السلام عليكم ورحمة الله وبركاته
مدري وش اكتب والله بس اللي اعرفه اني لما تصير لي مشكله افكر بعد الله فيكم . هنا الجأ لكم بعد الله لأتكلم وافضفض واطلب المشوره مع المحافضه على اسرار بيتي عن المجتمع .
المهم اختي خطبها واحد بين اهله وبين اهل زوجي مشاكل . المهم زوجي سبه وقال موعشان المشاكل بس هو مو كفو واختك حرام تاخذه وزعل وقال لو اخذته ماراح تروحين لعرس ولا راح تكلمينها طول عمرك
انا مادري قلت لاختي زوجي يقول مو كفو وقلت لها العيوب اللي قالها زوجي.
اختي رفضت الرجال وبعد كم يوم لما زرتهم تفاجأت ان امي تقول لي احنا رفضناه عشان خفنا عليك تتطلقين
انا قلت انا مو رخيصه عند زوجي عشان يطلقني على هالسبب. قالت امي طبعا لانك موظفه . انا انجرحت من هالكلام . واثناء ماكنا نتكلم كان زوجي يدق وانا ما ارد عليه . ولما امي قالت هالكلمه طلعت لزوجي وركبت السياره طبعا هو كان معصب يقول ليش ادق وماتردين انا هنا انهرت وقت له كل الكلام اللي دااار وبكيت من قلللللب . أه بس . ياليتني ماقلت له .
زوجي عصب وقعد يسب ويقول ليش تضن فيني هالضن السيء . وعطى الموضوع اكبر من حجمه .
والمصيبه هو شاف امي ببيت اخوه وسوى نفسه ماشافها ولا سلم عليها وهي شالت عليه ولما تواجهو في عزيمه ثانيه هو سلم ببرود وهي ردت عليه ببرود بعد . واحسه من عقبها عصب زياااااده وقال ياتختارين انا والا امك . انا قلت له انت عزيز وغالي بس مايرضيك تحرمني من الجنه . قال طيب اذا بتروحين اوديك لحالك بس عيالي مايدخلون بيتها ولا هم يدخلون بيتي . وصار يعاملني بجفاء كبيييير لاني على كلامه اخترت امي .
نسيت اقول هو يقول ماراح ارتاح الا لما اجيبها هنا في بيتي واخليها تعتذر لي وتقر لي على كل شي قالته وبعدها اقول اتكلي على الله . حسيته حقير بعد هالكلام . المهم قلت له وشلون تجيبها ؟ قال انا اعرف شلون اجيبها . وسكت . والله انه عصبي ومجنووووون . مرات ارحمه على تفكيره اذا عصب ومرات احس اني صابره صبر حمار وانتو بكرامه

يتضح لي ما يلي والله أعلم:
أولاً)كان من الأولى أن تسألوا أنتم عن الخاطب لأختك، وتعرفوا الأمر، ولكن بما أن زوجك أخبرك وكلامه صحيح جداً فلا بأس.
ثانياً)زوجك عجول، وسريع الانفعال والجواب، ويرمي الكلام هكذا على علّاته.
ثالثاً)من أكبر الأخطاء التي ترتكبها الزوجات إخبار الزوج بكل شيء عن أهلها وأسرار حياتهم وأقوالهم.
رابعاً)أحسنت في الرد عليه " انا قلت له انت عزيز وغالي بس مايرضيك تحرمني من الجنه".
:::
آمل منك ما يلي:
1) كرري هذا الدعاء "ربنا هب لنا من أزواجنا وذرياتنا قرة أعين".
2) اجعلي سورة البقرة تصدح في بيتك.
3) بما أن الزوج فيه عجلة وعصبية فحاولي امتصاص غضبه بكلامك الحلو الرقيق المخلوط بآيات قرآنية وأحاديث شريفة، مع طاعته والإكثار من قول "أبشر..تامر أمر..الخ".
4) انصحيه للخير وعمل الخير، والمحافظة على دينه وصلاته.
5) تقربي منه، وأحسني إليه بالقول والفعل.. وأوضحي له أنه أول الناس وآخرهم في قلبك وحياتك.
6) الجمي لسانك لجماً عن إخباره بأحوال أهلك وخصوصياتهم فهذا أمر لا يعنيه.
7) لا تكلمي أهلك بالهاتف الثابت أو الجوال وهو موجود في المنزل.
8) لا تذكري والدتك أو أحداً من أهلك أمامه.
9) قللي من زيارة أهلك لمدة شهر قادم.
:::
باختصار هذا ما أراه لك، والله أعلم.
أخوك في الله/ حاتم بن أحمد-الرياض

جزاك الله خير