بسم الله الرحمن الرحيم

طبعا انا متطلع قديم في المنتدى وعمري ما فكرت اشترك او اشارك بشي

بس اليوم قررت اشترك واشارك وعندي موضوع حابب اخد رايكم فيه

موضوعي يتكلم عن الزواج من انسانة غنية

انا انسان عادي لا غني ولا فقر من طبقه فوق المتوسطه بشويا

عندي ماجستير في الكمبيوتر وشغال في شركة كبيرة واستلم راتب كويس الحمد لله

ولما فكرت اتزوج والدتي رشحتلي انسانة كويسة وعلى دين وبنت ناس ومن عائلة معروفة جدا

وبشهادة الكل مافيها اي عيب والحمد لله بس انا شايف شي ممكن يكون عيب انها غنية

ممكن غيري يشوفها ميزه وما انكر انه الرسول صلى الله عليه وسلم قال

(( تنكح المرأة لأربع : لمالها ولحسبها وجمالها ولدينها ، فاظفر بذات الدين تربت يداك ))

بس انا احس انه اغلب الناس راح تكون نظرتهم مو كويسة ليا و الاغلب راح يقول اخدها عشان فلوسها

ولا دا مو حق زوج اخدها عشان يتنغنغ ويتمتع بالفلوس وحتى لو مثلا ربنا اكرمني وجاتني فلوس من وظيفتي

واشتريت سيارة مثلا راح يقولو بفلوس زوجته استغلها اخد منها وضحك عليها وكلام كتيير وفعلا دا حاصل

وبسمع الكلام دا على اغلب اللي يكونو متزوجين اغنياء .. وفوق كدا البنت دي ابوها متوفي

وسبلها املاك كتيير ما شاء الله ربي يباركلها ان شاء الله بس دا سبب تاني يخلي كلام الناس يكتر

انه استغلها عشان ابوها ميت وغير كدا في شي تاني

انا ابغا احس انه انا اللي اصرف عليها وانه هيا مسؤولة مني وما ابغا احرمها من شي

بس مهما كان راتبي لو اعطيتها هوا كله هيا ممكن تشوفه شي بسيط

ابغا احس انه حتى لو اعطيتها 10 ريال تحسها كتيير وشي حلو مني مو لو اعطيتها 10 الاف تحسها مبلغ حقير

وهيا متعودها على شي اكتر من كدا ما ادري في افكار كتيير في بالي وابغا ارائكم

اهل البنت ما يسمعو فيا ويتمنو اني اكون زوج بنتهم بس انا خايف اني ما اقدر اسعدها

وما ارضى على نفسي انه هيا اللي تصرف عليا وكيف ممكن اتعامل مع نظرت المجتمع ليا وكلام الناس