السلام عليكم

كنت ناوية انام بس حسيت بضيقه وكتمه بصدري ما قدرت وفجأة دموعي نزلت وصرت ابكي وزوجي لاحظ هالشي و سالني من ضايقك او احد كلمك او احد سوى لك بس مافيه شي هي بس كتمة بصدري وطلعت بدموع..

بصراحة احس نفسي محطمة نفسيا او فاشلة في حياتي .. احس نفسي مثل التايهه ودايما اشرد ..ومالي شخصيه .. ابرر هالشي بعصبيتي .. والله مرات افكر اروح لدكتور نفساني لاني تعبت من اللي انا فيه ..

في مواقف بحياتي ما انساها وكل ما اتذكرها ابكي مثل الاطفال ..

لما كنت بالثانوية العامة وكنت وقتها مركزه على نفسي بالدراسة امي طلبت مني مساعدتها في شي ما كان ضروري بس قلت لها ابي ادرس مع اني اساعدها ما اخليها بس وقتها كنت ابي ادرس قالت لي " اللي يدري الحين بتطلع الاولى على المدرسة مثل كل مرة يعني معروفة " وتشتت التفكير من مخي وتحطمت نفسيتي وثقتي بنفسي راحت بس الحمدلله تفوقت على هالشي ونجحت
..

مرة من فترة طويلة يعني كنت مسافره مع امي وخالي وكانت معانا اختي الصغيرة وبطبعي كنت اشوف البنات اللي في سني كنت اروح اسولف معاهم كنت وقتها بعمر 16 واختي الصغيره بعمر السنة .. كانت تحملني مسؤوليتها كانها بنتي مو بنتها .. وفي يوم قالت لي " انا جبتك معانا عشان تصيري خدامة لي ولبنتي مو عشان تسولفين مع البنات " والله حسيت كلمة خدامة مثل الخنجر اللي بصدري و صرت ابكي يومها بدون شعور وخالي شافني وسالني بس كنت اناظر امي واقول له مافي شي بس متضايقه وامي بعدين قامت ترضيني بفلوس ووطلعات !! ما افتكرت في نفسيتي وقتها ..


ومواقف كثيرة اثرت سلبيا علي مثل التراكمات من الماضي اثرت علي الحين ..

والحين تزوجت بس للحين امي اذا تبي شي تتصل فيني وطبعا انا مستحيل ارفض لها طلب بس ماتقدر اني لي حياتي الخاصه وزوج ومسؤولية جديدة وانا ادوس على نفسي عشانها

مرات اقول صج يما انا خدامة !!

بعد ما تخرجت من الثانوية ودخلت الجامعه فرحت كثير وقلت ربي عوضني والنعم بالله .. ودرست سنتين ونصف وكانت تلح علي بالزواج وكاني عانس !! لين ما تقدم لي زوجي واخذته بالحاح منها .. وقتها انا فصلوني من الجامعه .. بس ما قدرت اقول حق اهلي ولا حق زوجي ووقفت لاني عارفه اكمل دراستي ولا ني عارفه اسوي شي .. ما عندي قدرة اقول لهم .. احس شخصيتي ضعيفه والله اشوف ناس ما يهمهم هالسوالف وعادي عندهم اللي يصير يصير وانا مكبره الموضوع مليون مرة ..


ساعدوني .. كيف ابدا اعيش حياتي احس نفسي مثل الغرقانه !! مو عارفه وين اروح والا وش اسوي !!


زوجي مايدري عن هذا كله ..

__________________

	ادعوا لي ان الله يرزقني بالذرية الصالحة

مافي شئ في الدنيا يستاهل الي انت قاعده تسويه في نفسك مع احترامي الشديد حتى امك انا ماقول عقيها او لاتبريها لكن ابدا ماتخليها تاثر على حياتك وعلاقاتك بزوجك انت علاجك بيدك هذي الامور انت الي لازم تتغلبي عليها ان الله لايغير مابقوم حتى يغيروا مابأنفسهم الشئ الي تحسيه بيضرك او بيضايق زوجك وياثر على حياتكم قولي لها معليش ياامي انا ماقدر او صرفيها بأي طريقه مؤدبه وبلنسبه لكلامها في الماضي لازم تنسيه او تتناسيه وتعيشي حياتك الحاضرة وتشوفي نفسك ومستقبلك وتحاولي تطوير نفسك وذاتك ولاتسلمي نفسك للأفكار الهدامه والسلبية المدمرة كل هذي السلوكيات تتحول بعد فترة من الزمن الى امراض نفسيه واعتقد انه بيدك ماتوصلي لهذي المرحله المرضيه عموما حبيبتي ساخرج الان ولي عوده ان امكن للتكملت الرد
تحياتي

__________________

شووفي ياقلبي اذا بتحملي كل شي فووق حقة
مارااح تعيشي صرااحة للحياة لازم تكووني قووية
والا ماراااح ترتااحي شوفي النااس الطيبة مرررة ووين هم الان ؟؟
وشوفي النااس القوية الحاازمة الي ماتتأثر بكبوااتها وين هم الان ؟؟

انا اقولك شي وااحد طنـــــــــشي حاولي وحاولي وحااولي
ترى النسيان نعمة واذا حملناا كل كلمة والله مارااح نرتااح
انتي احسبيها كم كلمة تقهررر سمعتي من يومك طفلة وكم كلمة سمعتي من امك
وكم كلمة سمعتي من زووجك ولســــــــــــى عياللك في الطرريق

اي احد يضاايقك طنشية مرة ومرتين وثلااث
وبعدهااا حسيسة انك متضاايقة واذا مررررة ضميرة ميت
وااجهي حتى ترتاااحي حتى لو امك ضاايقتك قوليهااا
اهم شي انك تشيلي عن نفسك حمل
واغلب النااس الي كذااا تلاقيهم يرمون كلااام
ولايدروون عنة مين تضاايق من زعل من انحررق ماهمهم

ودااائما رددي انك وااثقة وانك قووية وانك راح تقدري تواجهي مشااكلك
حتى تقتنعي فيهااااا
وان شاء الله تتغيري ياااااارب

الله يوفقك ويسااعدك

__________________

انا ياحبيبتي امر بنفس المشكلة حتى بعد ماتزوجت امي ماتقدر حياتي الزوجية وتخاصم اذا ماسمعت اي كلمة منها تحسسني اني عاقه لها واني مقصرة وانا بالعكس بس زوجي احيانا يقول عكس امي ومايرضى حاليا اعيش بصراع اني ارضيها او ارضي زوجي الله يصلح امورنا يارب

__________________
اللهم لك الحمد حمدا كثيرا