مشكلتي مع زوجي أهو سحر أم سوء فهم أرجوكم دلوني على الطريق
أنـــا متزوجه لي 5 اشهر ...
منذ 17 ذي القعده إلى يومنا ذا عند اهلي ..
زوجي طيب معي وحنون بس مشاكلي معه تترتب بالتالي:
1- احس كثير أنه ينقل الي يصير ببيتي عند امه والسبب انه يكلمها يوميا مرتين باليوم طبعا هي ساكنه بعيد عنا بس انه لدرجة مره دخل عندي البيت وقال كيف تعزمين (فلانه)امي ماتحبها بجد يومها انقهرت وتاكدت انه علم امه ولا وش دراه عن الحرمه وان امه تكرهها
2-انا حسيت بتأثيرات بحياتي واحلام تنغص علي نومي (اتحلم بكلاب وقطاوه ببتي وكثير اتحلم اني اطيح)لدرجة اني اتخيل ان في ناس تمشي بالبيت .. غير كذا نمل ونامس بكثرة ببيتي وماتقرص الا انا ...طبعا كنت عند اهلي وامي كانت تلاحظ علي وبدات تقرأ بنهايه جبت الشيخ وقرا علي وقال البنت فيها سحر ...طبعا انا ذكرت للشيخ اني تحلمت قبل زواجي بأمرأة هي وابنها ثاني يوم من حلمي رأيت هذه المرأة وكانت نفسها بالحلم طبعا الشيخ قال هذي رؤيا وليست حلم وهذي تحذيريه ..طبعا المرأة هذي تصير زوجة اخو زوجي ..قلت له وجا وتكلم مع الشيخ وبنهايه قال انتي مريضه نفسيا ويبيلك علاج نفسي وهذا موب سحر .. طبعا بجد زعلت كان كل همه ان امه وخواته مايصير لهم شي ..طبعا حاولت معه ونبهته مايعلم احد ولكن اكتشتفت انه علم واحد من اخوانه وانا متاكده انه علم امه المهم اني انقهرت من اسلوبه والمشكله انه حلف انه ماعلم احد وهو علم ..
طبعا الشيخ حاول يوصل له معلومه ان السحر مأكول وان لازم البنت تتعالج ولازم انت بعد اقرأ عليك طبعا زوجي رفض وقال كيف مسحوره وهي تحب تنام معي ومااختلف فينا شي ...
المهم اني قلت زيارتي بتكون لبيت اخوك بحدود قال موب انتي الي تتحكمين وهذا بيت اخوي.
3-زوجي كثير يقول امي وخواتي بيعيشوون معي انا بجيبهم ببيتي ..لو يجوون ماتروحين ماتجين ..جوالك بفصله وبخليه سوا مانتي احسن من امي وخواتي... وقبل اسبوع دق علي وقال لاتكلمين بيت عمي ولابناته لان في مشكله والله قالها لي بأسلوب مو حلو انا قلت له معليش مااقدر اقطع الا واعرف السبب يعني ماحنا صغار وغير كذا علاقتي معهم قوية ..بعد فتره عرفت من بنت عمه ان المشكلة ان اخته تكلمت على بنت عمه وعمه زعل من اخته فأخته زعلت من اهل عمها ..يعني اقطع عشان اخته ترضى ..يقول لازم الوحده ترضي اهل زوجها لو بالحق او بالباطل...وربي انقهرت
4- زوجي مايحب يوديني لعيال عمي او اهلي يقول موب واجب علي اوديك ..طبعا هو اهم شي عنده اخوانه اروح لهم غصب عني سواء راضيه او لا ..
المهم قعد مع ابوي وابوي حاول يفهمه ابوي ان صلة الاقارب لازم والواحد ماله الا اهله...وعن مشاكلنا..الزبده قال لابوي البنت بتشفى من سحرها يوم تنقل من البيت لانها مو مرتاحه يعني اني اتميرض عشان ماارجع البيت(حسبي الله ونعم الوكيل)
طبعا ابوي قعد معه 3 ساعات ويوم طلع قال ابوكي يهدد والله ماحد يمشيني وصرخ علي
بعد اسبوع كلم زوجي اخوي وقاله (اني ابي اختكم والله احبها وابيها ترجع البيت وحشتني ..وانا مشكلتي معها انها تعاند وبس)
طبعا اخوي قعدني معه وطبعا كل مااقول شي هو ساكت ومانطق ولابشي يعني انه مسكين المهم ابوي يقول ان الولد مراح يتغير وهذا ولد امه..
بنهايه انا بجد احبه ..وابوي قال الاثنين بجتمع معه ومعك ونشوف هل بيتغير وجا ابوي قال لا بعد اسبوعين..
المهم يااخوان وياخواتي تكفون ساعدوني وش اسوي وش الدبره تتوقعون زوجي بيتغير ولا لا ..
هو يتصل علي ويقول انه مشتاق لي وانه تعبان وانه يبي حقوقه الزوجية ولابيسويها بالحرام وانا السبب ويقول انك طالما عند اهلك فأنتي ملعونه لان زوجك موب راضي عليك..
تم إجراء تعديل بسيط على العنوان
الإشراف
التعديل الأخير تم بواسطة cutiepie ; 04-01-2009 الساعة 10:02 PM
04-01-2009, 09:17 PM
ضوابط المشاركة
العرض الشجري