السلام عليكم اخواتي
بصراحه انا عضوه جديده بالمنتدى من فتره اشتركت فيه لكن بس كنت اقرأ مواضيعكم .. وبصراحه لفتني جداا وعجبني حبكم لبعض واهتمامكم بمشاكل بعض .. عشان كدا مااترددت اكتبلكم مشكلتي عشان متأكدة انكم راح تساعدوني ..
انا زي اي بنت في المنتدى اتمنى ربنا يرزقني بزوج وكنت ادعو ربنا ليل ونهار انو يرزقني .. وفي يوم من الايام احسيت انو ربنا استجاب لي وتقدمو ناس وخطبوني وكنت حأطير من الفرحه ومني مصدقه مع اني كنت مترددة شويه بس صليت الاستخاره مرره كتير وبصراحه بعد ماشفت العريس ارتحت وقبل ماشوفه شفت امو بصراحه مره كانت طيبه وعسل وحسيتها مرره حبتني هدا ريحني اكتر .. المهم وبعدها بكم يوم صارت قراية الفاتحه وانا من قبلها متفقه مع اهلي اني مابغا اعمل ملكة غير من بعد شهر من قراية الفاتحه عشان ابغا اكلم الولد واعرف شخصيتو وتفكيرو قبل الملكة وهما وافقوني على دا الشي .. وبعدها اتكلمنا لمدة شهر وبصراحه مرره ارتحتله اكتر وعجبتني شخصيتو تفكيرو وبصراحة بدأ اتعلقت بيه وبدأت احبو وهو كمان كان يقولي نفس الشي انو بيبادلني نفس الشعور والي خلاني ارتاح معاه اكتر انو امو مره طيبه ومره حبتني .. وبعد شهر ونص طلبو مني اهلي انو لازم خلاص نعمل الملكة .. فكلمتو وقلتلو اهلي خلاص يبغونا نعمل الملكة حسيتو بدأ يتهرب ويتعذر بأي شي .. لمن لقيت الموضوع كدا كلمت اخويا وخليتو يكلمو ولما كلمو قالو بصراحه انا ماعندي فلوس دحين استنو عليا على الاقل اسبوعين وادبر الفلوس ونعمل الملكه .. وجا قلي انا نفس الشي انا بصراحه ماقلت شي وقلت اوكي نستنا ماعندي مانع لانو بصراحه كنت متعلقه بيه .. وبعد كدا خلاص انا مستنية على بالي هوا بيدبر موضوع الفلوس .. بعدها بكم يوم جا قلي بصراحه انا محا اقدر اعمل الملكة قلتلو ليش ؟؟ قالي العمل الزموني اني لازم اسافر 7 شهور برا البلد ومحا اقدر اعمل الملكة دحين وفي نفس الوقت محا اقدر اعلقك معايا بس خطوبه لحد دا كلو انتي بنت وحرام اعلقك معايا لازم ننهي كل شي.. بصراحه انا ماكنت رافضه اني استناه ال 7 شهور بس مجرد خطوبه لانو والله اتعلقت فيه وماتخيلت انو حيجي يوم والموضوع محا يسير ..لكن المشكله لما جا وكلم ابويا.. ابويا رفض قالو لأ محا ينفع تتعلقو كدا ..انت سافر ودبر نفسك ولمن ترجع اذا فيه نصيب تعال اتقدم تاني وربنا يكتب الي فيه الخير.. وهوا وافق
بس المشكله مو هنا المشكله انا اتعلقت بيه مررره والله .. ومره نفسيتي تعبانه انو بعدنا وحسيت انو الحلم الي من زمان مستنيتو انو ربنا يرزقني بعريس كويس وامو تكون كويسه كدا راح بسهوله .. والمشكله انو هوا يبغاني اكلمو من ورا اهلي ويقولي انو الي بيننا ما انتهى بس متوقف ليش ماتكلمني ومحسسني اني انا بعته وماابغا اكلمو .. لكن لمن سألت اخواتي واخويا قالي لا طبعا خلاص ماينفع تكلميه ... والله انا مره نفسيتي تعبانه انا مره متعلقه بيه وطول الوقت افكر فيه .. قولولي اش الحل ؟؟ انا بعض الاحيان احس انو هوا باعني بسهوله ..وهل غلط اني انا كلمتو من قراية الفاتحه؟؟وبنفع اكلمو واستمر معاه من وراه اهلي ولا لا؟؟واذا جا اتقدم تاني اوافق عليه ولا ماينفع؟؟
الله يخليكم لا تهملوي موضوعي ابغا أرائكم