ساعدوا صديقتي واحده من اعز صديقاتي واختي واكتر من اختي

انا مابدخلش على النت الايام دي عشان الامتحانات ودخلت مخصوص عشانها

لانها مش عارفه تزاكر ولا عارفه تعمل حاجه ابدا ومفيش حد تتكلم معاه او تاخد

رأيه غيري لان الموضوع يعتبر عيب لو حد عرفه مشكلتها تبدأ من 6 سنوات

ايام كنا في الدراسه اول ما دخلنا المرحله الثانويه كانت الفصول عندنا مختلطه شباب

و بنات وكان معانا شاب صديقتي حبيته بجنون رغم انها ما تكلمتش معاه ولا اي

شيء بس سبحان الله حبيته وبدأ تتقرب منه و تتعرف عليه وطبعا دا باحترام وانا

عارفه من الاول ان احنا دوله مختلطه لكن انا عاوزه الحل المهم بقوا زمايل

وهي ماعرفتوش انها تحبه ولا اي شيء واليوم اللي ماكانش يجي المدرسه كان

يبقى يوم نكد علينا وماتخليش حد يكلمها كأن حد عاملها سحر وفي يوم واحده

صديقتنا الله يهديها راحت قالتله فلانه تحبك قالها خلاص اوكي وطبعا من غير

ما المسكينه تعرف ورجعت وقالت لصديقتي انها قالتله وهو ما قالش حاجه

كانت يومها البنت هتموت فيها من كتر البكاء كانت مصدومه و راحت للشاب

واعتذرتله وهو ابتسم وقالها مفيش مشكله وبس ومن يومها هي بقت تحاول

تتجنبه حتى هو كمان و ما يتكلموش الا قليل او نادر وحست انه دايما

يتحاشى الكلام معاها فقالتلي انها هتقوله ان دا اخر يوم هتكلمه فيه لانها

حاسه انه مش عاوز يكلمها و هتقوله انها اكتشفت انها تحب واحد تاني

والمهم انا وافقتها الرأي وشجعتها لانها كانت تعبانه جدا واعترف ان دا ما

كانش لازم يحصل المهم راحت و قالتله الكلام دا وكان رد فعله نفس رد

فعله الاول بس ابتسم وماتكلمش المهم وفاتت السنه الاولى وجت السنه

التانيه والبنت ما تتكلمش وتقولي انها لسه تحبه وهو كان دايما يبصلها

وهي تقولي معرفش ليه دايما يبصلي كأنه لا عاوز يحبني ولا عاوزني

ابعد عنه وانساه وفي يوم كانت يتكلم مع واحده ويسلم عليها وهي كانت

واقفه فسلم عليها واتكلم معاها مده فحال البنت اتقلب من جديد والحب

اللي كانت تخبيه جواها رجع ظهر تاني من جديد والمهم رجعوا يتكلموا

من تاني بس مش زي الاول وكان لنا واحده صاحبتنا عامله عيد ميلادها

وعازمه في عيد ميلادها زمايلنا من الشباب فقالتلها تعزمه و عزمته

قالها ربنا يسهل ويوم عيد الميلاد واحد من اصحابه ضغط عليه عشان يجي

ولما جا عيد الميلاد كان متدايق وتجاهلها وكل ما تحاول تتكلم معاه يتهرب

