السلام عليكم ورحمة الله وبركاته
الحمدلله بفضله بنتي ذكيه وسريعة الحفظ وكانت تحب التعلم
بشكل كبير وملحوظ
لاحظوا انها كانت :|
من نعومة اضافرها وفرت لها كل ألعاب الذكاء والملصقات التعبيريه
والتعليميه والكتب الملونه والقصص و و و
إلى الآن ماعتقد اني تركت شي ماشريته لها او اسلوب تعليمي
جميل مااستخدمته معها
كنت اكلمها مثل ماكلم وحده بنفس عمري ! واسمح لها تشاركني
بعض الامور من مبدأ المشاركه والاعتماد عليها والثقه فيها
يوم كان عمرها سنتين وكم شهر كانت تبكي تبي الروضه كل يوم
او تقول انا ماعندي اخوان مثل الناس واطفش ومحد يلعب معي
وانا ابي اطفال و و و
قلت لها قبل تكمل الثلاث سنوات ،وبإسبوعين قبل العام الدراسي
الجديد الروضه يقولون لازم اللي يبي يدرس عندهم يتعلم ع الحمام
وانتم بكرامه رغم اني كنت اعلمها واتركها لي ستة شهور لان ماكان
عندها حماس او دافع
في اقل من اسبوعين تعلمت عشان الروضه وسجلتها ودرست وهي
لسه 3 سنوات كانت اصغر طفل في الروضه
وكان عندها فرح وحماس شديدين للتعلم وكانت ماتنام الا وتقرأ المعوذات
وكانت تحفظ القرآن قبل الدرس وتتلوه مع المعلمه والمعلمه منبهره منها
شريت لها سلسلة الحروف التعليميه من جرير وحفظت الحروف في 4 ايام
وتجيب مع كل حرف كلمه واكثر
كنت مبسوطه عليها وعلى نجاحها واصرارها
لكن مشكلة الوحده في البيت كانت تعاني منها خصوصا اني ساكنه بعيد
عن اهلي وكنت امنعها عن الاطفال اللي حولها من اهل ابوها لانهم يدمروا
اخلاقها وصارت تعاند وتروح تطلع على كيفها وتروح البقالات وتلعب مع الاولاد
الذريه كلها اولاد ماشالله ماعدا بنتين وحده لسانها طويل وماعندها احترام
لأحد والثانيه عندها مشاكل نفسيه واهلها مو راضيين يعالجوها وكانت عدوانيه
وتضرب بنتي بقسوه وبدون سبب
وزوجي يداوم دوامين فيادوب يجي يتغدى ويرتاح وينام شويه عشان يداوم
الدوام الثاني ومايلحق ياخذها لصديقاتها او عند اطفال خواتي
اضطريت اني احمل عشانها < قبل الموعد المحدد للحمل الثاني
حملت وكان عندها 3 سنوات وانا كنت ناويه مااحمل الا اذا كملت
الخمس
فترة الحمل كنت عصبيه زياده مع التعب والارهاق والضغوط حمل ومسؤليات
طفل وزوج
بديت ابتعد عنها لاشعوريا واصرخ عليها واعاقبها
والله اني احيان انجرح نفسيا قبل اجرحها لكن هي تدفعني لهالشي
صارت تتعلق بأفلام الكرتون وصرت مرتاحه لهالشي لانه يريحني من طلباتها
خصوصا اني اتوحم على النوم ^_^
ولدت وزاد الامر سوء انشغلت عنها اكثر ولاحظت تمللها من الروضه فقلت هي
عمرها 4 لسه ودارسه سنه روضه ماراح اضغط عليها وهي صغيره
باخليها ترتاح سمستر وتكمل في الثاني احسن من تطفش في المدرسه او في
التمهيدي وفرصه اخذ راحه من اني اصحى الصباح كل يوم وانا لسه والده وتعب
وسهر وماراح اضلمها واخليها تدخل الروضه ومااهتم فيها وفي شكلها وتعلمها
بالشكل المطلوب ! وبالتالي تحرج عند صديقاتها والمعلمه وتشعر بالنقص!
