السلام عليكم ورحمة الله وبركاته

كيفكم مع البرد ؟

بدون مقدمات بدخل بالموضوع ع طول .. واتمنى مساعدة الفاهمين والفاهمات منكم

انا بنت متزوجه من سنتين وخمس شهور وعندي بنت عمرها 3 شهور ونص ربي يحفظها

عمري 24 سنه وزوجي 28 سنه تزوجنا بعد قصة حب "كانت ومازالت احلى ايام عمري" دام هالحب 3 سنين وبعدها ملكنااا

زوجي مايقرب لي لكن كان يجمعنا منتدى واحد وبعدها اضفته ماسنجر وتطورت الامور ..

بعد ماتزوجت صار كل شي روتين للحين ولله الحمد الحب موجود لكن انا مازلت متمسكه بذكرياتي الحلوه

وكل شوي اذكره اقول كنا بالساعات نسولف الحين حياتك كلها تصفح نت وازعل من هالسالفه واجد ويامى فصلت المودم ولا خذيت لاب توبه وخبيته بس مافيه فايده من يرجع من الدوام لازم يفتح اللاب ع طول وينشغل اذا تكلمت رد ماتكلمت يعيش بعالم آخر

قبل ايام قال انا اعترف اني مقصر معك واني اطول بجلستي ع النت لكن والله يافلانه اني احبك مثل اول واكثر لكن خلاص انتي معي اللي تغير اول مايجمعنا الا محادثات فلازم نسولف الحين انتي قدامي و و و

كلامه صحيح وادري انه صحيح بس مو راضي يدخل مخي الوضع .. انا عندي لاب توبي بس ماحب اتصفح يوم هو فيه ابي بس معاه لكن القاه منشغل عني

اشترى لي البلاك بيري وصرت اسولف مع خواتي وصديقاتي بس برضو هالشي ماخلاني ماازعل من جلسته ع النت .. اليوم فصلت المودم اول ماجا من الدوام وقلتله اجلس معاي وجلس ماقصر بس ماعنده شي يسولفه طبعه هادي ولايسولف وجلست اقول سولف سولف واحسه يحاول وماعنده شي اخر شي قلتله روح ناام ارتاح .. وجلست على التي في والنت والبي بي وبنتي .. بس فاقدته احببببببه واتعبته معااااي

نطلع كثير يعني من خمس ايام ثلاث ايام نتمشى ويومين مايسمح شفتات دوامه تكون بالليل فتعب ويومين عند اهلي لكن طلعاتنا روتينيه بعد مجمع نتعشى ونرجع وبس مليت الوضع

يمكن العيب فيني واني ملوله مدري

الحين بعد ماولدت بنتي انشغلت معها كثير والنوم قلييل ومو بكيفي فصرت احط حرتي فيه اكثر واخليه يتحمل مسؤوليتها معي وهو مايقصر لكن كل ماشفته ع النت وانا بس مشغوله ببنتي وصياحها اصير انقهر اقوله حياتك ماتغيرت وانا بس مع هالبنت و و و .. اكره نكديتي بس تعلقي بالماضي وبايام كلها حب بحب بس متعبني

ابي اشوف الجانب الايجابي بحياتي مو قادره يوم راضيه ويومين ساخطه

مليت والله مليت

انا اعترف ان ربي من علي بنعمة الزوج المحب الطييييب والبنت اللي ملت دنيتي عسى ربي يرزق كل محرومه وانعم علي بنعم لاتعد ولاتحصى اللهم لك الحمد كما ينبغي لجلال وجهك وعظيم سلطانك

بس الضغط اللي اعيشه بعد ماصرت ام صار يكبر علي الملل والاحساس ان حياتنا صارت برووووووووود ببروووود

اكل ونوم وطلعه تمشي قصيره ورجعه جلسه ع النت ونوم

ساعدوني ابي اجدد حياتي معه ..

