السلام عليكم ورحمة الله وبركاته:

انا شاب عمري 22 و مليكتي عمرها 17,,,مشكلتي بالضبط في موضوع التفاهم,,,زوجتي صغيره بالسنه البيئه اللي كانت فيها منعزله يعني ما كان عندها جوال او لابتوب او اي من الاجهزه الالكترونيه فكانت اغلب وقتها بتنام او بتذاكر,,,السنه ذي صار عندها جوال وبدا ابوها يدلعها,,,المشكله بانها جدا هاديه ما تحب تظهر لاي شخص اي اهتمام حتى لو كانت بتحبه اصبحت تعشق شي اسمه نوم,,,ما تعرف تطبخ ولا تنظف ولا تغسل ولا تكوي ولا اي حاجه بس هذي ماهي مشكله كبيره بالنسبه ليا بتقدر تتعلم,,,المشكله اهلها قالولي البنت شاطره وعلمناها وفهمناها قيمة المذاكره والنجاح وانت فهمها عن الحياه والزواج والشغلات دي,,,المشكله في شغلات صعب انه انا اعلمها لازم امها تكون مسؤوله عن الشغلات ذي مو انا.... انا غيرت تعاملي معاها وبديت اسوي الشغلات اللي هيا تحبها واتجنب الشغلات اللي بتكرهها بس بحسها جد ع نياتها وما تعرف كيف تتعامل معايا بتستحي وبتضيع الحروف براسي الف سؤال وسؤال يدور براسي بعد اذنكم:

اولا للتنبيه انا ادرس بالخارج ومتعلم وفاهم فالشي ذا زاد من الحمل علي
ثانيا: انا قد زرت البنت 6 مرات تقريبا وقعدنا مع بعض ومتاكد انها بتحبني وانا بحبها

1- بحكم صغر سنها ايش افضل طريقه للتعامل معها؟
2- البنت بتكشف وانا بصراحه رجل متعود ان المراه اللي بتكون معي تكون مغطيه سواء امي او اخواتي او خالاتي او عماتي ولكن كيف اقدر اني اتصرف معاها بالحاله ذي وافهمها بحكم انها صغيره و عنيده وانا عارف ان الصياح عمره ماراح يجيب حل؟ هيا دائما بتحب تشوفني اغار عليها وتنبسط مع انه شي يرفع ضغطي ابغى افهمها انه ما ينفع الحركات ذي وانها لازم اقلها تحترمني ,,,استعملت معاها نفس اسلوبها وحصلتها بدات تغار وتزعل احيانا
3- البنت متصوره ان الحياه حلوه ومتوقعه انه بعد الزواج اي شي تطلبه حيجيها وما تفهم باي حاجه وجدا طيبه وعلى نياتها وحبوبه بس بنفس الوقت ما ابغاها تتعب وتمر بنفس المراحل اللي مريت فيها عشان تتعلم؟

4- كيف اقدر افتح موضوع الطبخ والتنظيف والكلام ذا بحكم اني بعيد عنها وبحكم اننا بعيدين عن بعض وعلاقتنا لسا في بدايتها واحيانا بيصير سوء تفاهم,,,بالنسبه ليا انا فاهم و مقدر وعارف اننا لازم نتجاوز عن بعض الزلات احيانا بس هيا ما في احد علمها اي شي عن الحياه؟

5- هل الفتاة بعد كتب الكتاب تحب انه الشاب دائما يكلمها ويسال عنها وكم مره باليوم يعني؟ انا لو بيدي اكلمها اغلب الوقت بس اشغالي ودراستها وفارق التوقيت بيننا بيحكمونا
6- اهم سؤال بالنسبه ليا(انا من الناس اكره الصياح والجدال لانه اسلوب جدا عقيم ويدل على ضعف الشخصيه ولكن احيانا بشوف بعض الحريم - المقربين لي- بيعتبروا الرجل الطيب و اللي بيتناقش مع زوجته او اللي يحترمها ويحترم مشاعرها بانه شخص ضعيف وبيصير تدخلات كثيره من اافراد العائله في حياة الزوجين وتبدا حرب اثبات الوجود بينهم)
7- متى اصبح جاد وحازم معاها ومتى اخف عليها ؟ يعني متى اثقل عليها ومتى اصير خروفها عااادي زوجتي
8- كيف اقدر افهمها عن الحياه الزوجيه وموضوع المشاركه والاهتمام والتنازلات وارضاء الاخر والاحترام والود والتقدير) على كلامها هيا ما تعرف شي في الامور ذي اهلها كانوا بس بيخلوها تذاكر او تنام او تطلع معاهم وقت ما يطلعوا
9- كيف اقدر اكسبها و اكسب ثقتها في الفتره ذي بحكم صغر سنها وانها لسا بفتره المراهقه؟

للمعلوميه باقي ع الزواج 6 اشهر بس احس انه يادوب بتقدر تتعلم وتفهم شغلات قبل الزواج انا مستعد اني اعلمها وافهمها بس الموضوع مو سهل انا ما اقدر اعلمها كل حاجه انا تعلمتها في حياتي في 6 شهور بس في اشياء تاخذ وقت طويل عشان تتاقلم معاه وعشان تبدا تتنازل عن بعض الصفات بس اهلها حطوني في موقف بايخ قدامها وهم يقولولي انتا علمها عن الحياه و الزواج ,,,فيه شغلات بتعرفوها بتخص الحريم وفيه شغلات المفروض ابوها و امها يعلموها ولكن الاثنين رموا بالمسؤوليه على راسي


اي نصائح اخرى منكم ويعطيكم العافيه