مشكلتي بسيطة بس محتاجتكم..
السلام عليكم ورحمة الله وبركاته..
انا عضوة جديدة وجدا معجبه بهدا المنتدى لان ماشاءالله اغلب الاعضاء هنا حكيمين..
بقول لكم مشكلتي مع زوجي..انا متزجة من 5سنين وعندي بنتين..واحب زوجي بجنوون..زوجي الحمدلله تقريبا مرتاحة معاه..بس عندي مشكلتين دايم نتشاجر فيها انا وزوجي ::
المشكلها الاولى بسس الوضع المادي مع ان راتب زوجي 11 الف والحمدلله ..مع الايجار والقرض يصفي من الراتب 7000 لكن والله ان مايجي كم يوم بعد الراتب الا ويقولي مفلس ..وبصراحة انا اعصب يعني مادري وين تروح وانا ماعندي شغاله وبناتي كبار مايستهلكون حفايظ وحليب واغلب اكلنا من البيت ماحب اكل المطاعم..وزوجي بيتوتي وسيارته خربانه يقول ماعندي فلوس اصلحها ..ولما اطلب طلب ولو بسيط يقولي ابشري بس شوفي حسابي كم وفعلا اشوف حسابه مالقي غير بحدود 50 ريال..انا زعلت وعصبت عليه وقلت انت ماتعرف تتصرف بفلوسك والعيب منك لو راتبك 50 الف وهوة قال خلاص انتي امسكي الراتب وتصرفي فيه عشان اثبت لك..مسكت الراتب تقريبا 4 شهور والله تقريبا كل شهر وفرت 2000 وماعمرة احتاج فلوس لاخر الشهر واشتري الي نفسي فيه واتصدق كل شهر.. وانا خبيت الفلوس الي وفرتها وبعد فترة جونا ضيوف من برا المدينه وهوة شال هم العشا والبيت كان ناقصه اشياء كثيرة قمت اعطيته الفلوس الي وفرتها وكانت بحدود 6000تقريبا ومرة انصدم وماصدق ان هدا الزايد من الراتب ..ومن بعدها قال خلاص انا امسك الراتب ولنا تقريبا 8 شهور ومن يوم مسك الراتب رجع لنفس الحاله ناقصتنا اشياء كثيرة لدرجة اللحم مانقدر نشتريه وانا بصراحة سرت ارفع صوتي عليه واقوله انت مسرف وماتعرف تتدبر وانت مو حق مسؤليه ولما يقول ان فقران اعصب واقوله قول الحمدلله وغلطت عليه بالكلام من القهر لانه يقولي انتي فلستيني وطلباتك كثيرة وربي انا اجلس ب3 شهور جوالي مافيه شحن ..ودحين رجع يقولي خلاص ارجعي انتي امسكي الراتب وانا رفضت قلت ابغا مصروف خاص لي ولبناتي لاني انا الحمدلله اعرف اتصرف بالفلوس وافر من غير ماحرم نفسي بشي..وهوة رافض يقولي امسكي الراتب كله ..وانا بصراحة تعبت ابغا رجال انا اعتمد عليه ويوفر طلباتي من غير ماشيل هم ابغا احس بانوثتي معاه ويكون مسؤؤل عني مو انا مسؤؤله عنه..انا احس اني لو مسكت الراتب عنه احس بعد كدا ماراح يحس بانوثتي ..مادري كيف اتصرف مابغاه يتعود اني امسك فلوسه بجد ماني راضيه عليه بس هوة جبرني لان ماراح نقدر نوفر طلباتنا..
والمشكله الثانيه:: زوجي كان انسان فرفوش ودمة خفيف وطول اليوم لعب وضحك بالبيت كان البيت له روح من يوم اشترا الايفون سار 24 ساعه بالواتس مع قروبات اصحابه سار ممل بشكل مو طبيعي لدرجة له اكثر من سنه وعلى هدا الحال بجد ملييييت ..يعني تخيلوا لما اسافر لاهلي بالسيارة انا انبسط بالطريق واسوي القهوة والحلى اجلس اتقهوى لحالي جالس عالواتس وقت الاكل احس كاني اكل لحالي ..انا مرة ماحب الطفش والملل واسوي اي شي عشان ماحس فيه لكن زوجي يحسسني فيه غصب يجلس معاي بالصاله واسوي كابتشينوا من كثر ماهو متحمس بالواتس يشرب الكباتشينوا دفعه واحدة ..وانا انسانه احب الروقان احب استمتع بكل لحظة بحياتي كل شي له وقته مستحيل اعطي الجوال وقت اكثر من ساعتين مع ان عندي صحبات وقروبات اكثر منه..لدرجة اني اشك فيه بس لانه يجلس قدامي عالجوال وبعض الاحيان يوريني المحادثات بطلت اشك..الحمدلله انا اقضي وقت بالكتب بس بجد محتاجة زوجي يكون جنبي خاصه انا عاطفيه مررة بجد طفشت منه ..
ياليت تقولوا لي كيف اتصرف معاه بهدي المشكلتين ..لان الحمدلله في مجال اصلح من زوجي لان هوة عارف نفسه انه غلطان ويتعدل يومين ويرجع..ولاني سرت ارفع صوتي عليه كثييير مررة..بسببه
سوري طولت عليكم بس تحملوني..لاني احبكم واثق بحلولكم
التعديل الأخير تم بواسطة شقـردية ; 10-09-2012 الساعة 11:20 PM
10-09-2012, 03:57 AM
ضوابط المشاركة
العرض الشجري