منها وبعدين قالها اقدر امشي قالتله خلاص مع السلامه وبعدها راحت

جلست بعيد عنا وبكت بدل الدموع دم وتقول ليه هو يعمل معايا كدا وكلنا

حاولنا نهدي فيها ونصحناها انها تبعد عنه و فضلت حاولي 3 شهور ما تكلموش

واحنا كمان قاطعناه عشانها لكن هي قالتلي انها هتعمل حاجه وانا حاولت امنعها

لكن هي رفضت وكانت عارفه انه بيدخل على شات معين وعارفه الاسم اللي بيدخل

به فدخلت على نفس الشات وتكلمت معاه واتكلم معاها و عرفته على نفسها بشخصيه

تانيه وفهمته انها من مدينه تانيه غير اللي عايشين فيها واسم تاني وكانوا يتكلموا

مع بعض كل يوم وقالها انه يحبها و كل دا ما يعرفش انها هي وقالتله انها كمان

تحبه وكان يكلمها في التليفوون وهو كان شايف نفسه شويه لان كان فيه كتير يحبوه

معانا ولانه وسيم جدا

والبنت ماشاء الله عليها حلوه جدا وكتير كان يقولولها انه يشبهلها وانهم فكروهم

قرايب , ومحدش يعرف انها بتكلمه غيري بالاضافه انه قاطع اي واحده كان يكلمها

في المدرسه لانها طلبت منه كدا وقالهم انه يحب واحده وحتى فيه واحد قريبه

قالي انه بيكلم واحده على النت وبيحبها جدا جدا وبعد كدا انا نصحتها انها تعترفله

بكل حاجه وفي يوم كنا في النادي وكان هو ماشي من قدامنا ففجأه نادتله و

قالتله على كل حاجه وكا كل مره ابتسم و قالها عارف قالتله لا ما كنتش

عارف قالها كنت شاكك وخلاص اتأكدت قالتله مش زعلان قالها لا حصل خير

و بقوا يتكلموا عادي كأنهم زمايل بس الفرق انه كان يسمع كلامها في يوم دخل

يتخانق قالتله ما تتخانقش قالها ما تخافيش , يكون ماشي تقوله تعالى اقولك حاجه

يجي يكلمها على طول اي واحده تانيه تناديله يقولها لا تعالي انت, و في يوم قالتلي

انها هتكلمه لاخر مره و راحت كلمته

و قالتله انها مستعده تستناه لو هو بيحبها , تستنى او لا قالها لا , وكان في ناس تانيه

من اصحابنا

عرفوا على موضوع النت وهي فهمتهم انه بيكلمها و بيحبها و بتحبه عشان ما

يقفوش معاه لانها كانت تغير عليه جدا وكل دا وهو مايعرفش وبعد ما قالها انها

ما تستنهوش قالتلهم ان هما سابوا بعض خلاااص و بعد كدا قالتلهم انه ماكانش

في اي حاجه بينهم وانها معدتش بتحبه و قالتلي انا كمان انها معدتش بتحبه فراحت

نفس البنت اللي قالتله اول مره ان صاحبتي تحبه قالتله على انها قالتلهم انهم بيكلموا

