بعد التحية ومن غير مقدمات
قصتي هي أنني بعد أن تركت خطبت المرأة المطلقة لعدة أسباب كما ذكرت في موضوعي السابق http://www.66n.com/forums/showthread.php?t=226327
كلمتني الوالدة عن فتاة من بيت دين ومتدينة وخلوقة وجميلة وكل أهل الحي يمدحون فيها وفي أهلها تقدمت لها بعد الإستخارة وجاء موعد النظرة الشرعية وأحسست بالقبول وهي كذلك
وتمت الخطبة وبعد فترة جاء أخوها وأخبرني أن أخته بتفسخ الخطوبة فسألت عن
السبب فقال من أجل الدراسة فقلت أنا أبغاها تكمل دراستها وبساعدها وحسيت في
نظراته الكذب قلت له بالله هل سمعتم عني كلام ماهو زين لاتكون سمعتي مشوهة وأنا ما أدري قالي يابن الحلال أنا بأقولك الحق سئلنا عنك قالوا يطلع البر كثير وبدوي
وأختي تقول ما تبغى بدوي وغير كذا سيارتك ما عجبتها ؟؟؟
الغريب في الموضوع أن عائلتنا سكنت المدن وتحضرت
وتركنا البداوة من سنين طويلة من أيام جدي الله يرحمه
ولا حد يفهم من كلامي أني متحامل على البدو لا والله أنا أجدادي
بدو والبداوة فخر ولكن حنا نعتبر حضر وحياتنا في المدينة ومتعلمين
ودارسين وقلة منا في البادية
وأبوها لمح لي بالمزح أن السيارة ما تنفع للزواج وقلت له بغيرها
أنا انصدمت ولا أدري كيف أرد على أخوها قلت له هي حره في اختيارها والله يرزق الجميع
صراحة اكتشفت بعد هذا الموقف أن فيه سطحية في تفكير الفتيات وسذاجة بشكل
لايصدق تفسخ الخطوبة عشان طلعات بر وسيارة بالله هذا سبب لفسخ الخطوبة؟؟؟
وهي تعتبر من خيرة البنات صاحبة دين وخلق الله يخلف علينا ويعوضنا بالخير
البنات يقولون نبغى الستر واذا جاءها واحد تفسخ الخطوبة لأسباب واهية
صراحة الزواج من الخارج هو الحل المرأة تكون فاهمة ومثقفة وتقدس الحياة الزوجية
وتحترم الرجل ما تعتبره لعبة ترده وتفسخ الخطوبة لأسباب تافهة

اولا الله يرزقك بالزوجه الصالحه ويوفقك في إختيارك ياارب
اتعجب من بنات العرب اسفه بس انا كنت اعتقد انهم اذكي من كده!!انا ماعشت في حياتي في دول عربيه مع اني عربيه ومن قبيله معروفه وتعتبر هذه المنتدي اول منتدي عربي اشترك فيها بعد ماكنت مداومه علي قراءه كل ما يكتب منذ 2005 بس للأسف تفأجات من الذي يحصل؟؟؟ليش صرنا احنا العرب كده؟؟ليش الشكليات الخارجيه صارت اهم من الدين والاخلاق؟؟استغفرالله يعني الغرب تشوف الابيض يأخذ الاسود والاسود يأخذي صيني وهكذا اما نحن العرب ليش صرنا ندقق في كل شئ؟؟يعني اللي يتزوج لازم يجيب سياره فخمه جديده؟؟ويعني لازم يلبس شيك؟؟؟وايش فيها اذا طلعاتك كثيره؟؟
الحياه العزوبيه شئ ولما الشخص يتزوج شئ ثاني اسفه بس منجد منزعجه من اللي قاعده كل مره اقرؤ المهم الله يوفقك مو شرط تأخذ واحده من بلدك او من اي بلد ثاني المهم تأخذ اللي تشوفها مناسبه لك واللي تكون تعرف دينها والاخلاق اهم شئ الزواج مو بس يوم اثنين ثلاثه او اسبوع اووو
والله يوفقك