اعذروني موضوعي ملخبط بس اكتب وانا افكر بحياتنا فمارتبت افكاري

ابي ارتاح وحد يسمعني .. ويعيييييييييييييييييييين الله

الله يهديك..كذا راح تطيرين الرجال..

الرجال بطبعه مايحب النق.. والنكد..

خليك فرفوشه..

حسسيه أنك تثقين فيه..

دائما شجعيه قلوله ياعمري والله انك احن من اول ..وقليله دائما احس الله عوضني فيك.. وان حبك الي معيشني فيه لليل

ونهار زاد اكثر من أول.. اهتمي بشكلك بلبسك .. واهم شيء بسمتك .. ولسانك خليه ينقط عسل..

وخففي شوي من الغيره الي راح تخرب حياتك.. في ناس مايعرفون يتكلمون .. لكن مبدعين في الكتابه..

دائما راسليه.. اكتبيله رسائل على الاميل..عشان حتى لو قعد على النت يكون مشغول برسايلك..

زوجك طيب لا تخسريه.. اكيد هو متضايق بس لسه ماتعبى منك .. لا توصليه لهالمرحله..

الله يسعدكم ويهدي سركم..

__________________

اللهم إني استودعك المسلمين في كل مكان.. فإن ودائعك لا تضيع..
اللهم ارزقني سعادةً تجعلني أسجد لك باكية.. وارزقني بعدها سعادة لا تنضب أبدا .. اللهم آمين برحمتك يا ارحم الرحمين ..

حلم الامان

شكلك فهمتيني غلط .. مو سالفة غيره او قل ثقه !! بالعكس ثقتنا ببعض 1000 % ولله الحمد

جلسته منتديات رياضه ولا تصفح جرايد حفظت منواله ولايفتح ماسنجر حتى

لدرجة اجلس قباله واقوله افتح ماسنجر سولف معي شوي يمكن تتكلم بالماسنجر ويضحك ويفتحه بس يجلس ساكت يرد على كلامي بس اقوم اسكر ايميلي < نفسيات هههههههههههه

انا مو غيرانه حبيبتي .. انا بس فااقدته معاي ومو معاااااااااااي ..

ابي ينشغل عن النت فيني شلووووووووووون ؟؟

ومشكوره ع النصايح الحلوه

كل يومين عيشيه بجو مختلف .. مره استقبليه بلبس مغربي.. وأكلات مغربيه..

مره بلبس مصري.. وجو كله مصري..كذا يعني..

خليك شاطره.. واهم شيء النكد ابعدي عنه .. وزي ماقلت دائما ارسليله رسائل ايجابيه في كلامك معاه لأن الرجال مثل

الطفل..

اذا قلتيله انت شاطر يصير شاطر.. واذا قلتيله انت غبي يصير غبي..كمان الرجال.. اذا قلتيله انت مشغول طول الوقت بالنت

راح يزيد ويزيد.. لا.. قليله انت الجلسه معاك حلوه..أي شيء يجيبه الله يكثر خيرك يا ابو فلانه.. يا هداياك حلوه..راح يجيب..

زي ما فهمتك في الاول..الابتسامه .. الاستقبال الحلو من عند الباب..

خليه يحب البيت.. والبنت.. والجلسه معك.. حتى لو تبغينه يمسكها يعني البنت .. وهي في احلى ريحه وشكل.. ومو

تخلينها معاه وهي تبكي..شوفي مو المهم انك اتزوجتي لا المهم انك تحافظين عليه..

والله يسعدكم مره ثانية..

__________________

اللهم إني استودعك المسلمين في كل مكان.. فإن ودائعك لا تضيع..
اللهم ارزقني سعادةً تجعلني أسجد لك باكية.. وارزقني بعدها سعادة لا تنضب أبدا .. اللهم آمين برحمتك يا ارحم الرحمين ..