بعض ولما عرف اتدايق جدا جدا ووصلها كدا لكن هي مااهتمتش ولا اعتذرت

ولا اي حاجه و قالتلي انه ما يهمهاش في حاجه و بعد كدا دخلنا الجامعه و دخل معانا

نفس الجامعه وكانت تلاحظ برضه انه يرجع يبصلها لكنها مااهتمتش وقالتلي انها

نسيته خالص وفي يوم كنت ماشيه معاها وجا وسلم عليها وانا لاحظت ان وجهها

تغير فسألتها انت لسه تحبيه قالتلي لا و بعدها كانت تتجنبه وما تكلموش ولا هو

وبعد سنه اتقدملها شاب عشان يخطبها وكان يحبها جدا وقالتلي انها مرتحاله

ووافقت عليه و الشاب اللي كانت تحبه بعتلها مع اخته يقولها مبروك قالتلها

قوليله الله يبارك فيك وعقباله ان شاء الله وفات على خطوبتها الوقت سنتين

ومن شهر تقريبا سمعت ان الشاب اللي كانت تحبه ارتبط بواحده مش خطبها

بس ارتبط بها في الجامعه يعني ويوم قلتلها ابتسمت وسكتت وقالتلي اكيد

كان هيرتبط في يوم وماحستش انها اتدايقت او اي حاجه ومن اسبوع كان

عندنا درس وهو حضر معانا الدرس دا واول ما شافته لاقيت وجهها بقى

ميت لون قلتلها يا فلانه انت لسه تحبيه قالتلي معرفش انا اتصدمت قلتلها

يعني ايه ما تعرفيش قالتلي معرفش بس لما بشوفه بحس اني بحنله تاني

وبفتكر كل الايام و الزكريات اللي فاتت قلتلها وخطيبك قالتلي انها تحبه

لانه خطيبها و طيب وخلوق ويحبها جدا واحيانا تحس انها تحبه جدا وماتقدرش تعيش

بدونه واحيانا تحس انها متدايقه منه بدون سبب بس هما دايما يتخانقوا و تكون

الخناقه بسببها ومن يوم ما شافته وهي تبكي وتقولي انها مشتته

ومش عارفه تعمل ايه وبتفكر انها تسيب خطيبها حتى لو مارجعتش للي

كانت بتحبه لكنها تحس انها كل حياتها عملتها بتسرع و تقولي انها

ندمانه على كل حياتها اللي فاتت لانها ما استخدمتش عقلها في اي

حاجه خالص وبرضه خايفه انه يكون اسمها مطلقه وعمرها لسه 20

وتقول ان قلبها زي كاسة المويه اللي ملتها بمويه جديده من قبل ما تتخلص

نهائي من القديمه ومش بتزاكر واحنا عندنا امتحانا انصحوني اقولها ايه

تسيب خطيبها ولا لا لانها مش بتأمن لحد غيري ولو حد عرف اكيد هتبقى مشكله

وهتواجه مشاكل مع اهلها انصحوني تعمل ايه

السلام عليكم

اختي العزيزة اول حاجة عايزة اقول لصاحبتك انها غلطانة ..
هي حاليا مرتبطة ومخطوبة وخطيبها بيحبها وزي ماقلتي هو انسان طيب اذا هي عايزة ايه اكتر من كدة ليه عايزة تفكك الارتباط ده وهي متاكدة انها مستحيل ترجع لحبيبها الاول ..
وعلى فكرة هي مكانتش بتحب لانها كانت لسه في الثانوية وزي ماقالت هي بنفسها انها مستخدمتش عقلها خالص والحب الحقيقي هو بالقلب والعقل وليس بالقلب فقط
اتمنى انك تفهميها كل الحاجات دي وعرفيها ان بالنسبة انها بقت بتحن اليه لما تشوفه ده بس بسبب الذكريات القديمة ليس اكثر
انا متفهمة شعورها جدا وفاهمة الى بتمر بيه لكن
اختي انصحيها انها متفكرش بالانسان ده تاني وخليها تشوف حياتها مع خطيبها وتستقر عاطفيا
هو كمان ارتبط بانسانة تانية وهو كان واضح من الاول انه مكانش بيحبها لذلك لازم تفكر وتبدا حياتها من جديد انا مش هقلها تنسى الماضي لكن تخليه مجرد ذكرى وتجربة وعدت وكل انسان بيمر بالتجارب المهم هي تفهم بعد كدة وتستفيد من التجربة دي وتعرف انها كانت فترة وعدت دلوقتي هي انسانة ناضجة .
وكلمة اخيرة حبي خطيبك ولا تفكري بالانفصال عنه بدام هو بيحبك وبيقدرك
وربنا يوفقكم

اختك نور حياتي

__________________

شكرا نور حياتي على المرور والله يجزاك كل خير

وانت فعلا عندك حق واكيد هو ما يحبهاوهو ما خطب هو تعرف على واحده في الجامعه ودخلوا في علاقة حب وانا لم قلت لها انه ارتبط قالت اكيد كان لازم يرتبط بعد ما حس انه لما دخل الجامعه كل معجبيه اللي كانوا حوله بعدوا عنه بما فيهم انا وتقولي يمكن لو كنت صبرت عليه شويه بعد الجامه كان عرف ان مفيش حد قريب منه غيري وكان عرف قيمة حبي له وقدرها وارتبط بها وتقولي انا متأكده انه مش راح يكمل مع البنت دي لاني اعرف شخصيته