والله صدقتي في كلامك أن المظاهر ذبحتنا على غير القبلة صار المظهر أهم من الجوهر وأنا الحمدلله مهتم بمظهري وبنفسي ولكن اللي قهرني أكثر أن سيارتي شاريها قبل سنة بـ120 ألف ريال السيارة جديدة ولمح لي أبوها أن السيارة ما تنفع وكلمته أني بأخذ سيارة صغيرة جنبها ومع ذلك فسخوا الخطوبة لأسباب واهية
شاكر لك مرورك العطر

صراحة شيء غريب ..
ما يدري الواحد وش يبون هالبنات ؟
أنا أشوف أنه هذا يدل على مرجلتك ، يعني يبون واحد ما قد طلع بر ؟!
أهم شيء أنه الواحد يكون متحضر ومظهره لائق ، أما أنه من عائلة بدوية أو يطلع البر فهذا شيء عادي ، وحنا وش نصير كلنا ما تحضرنا إلا قريب !
لكن بالنسبة للسيارة ، بالفعل في سيارات ما تصلح للمتزوج مثل الشاص والربع ، يعني بصراحة صعبة تركبها البنت .

وإذا كنت معزم تتزوج من برا فالله يوفقك ، لكن التفاهم مع بنات البلد أحسن ، أو خذ من البيئات المقاربة ، والله يعينك على التعقيد في النظام ..
فكر مليون مرة في نظام زواج غير السعوديين ، أكثر الوظايف بتكون ممنوع منها ، والزوجة على النظام الجديد ما لها جنسية ، ومقفلين الباب من كل الجهات ..

قد خطبت بنت غير سعودية وكانت بنت فاضلة ومن عائلة محترمة ، ولكن كنسلت الموضوع وكان أهم سبب النظام اللي وقف أمامي !!
وتعقدت من بعدها لأنها كانت أول تجربة خطوبة لي وأنا مو كبير في السن وحسيت أني بأفشل في كل حياتي ,,

آسف على التطفل على موضوعك

__________________

يارجال انت الكسبان والله

لا تخلي الرفض هذا يحطمك بنات الديرة ماشاء الله مافيه منهم

و ان شاء تلاقي اللي تناسبك و تسعدك و توافق على سيارتك هههههههه

وأنت على طول تنصدم من أول خطبة ؟؟

أنا بتحفظ عن المقارنة بين بنات بلدي السعودية وبنات جيراننا من الدول المجاورة لأن المقارنة من ناحية الزواج بالذات فيها إجحاف وظلم للطرفين

بس بنبهك على شي مهم
تفكير الإنسان القاصر دائماً يقوده لنتيجة عكسية

يعني بضربك أمثلة من واقعي القريب في التفكير القاصر من زواية الزواج :
1- واحد من اخواني الله يهديه كان نظرته للسعوديه إنها متكبرة وماترضى بالقليل رغم إن اخواتي (بدون ماتكلم عن نفسي) مثال للتواضع والقناعة ووالله إن الوحدة فيهم ترضى بأقل مهر وبأقل تكاليف وهذا منطق والدي رحمه الله . المهم اكملك حكاية اخوي اللي حكم على السعوديات من نظرته لبنات عمي لما شاف شروطهم وتكاليفهم في الزواج ، قرر يخطب من الجنسيات المجاورة لنا وكانو اهلها جيران لنا .. المهم البنت خلوقه واهلها متواضعين رحبو فينا وتمت الخطوبة والزواج والحمدلله .. صار له 7 سنين متزوجها والله العظيم إنه طاح في ديون عشان يرضيها كل فرح تبغى فستان جديد ومايرضيها القليل ابداً بالغت في الٍإسراف والطلبات الله يهديها . وللعلم فيها صفات رائعه الحمد لله عسى ربي يحفظها ويهديها . طبعا هذا النموذج موجود بين السعوديات أيضاً واللي لازم تعرفه إن المرأة في كل العالم مو بس العربيات طبعها تحب الزينة والمظاهر وقليل من النساء من تملك القناعة الله يصلح نساء المسلمين .

