زوجي مسجل في موقع زواج مسيار
متزوجه من 10 سنوات عندي 3 اطفال مشكلتي
بدات عندما فتحت اميل زوجي هذا الايميل انا مسويته له لانه هو طلب هو مايعرف بالكمبيوتر ونت كثير وانا الي شجعته وعلمته
اشياء بسيطه فيه يعني كيف يتصفح الجرايد ومواقع رياضيه .
فتحت الايميل والاقي رساله من موقع زواج مسيار وانه تم تسجيلك لدينا فتحت الموقع وعرفت اسمه
وشفت بياناته وطلباته . قال انا رجل جاد في الحياه وشخصيتي تحمل كل الجديه وبحث عن فتاه بيضاء وجميله
لايهم مطلقه او ارمله او لديها اطفال .
انا انصدمت وبكيت كثير ولما جاء فتحت له الصفحه الي فيها بيناته واسمه وعلى طول قال هذا صديقي مسجلني
وانا ماطلبت منه اهو وحلف انه صديقه مسجله وان الموضوع ماهمه وقلت صديقك وش يعرفه بانك تبي بيضاء وجميله
قال اكيد بيحط شروط كذا . زعلت وقلت اذا تبي تزوج مسيار ولا عادي طلقني انا ماتحمل وبعدين انا اخذتك وافقة عليك
انك مو متزوج ولو كنت متزوج ماوفقت عليك .
قال ولله انا مافكرت بزواج ولو انا الي مسجل كان غيرت الاميل المهم اني حذفت اشتراكه وعدت الامور بعدها ب6 اشهر
الاقي رقم بجواله بتكرر وكل مره الرقم يكون باسم وحد ثاني وشكيت فيه واخذت الرقم ودقيت
وطلعت وحده وقلتلها انتي مين ورقمك لقيته مع زوجي وعطيتها رقمه وهي على طول اعترفت قالت
هو مسجل في موقع زواج مسيار وعطاني رقمه وقلت انتي تبين تزوجينه مسيار قالت لا انا متزوجه
بس احب العب واشوف وش يبون المتزوجين بالمسيار وقالت ولله هو يدق علي بس انا مارد
وقالتلي اسمه في الموقع .
سكت وماوجهته لاني ماراح استفيد غير انه بينكر وبس . رقم البنت ماعاد شفته حاول كم مره يدق عليها
ويوم ماردت تركها.
انا سجلت في الموقع وعرفت ان التسجيل للبنات مجانا والشباب بمبلغ مالي انقهرت انه يدفع على شي مايستاهل
وهو الي مايحب يصرف ودايم يفكر بتوفير عشان البيت الملك وكنت اشجعه واقتصد كثير .
حتى المصروف الشهري يرفضه لانه من البدايه انا ماطلبت لاني كنت اراعي ظروفه وماعمري سافرت
وهو تعود على اقتصادي وكان انا هدفي نفس هدفه البيت والاستقرار .
لاكن هو بعد ماتحسن وضعه وحس انه مستقر ماليا راح بيحث عن شهواته ونزوته .
المهم سجلت في الموقع وراسلته وكان جاااد في موضوع الزواج وكان صريح ومايكذب وحتى طلبت مهر 50 الف وافق
بس كان شرطه النظره الشرعيه . انا سكت وماواجهته بس تلميحات اقوله اني حلمت حلم ونه بيسير شي يفرقنى
ابيه يحس شوي وقلت احساسي انك تبي تزوج وجلس يضحك يقول انا مابي الزواج واذا بتزوج مسيار
شهر سنه وطلق وماراح يضرك بشي انا زعلت وبكيت وقلت ولله اذا صار اخر مابينى .
قال امزح بس اقولك اذا بتزوج يمكن مسيار .
بديت اراسله وكل مده اسجل باسم ثاني . عشان ابين له ان كل البنات في الموقع مراهقات ونصبات
وهذي الحقيقه بعد ماسجلت عرفت ان هذا الموقع ماهو الا تعارف وغزل بس زوجي كان جاد . وصريح ولايكذب
وعطاني اميل ثاني له الي هو مسجل فيه واضافني وعرفت ان الايميل جديد لاني انا اول وحده يضيفها
عرفت من ملف التعريف .
وماضاف احد غيري بس في الموقع لما طلبت رقم جواله عطاني رقمه على طول وقال لاتدقين لا بعد المغرب
تعرفين متزوج .
عرفت رقمه السري للموقع وافتحه وادخل عشان اذا جته رسايل من غيري احذفها قبل يشوفها .
انا الحين ماوجهته ولا راح اواجهه
هو يصلي ويخاف الله وانا بعد الحمد لله وتقربت لله اكثر وطلبت نحج هذي السنه وافق وسجلنا بحمله
بس انا صرت عصبيه ومتناقضه وابي اصرف فلوسه كثرت طلباتي الي هو ماتعود عليها وكثرت مشاكلنا
يقول انتي متغيره صايره عصبيه ونكديه كل يوم لك وجهه .
صار اذا تكلم عن البناء والبيت ومتى بيبداء مااتجاوب معاه وصار البيت مايهمني كثر مايهمني
اعيش ليومي طلبت مصروف شهري ورفض ومشاكنا زادت لان الثقه صارت معدومه
علاقتنا الخاصه ممتازه ابد مارفض له طلب واسعده وهو عادي يعني مايعتبر رجل جنسي . مرتين في الاسبوع او ثلاث
انا اصبحت قلقه كثير واتخيل اشياء وقصص وقل نومي انام بصعوبه وتوتر وهو ملاحظ بس مايعرف السبب يقول انتي تبيني
اكون رومنسي وادلعك وانا ماعرف انا ربي خلقني كذا انا احبك بس احكمي بالفعال ومو بالكلام
قلت ابي اسافر برا اي مكان قال يبي لها 20 الف قلت عادي اهم شي اغير جو قال انتي متغيره انا
اقولك اذا بنيت البيت وستقرينا اوعدك كل سنه سفره ولله وعد .
هو يتكلم بس انا ماصدقه ابد تعبت ابي ارتاح صداع مستمر معي وتنمل في راسي شديد ومتوتره وقلقه
مادري وش الحل ابي احافظ على زوجي وبيتي وعيالي بس تعبت منه وماعاد فيه ثقه .
خصوصا الحين كثر التعدد وزاد واخاف تجي وحده وتاخذه منى ولله تعبت كثير يارب فرج همي ويسر امري .
10-10-2011, 08:06 AM
ضوابط المشاركة
العرض الشجري