وانا في رأي ومن حسب كلامها هي ما بتحبه هي بتحب الزكريات وايام الدراسه الللي الكل يحن لها وهو مجرد وسيله يزكرها بالماضي لان يمكن قصتها معه اكثر قصه حصلت لها فترة الدراسه اثرت فيها وتركت بصمه قويه في داخلها واكيد غرورها كأنثى مانعها انها تتقبل فكرة ان الشخص اللي حبته ورغبت به بقوه هو الشخص الوحيد اللي رفضها وهي اللي بكى عشانها كتير فيمكن تعيش صراع داخلي مع النفس والصراع دا ما بيحصلش الا لما تشوفه لانها تقول انها كل ما تحاول تنسى الماضي تشوفه تتزكر كل االلي تحاول تنساه هي تحاول تثبت ذاتها لان رفض الشاب دا لها زعزع ثقتها بنفسها بدليل كل ما تبعد عنه واحس انها فعلا نسيته ترجع له من جديد يمكن يكون تغير ويمكن لو تقبلها هي تبعد عنه بعد ما تتحقق اللي عوزاه واكيد هي تحب خطيبها الا ما كانت كملت معه سنتين وللعلم هو طلب انه يعقد قرانه عليها واهلها كانوا مترددين وهي اللي الحت عليهم تقول عشان ما تحسش بالذنب لما تقعد معه وتتكلم معه بالاضافه انها حاسه احساس بالذنب وتقولي انها حاسه بالذنب ناحية خطيبها اللي يخلص لها وهي مش قادره تخلص له تمام الاخلاص تقول ان مجرد تفكيرها في الشخص دا تحس انه خيانه لخطيبها عشان كدا فكرت تترك خطيبها عشان تريح نفسها وما تحسش انها تخونه

وهي عندا مشكله تانيه قويه هي انها تحب الحياه جدا بكل ما فيها وتقولي انا احب اعيش حياتي حره من دون ما اي شخص يتحكم فيا او اكون مربوطه بشخص ومسئوله عنه تقولي ليه ما اعيش حره دام انا مش بغلط وغير كدا تقولي انها هي و خطيبها دايم يتخانقوا وهي ما تحبش النكد والمشاكل وتحاول تقفل النقاش وهو يصر انه يتناقش يقولها عشان ما نواجهش المشاكل دي تاني بعد كدا وتقولي معظم الوقت اكون انا غلطانه لكن كبريائي يمنعني اني اعترف بكدا وهو ملاحظ فيها الشيئ دا ومدايقه كتير

ومشكلتها التانيه الاشخاص اللي حولها دايما يمدحوا فيها لازم كل مره تروح الجامعه تسمع عبارات المدح والاطراء على جمالها واناقتها وكل شيئ دا غير المعاكسات اللي تواجهها ودا يخليها تزيد اعتزاز بنفسها وتحس انها ربطت نفسها بخطوبه بدري وبخليها تزيد قهر من الشاب اللي كانت تحبه لان الجميع لاحظ فيها كل الصفات الا هو

وللامانه البنت كتير طيبه وشخصية مرحه وحلوه واجتماعيها لكن كتير معتزه بنفسها وشايفه حالها ودام كل اللي حولها كدا اكيد هتفضل طول عمرها كدا بالاضافه انها ما تتقبل النقد من اي شخص حتى من خطيبها تعصب عليه وتقوله انا واثقه من نفسي وعاجبني حالي شوف نفسك اول

ومعلومه تانيه اذاقارنه بين الشاب اللي كانت تحبه وبين خطيبها فكفة خطيبها ارجح من حيث المستوى المادي و الاجتماعي والعلمي وحتى في الشكل خطيبها ماشاء الله عليه والله كتير يحسدوها عليه
وحتى الاخلاق عمره ما عرف واحده لانه كان بيحبها جدا ومستنيها تدخل الجامعه لكن دايما الممنوع مرغوب

نظرا لأن المشكلة جذرية , وحلها يحتاج حل مشاكل مبنيه عليها , فالمشكل الرئيسية هي الإختلاط والحجاب واطلاق البصر والخلوه ومن ثم نتستطيع حل مشكلة صديقتك , أما غير ذلك , مستحيل ,,,

__________________

قال ابن الجوزي لأهل زمانه :
أيها الناس ..
لقد دارت رحى الحرب ، و نادى منادي الجهاد ، و تفتحت أبواب السماء ، فإن لم تكونوا من فرسان الحرب ،
فافسحوا الطريق للنساء، يدرنَ رحاها ، و اذهبوا و خذوا المجامر والمكاحل يا نساء بعمائم و لحى .