2- المثال الثاني واحد من قبيلة بدوية تزوج من قبيلة حضرية وكان تفكيريه قاصر على المقارنة بين عيوب البدوية ومميزات الحضرية <<< لاحظ أنا قلت تفكيره قاصر على جانب واحد
طبعا أنا هنا ما أقصد من مثالي أن هذي أفضل ذيك لا طبعا أنا اقصد الشاهد من مثالي التفكير من زواية ضيقة .
النتيجة بعد ماكتشف عيوب الأخرى اللي زكاها من العيوب في المرة الأولى بالمقابل اكتشف مميزات الأولى اللي أقتصر على حصر عيوبها في المرة الأولى .


الخلاصة يابن الأجواد
بنت بلدك أكلت أنت وهي من صحن واحد أقصد تربيتو ببيئة وحدة وفيه من تتمناك وتفتخر فيك وببداوتك وسيارتك .
والخير موجود ببنات المسلمين بدون تخصيص مهما اختلفت بيئتها وعاداتها.
وإذا أنت تتمنى تتزوج من بنات جيراننا فيهم الخير والبركة.

المهم
حسن الإختيار


دقيقة أنا أعاتبك على هذه السطور

اقتباس:

البنات يقولون نبغى الستر واذا جاءها واحد تفسخ الخطوبة لأسباب واهية صراحة الزواج من الخارج هو الحل المرأة تكون فاهمة ومثقفة وتقدس الحياة الزوجية وتحترم الرجل ما تعتبره لعبة ترده وتفسخ الخطوبة لأسباب تافهة

الله يسامحك يعني مافي سعودية مثقفة وتقدس الحياة الزوجية وتحترم الرجل ؟
مارح ألومك لأنك زعلان ومتأثر من موقف سلبي لا ينطبق على كل بنات السعودية .


وفقك الله

ينقل لقسم المقبلين على الزواج

__________________

يَا ذِكْرَيَاتِ الصِّبَا عُودِي لِذاكِرَتِي

فَقَدْ يَجِدٌّ إِلَى لُقْيَاهُمُ أَمَلُ

أضم صوتي لصوتك أختي وأكثر الأجانب همهم الفلوس وجمع الي وراك وقدامك حسب ماشفت زيجات أقاربي الا من رحم ربي

المشكله ماهي في البنت المشكلة حتى اهلها تفكيرهم سطحي ..

على العموم لاتعمم ..ففي بنات البلد الخير والبركة ..
وراح تحصل ان شاءالله ابحث واسئل واعرف اخلاق امها وهذا اهم شي..
والله يوفقك

__________________
ربآ كفاك ماكان بالأمس ... سيكفيك في غدآ مايكون

" اللهم اجعل همي هم الآخرة "

فعلاً كلآم الاعضاء ..
الفتاة لو كان تفكيرها سطحي ومحدود ..

في من هم اكبر منها ويصححو لها تفكيرها .. هذي فرصه .. اليوم تلقى عريس بمواصفاتك ماشاءلله بس بكرا يمكن لآآآآ ..

وصدقني ربنا يحبك ويبغالك الخير .. وهادي خير من ربي العالمين ..

وحتصبح في يوم اسعد الخلق باذن الله .. حيث الله سيعوووضك بكل ماهو جميل وترضااه بذلك ..

نصيحه من أخت لك : لآ تفكر في الاجااانب ترى صادقة اختي رواء الايمان ..

أغلبهم همهم المظاهر واسراااااف في المال كإنهم ماشافو خير !!! وفي النهايه القرار لك

أنا لا اعمم ع الكل ..

ودمت بسعااده =)

__________________
الناس يمحون ماضيك الجميل مقابل آخر موقف سيء منك ، و الله سبحانه يمحو ماضيك السيء مقابل توبة منك ، فأيهم أحق بطلب الرضى ؟