد تحرقها بزعلها على أمور تافهه وأشياء ما لها داعي .
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــ
كتبت اللي فوق بعد صلاة العيد في الصباح وكنت أظن إني أرسلت المشاركة واتضح لي إني كنت مسوي لها معاينة .
طبعا بعد ما كتبت خرجت ورحت زرت أقاربنا ورجعت قبل الظهر وكان العيال وأمهم نايمين وما صحوا إلا قبل المغرب ، قلت آخذ العيال للملاهي لكنها للأسف ما لبستهم ولا خلتهم يحسون بفرحة العيد وأنا الحين بعد صلاة العشاء بروح لبيت كبير العائلة لأن الكل يحضر هناك بعيالهم بعد صلاة العشاء ويكون عيد العائلة هناك الكل يحضر بدون استثناء ولما أروح لوحدي يسألوني عن عيالي وينهم والله إحراج وش أقول أمهم زعلانه وحرقت عليهم فرحة العيد.
يمكن البعض يسأل ليش ما تكلم أبوها ... أقول أبوها الله يرحمه.
وإذا سأل أحد ليش ما تكلم أمها أقول كلمت أمها وكنت عندها قبل المغرب وقلت لها على السالفة ، لكن للأسف ما في فايدة.
أخوها على علم بالموضوع لكن ماحد يقدر يكلمها ، لو أحد فتح الموضوع تقعد تبكي وتقول هو يقصد يقهرني ... أقول سبحان الله كيف أقصد أقهرها يعني لو رحت معاها للسوق 4 أيام منها 3 أيام متتالية ولف في السوق لما الفجر .
في اليوم الخامس أقول لها والله ما لي رغبة في السوق تقول أنت متعمد تقهرني وأنت تبي تحرق علي فرحة العيد وأنت ............................ سيل من التهم .
أقول لها والله إنك فاهمتني غلط .. بالمقابل لو هي رفضت شيئ مثلا خلاص ما تتراجع ولا تعترف إنه خطأ .
مثلا بعد ما زعلت ذاك اليوم تقريبا يوم 25 رمضان خلاص ما عاد طبخت فطور ولا سحور وقفت تماماً وكنت أجيب الأكل من برا أو أطبخ أنا لكنها ما تجلس على صفرة أنا جالس عليها.
جينا في آخر يوم وكان عندي أحد أقاربي ضيف لأنه ما له أحد هنا وعمله يحتم عليه البقاء طبعا اضطريت إني اشتري أكل من المطعم وفطرت أنا وهو لوحدنا وهي ما حركت ساكن ولا احترمت إن عندي ضيف.
وقاعدة تمن علي إنها لما عزمت عمي وعياله طبخت.
المهم المشاكل كثيرة لكني ما أشوف مشكلة تستحق كل هذي الهالة من الزعل وحرق فرحة العيد .
فضفضت لكم وأرجو منكم الدعاء لها ولي بالهداية ، وأنا ناوي بعد اليعد أروح لشيخ مشهور له مكتب للصلح بين الأزواج وهو فعلا رجل حكيم ودي أخذها وأروح إذا رضت وإذا ما رضت بروح لوحدي وأحكي له قصتي من طقق إلى السلام عليكم .
10-09-2010, 07:31 PM
ضوابط المشاركة
العرض الشجري