جمر شكرا على المرور رغم انك لم تطرح حل
ولكن على مااعتقد انك لم تفهم(ي) المشكله جيدا
فأنا اتكلم عن مشكلة فرد في مجتمع وانت تتكلم(ي) عن مشكلة مجتمع بأكمله
لا انا ولا صديقتي نستطبع ان نغيره واعتقد ان مجتمعنا مليئ بالكثير من الفتيات لم يمروا بتكلك المشكله
انا اعتقد انها مشكلة شخص وليس مجتمع
اعتقد ان هناك من المجتمعات المحافظه ممكن ان تحب الفتاه شخص دون ان تتحدث معه ولا يشعر بها وتتزوج بغيره و يظل حبه في قلبها والاسلام لم يحرم الحب انما حرم ممارسة الشعور بالحب خارج نطاق الشرع والحلال
مع خالص احترامي لرأيك ولمرورك الكريم

سبحان الله يعني كل دا عدد قراءات و واحده بس هي اللي ردت عليا بحل
انا سجلت هنا عشان قلت اكيد سأجد ان شاء الله الحل هنا

أختي العزيزة الأميرة الحالمة

مشكلة صديقتك مشكلة تشبه مشكلة صديق لي تقريبا

وسأرد عليكي وأقول

إنك تنصحي صديقتك بأن تخلص لخطيبها اللي بيحبها وتبعد عن فكرها هذا الإنسان الذي أحبته

لأن هذا الإنسان إذا كان فعلا عنده مشاعر وأحاسيس وأحبها كان اتقدم لها وارتبط بها

أنا سأرد عليكي كشاب وأقول أن الشاب حين يعرف أن هناك من تحبه جدا وهو لا يحبها ، يحاول بكل الطرق تجاهلها ويتمنى أن يأخذها القدر بعيدا عنه تماما ويتمنى أنه ما كان قابلها من أساسه .

وعارفة كمان إن طاوعها في هذا الحب وهو لا يحبها أصلا .. سوف يلعب بمشاعرها ويتسلى فترة وبعد كده يرميها ويشوف غيرها

* قولي لها إن الإنسان اللي بيحب واحد وهو لا يحبه إنسان ليس عنده كرامه إذا استمر في التمسك بتذكر هذا الحب

* قولي لها أن الله حين يعطي للإنسانة نعمة كخطيبها الذي يحبها ويتفانى في حبها وترد هي على هذه النعمة بأنها تنكد عليه وتتجاهله وتعتبره كما استنتجت مجرد ( خطيب أو عريس ) وسوف يتزوجها .. فسوف يعاقبها الله بزوال هذه النعمة من يدها

فالنعمة لا تزول من يد ابن آدم إلا حين يتبتر عليها وينكرها ويفرّط فيها .

* قولى لها أن تتفانى في إسعاد خطيبها ولا تزعله ولا تنكد عليه وسوف ترى السعادة بعينها وترى أن الله عوضها خيرا بزوج يحاول بكل ما يملك إسعاد من يحبها

