السلام عليكم ورحمة الله وبركاته ..

كتبت هذا الموضوع لعلي اجد احداً يشاركني همومي وينصحني ومر في تجربه مثل تجربتي,,,

تطلقت قبل سبعة شهور ,, الحمد لله على كل حال ..

قبل ثلاث سنوات مثل هالوقت ملجت ,, حبيت زوجي من كل قلبي وهو كذلك واكثر ,, كنا وايد نحب بعض ..
عقب شهرين من الملجة بدأ يتغير و ما يزورني وايد ويتهرب مني ,, عقبها بفتره قالي انا ماعرف شو فيني احساسي بدأ يتغير تجاهج واحس كنه في حد يلعب في مشاعري ,, وحلم احلام وكلها تفسيرها انه مسحور حسبنا الله ونعم الوكيل ,, حاول يتعالج وخف اللي فيه شوي ,, وهو اصر انه يسوي العرس ولو اني كنت اقول خلنا نأجل ,,

عرسنا وعشنا ايام مره كان ما يطيقني ويتعب اذا كنت عنده واذا خلاني يرتاح وكانت بيننا مشاكل على اشياء تافهه ,,لا تقولون اوهام لاني بعيوني كنت اشوف كيف يرجف ويتعب وقلبه يدق بسرعه وريوله ما يقدر يحركها ,, وكل حد شخص حالته بأنه مسحور,,

مرت الايام واغلب الايام كنت في بيت اهلي وفي نهاية الاسبوع مرات اشوفه ,, ومرات اكمل ثلاث اسابيع ماشوفه ,, كنت اتصل فيه واترجاه تعال بشوفك لو ساعه وهو يقول ماقدر انتي ماتفهمين وما تحسين فيني ,,

واحيانا كنت اتم عنده اسبوع وهو يضغط على نفسه ويتحمل كان قلبي يتقطع عليه لما اشوفه بهالحاله ,,

يوم كنت اشوفه يتألم كنت اقوله خلاص خلنا ننفصل عشان ترتاح وانا احبك ومابيك تتعب بسببي ,,

بهالفتره راح عند كذا راقي وحاول يتعالج بكل الطرق لكن سبحان الله ربي ما كتب له الشفاء ,,

وانا متأكده انه في داخله يحبني ,, ما كان يقدر يصرح بهالشي لكن افعاله تدل .. كان انسان طيب وقلبه أبيض ,, بالرغم من اللي فيه كان يساعدني في شغل البيت ولا عمره ضربني او صرخ علي,,

بعد سنتين من زواجنا كنت في بيت اهلي وكنت اكلمه جان يقولي انا تعبت ومابيدي شي اسويه وقال مابي اظلمج معاي وانا آسفه انتي طالق ,,

ماقدر اوصف لكم احساسي بنفس الوقت ,, صح اني كنت متوقعه ان حياتنا بتنتهي في يوم من الايام ,, لكن كانت صدمه لي لاني اموت فيه بشكل ما تتصورون..

لكن مع ذلك كنت امثل جدام اهلي اني قويه وهالشي ما أثر علي عشان هم ما يتضايقون

سرنا المحكمة عشان نثبت الطلاق.. وترجيته فالمحكمه يردني لذمته ويتزوج علي لكنه كانه ما رضى

خلصنا من المحكمة و لما رجعت البيت اتصل يصيح ويقول انا كيف طلقتج ,, وانا ما بحصل وحده مثلج وخسرتج ,,,

وكنت اكلمه في ايام العده مع علم اهلي طبعا ولانه هالشي جائز ,, وكان متقلب في رايه يوم يقول احبج ومابي اخليج ويوم يقول مابي اظلمج ,, ولين خلصت العدة وما ردني ,, والحمد لله على كل حال ,,

وانا الحين حالتي حاله بدونه احس اني مكسوره اشتاق له اتمنى اشوفه او اسمع صوته ماعرف كيف اوصل لكم احساسي
ومن يومين سمعت انه خطب ,, صحت وايد وحتى الحين وانا اكتب لكم اصيح ,, ما اتخيل الريال اللي حبيته يروح لحرمه غيري ,, طبعا هالشي من حقه وحلاله

الطلاق كسرني وايد صرت حزينه ومهمومه ,, الليل ما انام الا بدواء بندول نايت ,, صرت وايد افكر ,, نزل وزني اربع كيلوات .. صرت منعزلة ,, لكن مع ذلك ما اشتكي لحد وخصوصا امي حبيبتي مابيها تحزن ,,

حالي بعد الطلاق اللهم لك الحمد والشكر اهلي وايد يحبوني وما حسسوني بشي او بنقص بالعكس الحمد لله ,, ودخلت دار التحفيظ ,, لكن اجد صعوبه في الحفظ من كثر التفكير ,,ودوامي فالتحفيظ مجرد ساعتين ,,

اهلي ينصحوني اني اداوم واشغل وقتي ,,

انا ماعرف كيف اتغلب على مشاعري وانسى ,, احاول بس ماقدر ,, اتم اشوف صوره وابوس صوره واتخيله واسولف معاه ,, وعندي قميصه دوم احضنه ,, اعرف بتقولون هالشي غلط بس ماعرف شو اسوي

ساعدوني انصحوني والسموحة على الاطالة

تذكري قول ربنا
عسى ان تكرهوا شيئا ويجعل الله فيه خيرا كثيرا
عسى ان تكرهوا شيئا وهو خير لكم وعسى ان تحبوا شيئا وهو شر لكم
-وكل شيء مسطور