يا حبيبتي الملل مبعثه روحك ولن يذهب عنك الملل الا بشئ واحد هو ان تملأي وقتك بطاعه لله اوذكر وان يكون لك برنامج انت وزوجك لأعمال صالحه او طاعات تجمعكم سويا فهذا ايضا يجدد الحب ويذهب الملل وليس فقط الخروج والكلام والحب

واذا كان لا يجد زوجك مايقوله فلماذا لا تقرأوا كتاب سويا وتعلقوا عليه وتتناقشوا فيه

بالطبع المرأه بعد الولاده نفسيتها تميل الي الاحساس بالملل والاكتئاب أحيانا
ولكن حاولي انت التجديد وكوني ممتعه لزوجك ومتحدثه لبقه
وليس المطلوب ان يكون الزوج  ساعه عشق وهيام
ولكن القدر المعقول
ولا تجعلي الشيطان يمنيك بالمفقود لينسيك الشكر علي الموجود
فلا تستسلمي وأكثري من الطاعات فهذا هو فقط ما لا يضيع

__________________
اللهم اجعل عملي كله صالحا واجعله لوجهك خالصا واجعله عندك متقبلا

اختي لانك انتي طفشانه صرتي تشوفي انو حياتك مع زوجك كلها طفش
اشغلي نفسك شوي عنه
نمي هواياتك طوري من نفسك
اكسري الروتين مثل ماقالو الاعضاء
في كذا موضوع لاختنا الغاليه لمني بشوق رائعين ممكن تستفيدي منهم وتنفذيهم
ربي يوفقك ويعسدك

__________________
يارب عوضني عاجلا غير اجل واجعل ابني شفيعا لنا واحفظ زوجي لي وارزقنا من حيث لانحتسب

برجع لردودكم بإذن الله

لكن حابه اضيف شغله يمكن هي مساعده اني مو قادره استمتع بأيامي او اقدر اسوي برنامج لحياتنا

وهو دوام زوجي كل يوم غير الثاني مثلا اليوم من الصباح للظهر بكرى على طول من الظهر للمغرب اللي بعده من المغرب لنص الليل بعده من نص الليل لين الصباح وهكذااا

فالوقت اللي ينام فيه انا صاحيه بحكم دوامه المتعب واجلس طفششششانه

فيضايقني الوقت اللي نكون فيه مع بعض ونكون بالبيت مو برى يقضيه انترنت وكذا

كيف يكون ردة فعل زوجك لو تتكلمي معه عن الرياضة أو عما يتصفحه في الجرائد؟

__________________

هلا من جديد

صدقتي بالنقطه اللي بالاحمر كل ماله يزيد ههههههههههههه

وعن اول كلامك .. ماحس يهتم لهالامور .. اعرفه

لكن الاستقبال والتوديع للامانه اول سنتين استقبله واودعه عند الباب واترك كل شي بيدي واركض
لكن الحين بعد ماجبت بنتي صعب اودعه اكون بقمة تعبي واقوله استودعتك الله وانا بفراشي ماطلع معه وهو يقول نامي ارتاحي لكن لما يرجع لازم استقبله ورى الباب مع الانسه الصغيره

وعن الاهتمام والله اهتم قد مقدر انشغلت صحيح بالبنت لكن لازم البس لو اخر خمس دقايق قبل جيته واهتم بس منتديات الرياضه اهم من كل لبس الظاهر

وتعبت من فتح الموضوع معاه احسه مللل وعجزت عنه .. بحاول بطريقه ثانيه يمكن ينفعوني فيها الخوات هنا

خالص تقديري لرجعتك من جديد يالغلا

جزاك الله خير

اعترف بتقصيري بالطاعات يعني الصلاة وبس واذكار الصباح والمساء .. والنوافل مو ذاك الزود

ودوم اقول اكيد سبب مللي هو من تقصيري لكن الشيطان حريص يوم اكون بقمة تقربي لله وايااااام بعيييده

وعن القراءه فعلا مره استمتعنا كنت اقرأ كتاب الرجل من المريخ والمرأه من الزهره وكنت اقرا له ويعلق ومتحمس لكن بعدها ماعرفت اشاركه بشي

عندك كتب تجذب الرجل للمشاركه ؟؟

والف شكر