يارب أكون قد وفقني الله في إبداء راي ونصيحة تنفع صديقتك وتريحها

أدعو لها الله أن يهدي قلبها ويهدي قلب صديقى الذي تشبه قصته قصة خطيب صديقتك

قولى آمين

أخوك تامر تيتو

تامر تيتو اشكرك اخي جزيل الشكر على التكرم بابداء رأيك واعطاء النصيه
وبالفعل لديك حق في كل ما قلت وانا متأكده بأن خطيبها اذا تركها ستدوخ ورائه
وتشعر بحبه لها ولكنها تظل طبيعيه حتى ترى هذا الشاب اشعر ان حالها ينقلب
خصوصا في هيذه الايام حيث تراه يوميا في الجامعه بسبب الامتحانات واحاول ان
اراقب ردات افعالها فأراها احيانا تحاول اختلاس النظرات اليه والحزن على وجهها
ولكنها لا تحاول ان تظهر له ذلك تماما بل تتجاهله ولا تتقرب منه ولا تحاول
الحديث معه تقولي انا لا استطيع ان اجعل خطيبي يبدو بصوره غير جيده اذا شك هذه الشاب بأنه من الممكن ان يكون بداخلي شيئ
اتجاهه ولكنها مصمم بأن ما لديها اتجاهه ليس حب تقول لي انه كبرياء الماضي لانه رفضني يوما ما ولا استطع تحمل ذلك
ومن ناحيته هو الاحظ انها عندما كانت تحبه كان يتجاهلها والان عندما تجاهلته تماما يحاول ان يلفت نظرها بشتى الطرق
واليوم عندما كنا نسير في الجامعه كان يسير مع اصدقائه ورائنا واخذ يصفر بصوت خفيف فنظرت ورائها فوجدته فأدارت وجهها
سريعا تقول لي انها تفرح عندما تشعر انه يحاول ان يلفت انتباهها وهي تتجاهله ولكنها تقول انها احيانا تشعر انها تريد ان تتكلم
معه و تسأله عن اخباره فالاحظ ان كل افكارها متضاربه وكل مشاعرها ايضا متضاربه
اشعر انها من كتر ما تكلمني في هذا الامر سأحب انا هذا الشاب في النهايه حتى اريحها <<<<<<<<<< امزح
شكرا لك مره اخرى على رأيك وربنا يوفق صديقك وصديقتي ويهدي قلبهما الى ما يحب الله ويرضى

اختى العزيزه اخبرى صديقتك ان كل هذا الحنين والشوق لزكريات الماضى سوف تنتهى باذن الله لما تتجوز 00وبما انك بتقولى ان خطيبها بيحبها وهو انسان طيب يبقى مش هيكون صعب انه ينسيها الماضى ومع مرور الوقت هتفتكر كل الزكريات ده وتضحك عليها 000لان مع مرور الوقت هتندمج فى حياتها مع زوجها وان شاء الله اولادها وهتنسى كل الامور ده 000المهم الان انها تطلع كل الافكار من عقلها وماتفكرش فى اى شىء الا الدراسه عشان تدخل الامتحان وهى صافية الذهن حاولى تخليها تندمج اكثر مع خطيبها وتنظر له بنظره جديده نظره كلها حب تنظر لكل صفاته الحلوه وتركز عليها ودايما تقول لنفسها انه انسان رائع وان شاء الله كل شىء هيتغير

قرأت مشكلة صديقتك وتأثرت بها جدا..

أنا رأيي صاحبتك ما تفسخش الخطوبه.. على الاقل تستنى شويه بعد الامتحانات..

وبعدين تبدأ تفكر بعقل وتروي..

هل لو فسخت خطوبتها .. حبيبها هيتقدم لها؟.. هل هو أصلا بيبادلها الحب؟..

لازم تسأل نفسها السؤال ده .. وتقتنع باجابته ..

أنا من رأيي أن الشاب لا يريد أن يرتبط الان.. ومش معقوله صاحبتك تفسخ خطوبتها عشان أوهام.. وعشان حاجه هيا مش ضمناها..

قوليلها كده.. انتي ضامنه لما تفسخي خطوبتك .. ان حبيبك هيتقدم لك؟؟ وحتى لو ما تقدمش .. هل هتكون سعيده ومرتاحه بقرار

فسخ الخطوبه؟

لو خطيبها ده انسان كويس وبيحبها.. لازم تتمسك بيه.. لأن صعب الواحد يلاقي حد بيحبه حب حقيقي في الزمن ده..

فيه حكمه انا مقتنعه بيها وهي : ( اتجوزي اللي بيحبك مش اللي بتحبيه .! )..

بس هرجع وأقول .. تأجل التفكير في الموضوع ده لبعد الامتحانات.. والدنيا مش هتطير..

تمنياتي لصديقتك بالتوفيق وباتخاذ القرار الصحيح..

وياريت تطمنينا عليها..

قلبي معاها ومعاكي..

الى اللقاء..