مع الفراغ ادمنت افلام الكرتون ولما يطفي الآيباد تبدا الكارثه وتصير تصحي اخوها
من النوم ببوسه خفيه ههه او اي شي غير مباشر وهذا الشي يتعبني ويستفزني
او انها تطفشه وهو صاحي لين ماعاد يسكت من البكا
وتقول ألعب مع اخوي
صرت مااتحملها لاني زوجه ام لطفل ورضيع
زوجي يداوم دوامين ولخبطه في النوم مهما صلحت النظام اسبوع ويرجع يخرب
صرت اقسو عليها بعض الاحيان وصارت تحب افلام الكرتون اللي مثل ساندي بل وسالي
والاشياء الحزينه
صحيت على نفسي وبديت ألحق الموضوع مع بداية السمستر رجعهتها للدراسه
ونقلتها لروضه ثانيه قريب من اهلي عشان تكون صداقات راقيه فكريا لان المحيط حولها
للأسف في جهل وتخلف ومستوى ادب متدني للغايه وكمان اهيأها لإنتقالنا بعد كم شهر
راح نسكن قريب من اهلي فكنت ابيها تتعود وتكون مجهزه لها صديقات ترتاح معهم واطمئن
عليها
الروضه هذي ممتازه وماخذه الاول في كل النواحي على جميع رياض المنطقه رغم انها
اصغر من الروضه اللي كانت تدرس فيها قريب منا القريبه منا كانت جديده وكبييييره يطرد
فيها الخيل
لكن اساليبهم التعليميه تقليديه ومايحرصون على تغذية الطفل ويختارون الطعام الاقل تكلفه
فطيره جافه وحليب بالحجم الصغير
كانت تجيني هلكانه من الجوع والعطش وماعندهم وجبات الرياض الثانيه مثل سلطات الفواكه
والامور هذي
الروضه الحاليه عكس تماما رسومات ونظام ومحبه وألفه وفكر راقي وقبول نفسي كبير للطفل
رغم انها ماتجي ربع الروضه القريبه مننا لكنها ناجحه على كل المقاييس وفيها إلتزام بنوع
الاكل اللي يفضله كل طفل ويسجله في رغبته في ملف التسجيل
كل يوم نشاط ولعب في الرمل وواركان للقصص والمنزل ومن الاشياء اللي عارفينها
المعلمات راقيات وكل وحده مبتسمه دائما حتى لما نزورهم فجأه نلقى الروضه من احسن
مايكون ومافيه باب فصل يتسكر ممنوع
وكل معلمه تجمع امهات الاطفال في الصف في قروب واتساب وتتناقش معهم يوميا عن الدروس
والاطفال وتعطيهم ملاحضات وفكره عن الدرس المقبل
عكس الروضه هذيك اللي على طول مسكر والمعلمه
تعصب ع الاطفال
انا لاحظت هالشي واصريت اني ادرسها في الروضه هذي واترك القريبه مننا رغم كل شي
لاحظت الاطفال اللي تخرجوا منها بنات راقيات فكريا واخلاقيا وعندهم طاعه واحترام للأم وتحلي بالمبادئ
والقيم
سبحان الله بنتي حبت الروضه بشكل كبير
كنت اسألها عن الروضه واقول لها تبين ترجعين للروضه الكبيره ! تقول لا ماحبها حتى روضتي هذي
حلوه وفيها وفيها وابلتي احبها ومن هالكلام
لكن عندها مشكله هي الثقه في النفس
مثل ماقلت لكم قبل عاشت الوحده وعاشت وسط محيط اطفال سيء وعدواني للغايه وزوجي يداوم
دوامين ومايحب المشاكل فماياخذ لها حقها واضطر انا اني ادافع عنها او اجبرها تدافع عن نفسها
عماتها والكبار هنا اثروا على نفسيتها اساليبهم التربويه كلها جهل وسلبيات يضربون يشتمون ويصرخون
ويكسرون الطفل
انشغالي عنها بالحمل وتأثري نفسيا به وانعكاسه عليها ، غيرتها الخفيه من المولود الجديد
رغم محاولاتي في المساواه بينهم
كلها امور من الممكن انها اثرت على نفسيتها
انا اتفقت مع المعلمه اننا نتساعد عشان نبني ثقتها بنفسها انها تجاوب من غير ماتسألها
لاني اتعب نفسيا لما اشوف انها تتميز بذكاء وقدرات وتعرف الاجابات واتعب عليها وفي الدرس
ماتشارك
المعلمه تقول لي : تعجبني اجاباتها المتميزه وهي من الاطفال اللي واضح عليهم تعب الاهل
هي ادمنت افلام الكرتون وتأثرت سلبا منها
بديت اتدرج لها في حذف mbc 3 القناه السلبيه المنحطه القذره الهدامه
للمعلومه كلها ايحاءات جنسيه وافكار متفتحه وفيها تمرد على الاهل والآداب
وانا شايفه هالشي بنفسي
من قبل سنوات
واتمنى من الاداره ماتحذف اللي بين القوسين عشان يعرفون الاباء وش هي هالقناه
( شفت في توم وجيري ان الفأر يحب له فأره ويجي يرسل لها بوسه على شكل قلب
وهي تغمض عيونها ويصير الجزء السفلي من جسمها احمر وفيه قلب ينبض ) !!
تخيلوا الاشياء الحقيره اللي يتابعونها اطفالنا لاتقولوا مايتأثروا كل شي يجي بالتدريج
وهذي مقدمات حسبي الله ونعم الوكيل
المهم نرجع للموضوع
عانيت من هالشي وزعلها لكني مصره كل ماألقاها في المنيو بعد مايدخل ابوها
قنوات جديده احذفها
شوي شوي حذفت سبيس تون واسترجعت براعم اللي كل شوي يتغير ترددها
وفرحانه عليها لانها كانت قناتها المفضله وقت طفولتها
المشكله الكبيره صارت ترجع من الروضه شغلها الشاغل افلام الكرتون والايباد
وسالي وهايدي و و
ولما يطفي الآيباد تروح تشحنه وتتابع في التلفزيون وترجع للآسياد وهلم ماجرى
وعلى ذا الحال كل يوم وبس نشيله عنها تبدأ تزلزل البيت وكل ماافهمها واهدا معها
تروح ياتستفزني بأخوها ياتصير ضلموني وتروح تبكي على وسادتها وتنام
سبورة خطاط عندها كتب خطاط انقلش عندها
ملصقات حروف انقلش بالكلمات والاشكال
لوحات حروف عربيه ورق رسم وورق طباعه ومقص اللي على شكل مثلثات ^_^
الوان بكل الانواع صلصال لانها تحبه كثير
ألعاب مطبخ والعاب كل شي
حتى ملابسها مثل ماتحب هيلو كاتي وشراباتها وانتم بكرامه وهالامور
حريصه جدا على كل شي يسعدها ويطورها
لكن للأسف هذا الاسبوع جلست 4 ايام عشان تحفظ سورة قريش مو قادره
تحفظها تخييييييييييييييييييلوا !!
صرت اتعب معها وهي تتعب وتتذمر وتبكي
صارت تعجز عن حفظ اسهل الاشياء وادوخ وانا اكرر وتتذمر من التكرار وكل شوي
تقول صعب
قلت لها قولي سهل ويسهل اللي يقول صعب يصعب
وصارت تقول سهل سهل هههههه وتلقى نفسها ماتحفظ زي زمان وترجع تبكي
افلام الكرتون اثرت على قدراتها الذهنيه :|
ماني عارفه وش اسوي ! مهما احدد لها وقت لازم تسوي ازعاج ومناحه وتشوف
لها حيله او تجلس تسهر لان قلبها فيه شي وهو افلام الكرتون مثل العطشان
مايهدا الا لما يشرب
تجلس من الساعه 7 الصباح ومستعده تسهر لاخر الليل عشان تتابع
صرنا نشيل اسلاك التلفزيون ونشيل الايباد لكنها ماتنام الا بعد جهد جهيد
تشجيع بالهدايا اشجعها !
شريت لها سبوره خشبيه حقة الملاحضات وصرت اسوي لها جداول واحط لها
نجوم واعطيها بلونه كل ماكملت صف نجوم
شوي تهتم وشوي لا
عذرا على الاطاله لكن حبيت اشرح لكم كل شي بالتفصيل
انا شايفه ان الاطفال هم زينةالدنيا وفخر المستقبل والجيل الجديد فودي انها تكون
مثل مايحب الله واحب خصوصا ان الله اعطاها قدرات ومواهب ممتازه
احترت معها ابوها يداوم دوامين وهي والطفل الرضيع اللي ماكمل سنه لسه
بالتفصيل
انا مضطره اكون صاحيه من سته الصباح الى 8 عشان اجهزها وتروح الساعه 7
والساعه 8 افطر مع ابوها
مضطره اكون صاحيه من بدري ويكون الغدا جاهز على الساعه 1
واتغدى معهم
مضطره اعطيها راحه او اذاكر لها في العصر واسوي العشا من بدري يعني مافيه نوم
في العصر : )
صرت اتعشى معها من بدري واحيان انام بعد واحيان الصغير يخرب نومي واجلس معه
ويا اني انام
بدري معها واهمل علاقتي الزوجيه مع ابوها
او اني اسهر انتظره واتأخر عليها في الصباح
راح تقولوا اني اكون مع زوجي في النهار مو شرط الليل مو كل مره تضبط لان نظام الاطفال
انهم يصحون النهار وهو يتغدى وينام
وحرام كذا انا اضلم نفسي انا بشر ابي اخذ كفايتي من النوم والقى اوقات اختلي فيها
مع نفسي
ساعدوني انظم وقتي واشوف لمشكلة ادمانها لافلام الكرتون حل لاني تعبت !
من ذا الوضع والضغط ومن تدني مستوى حفظها
وعذرا على الاطاله مره ثانيه