مشكلتي مع خطيبي وتدخلات أهله - منتدى عالم الأسرة والمجتمع

01-07-2010, 03:21 PM

عضو جديد

تاريخ التسجيل: Jul 2010

المشاركات: 3

مشكلتي مع خطيبي وتدخلات أهله

السلام عليكم

شخباركم شباب .. الصراحة هذي اول مشاركة لي في المنتدى

مشكلتي هي من بداية الخطوبة .. انا خذيت خطيبي وانا مو مقتنعة فيه لا في شكله ولا في لونة ولا في ستايله .. بس سبحان الله يعني من طلعت من المقابلة قلت للوالد انا موافقة بس بعدين في الليل قعدت افكر ليش وافقت وهو مو عاجبني .. قعدت ادعي انه يرفضني .. بس هو ما رفض واني كنت خايفة اني ارد اقول اني ماابيه لانه من قبل تقدم لي شخص وكلمته في التلفون وقال لي عن اسلوبه وجذي فماعجبني فقلت ارفض من احين احسن .. ولانه كانو وايد يتقدمون لي واهلي كانو يعصبون علي اني ارفض بس اني كنت ارفض لانه اللي تقدمو لي مو عاجبيني ولا ارتحت لهم .. كنت ادور عن شخص نفس المواصفات اللي اتمناها ولكن للاسف ماحصلت فقلت انا كبرت لانه صار عمري 20 بتقولون مو كبيرة بس بالنسبة لبيتننا واهلي اني كبرت ,وقالو لي ناس وايد مايصير ترفضين بعدين يوقف نصيبج وبصراحة خفت وايد .. المهم اني وافقت على خطيبي لاني بصراحة ارتحت له مع انه مافيه المواصفات اللي ابيه بس سبحان الله دخل قلبي
المهم قبل حفلة الخطبة رحت ويه اهله نشتري حق التجهيزات .. وكانو كل شي يدخلون لثياب الجنط وكل شي بس اني كنت ساكتة لانه قلت هاي اول فرحة لهم بخليهم على راحتهم .. حتى الصالة هم اللي اختاروها بدون مايشاوروني بس اتصلو احنا حجزنا في اليوم الفلاني والصالون هم اختاروه لي بعد سكتت .. رحنا نشتري الشبكة وامه ودتني سوق واحد وقالت لي اختار من 5 اطقم واحد .. وبعد سكتت والدبلة اني اخترتها على ذوقي لكن ليلة الخطوبة اكتشفت انه امه بدلت الدبلة تقول انه الدبلة اللي اخترتها ماعجبتها وانه اللي هي اخذتها احلى بدون ماتاخذ رايي .. وفستان الملجة هم اخذو لي القطعة وفصلوه على ذوقهم وبعد سكتت .. اما فستان الخطوبة رحت السوق وماعجبني ولا فستان وكانو يبون يغصبنوني على فستان بس مارضيت ,لكن .. ودوني مكان واختارو لي القطعة وموديل الفستان قالو لي انه خطيبي اختاره واني سكتت ومع انه يقول ماشافه بس هو قال لهم يختارون لانه يعجبه ذوقهم .. وخذيت شي مو عاجبني لانه هو قال لي انه ابيج تلبسين هذا اللون (اوف وايت) واني ادري اكيد بيتهم قالو له بس بعد سكتت .. اني الموديل ماعجبني رحت بخلي في الخصر ربطة والله وكيلكم ماسوو لي سالفة امه واخته اتصلو لي انه زعلان وماادري شنو بس اني ماتنازلت وخليتها لانه الفستان كان كلش عادي مو حلو يعني لا لون ولا موديل موديل التسعينات فاشل يعني .. حتى المسرح هم اختاروه وسفرة العقد و الباقة (مسكة العروس) يعني تدخلو في كل شي حسبي الله عليهم واني ساكتة
وخلصت الخطوبة على خير ,,
صارت بيني وبينه مشاكل وايد .. اولها انه كان يشك فيني لاني كنت على طول ساكتة .. اني طبيعتي هادئة شسوي يعني كان يقول لي اكيد تفكرين في شخص ثاني من جذي كله تسكتين .. ومرة اتهمني طالعة مع واحد .. يقول في ناس شافوني واني كنت طالعة ويه بيتنا .. وكان ياخذ التلفون وياخذ الارقام علشان يتصل علشان يتاكد بنات او شباب ..وكان يعصب علي لانه اذا قال لي شنو تبغين تاكلين اقوله على كيفك .. انا مو قصدي شي بس كنت اخاف اطلب منه شي ويقول ميزانيتي ماتسمح لانه هو كان كله يقول ماعنده فلوس و اهله من النوع اللي يتدخلون حتى الاماكن اللي اطلع وياه يحددونها يعني ابوه يقول لاتوديها عند البحر في الليل لا يصيدكم شي وعلى طول اتصالات وين انت ووين انت يعني كانه بيبي يتصلون له اذا تاخر ويقولون له بسك قاعد وياها مابتهرب

عليك شغل وللعلم هو مايجي ليي الا يوم الخميس والجمعة يعني اني مااحس اني مخطوبة .. و بيتهم دايما يقولون له ليش خطيبتك ماتتكلم وايد واني مغرورة بس اني مو جذي كنت استحي منهم خصوصا لاني مااعرفهم من قبل وطبيعتهم غير عني .. فمع مرور الايام اكييد بيتغير كل شي واني كنت مااشوفهم الا يوم في الاسبوع .. لكن بعد كم اسبوع اني تهاوشت معاه على سالفة المصروف وعلى الاشياء والاهانات اللي كان يقولها لي ماقدرت اتحمل ولا بعد كان اذا يعصب علي يخليني عند باب البيت ويرجع بيتهم واذا نزلت من السيارة يرد يدق علي هرن السيارة ويقول لي تعالي واني كنت اسمع كلامه .. من طيب نفسي شسوي بعد .. المهم هو عصب عليي في التلفون واني قلت له الصراحة مااقدر اواصل معاك اذا انت هلون اسلوبك شوف لك حل واذا مو قادر تعيش وياي وخصوصا هو ورى بيتهم يعني دايما يشوفني الخطا وبيتهم الصح لو شنو سويت مايبين في عينه ولا في عين اهله نكارين النعمة .. قلت له تعال اخذ اغراضك اللي شريتهم لي واصلا هو ماشرى لي شي غير اشياء تنعد بالاصابع حتى اغراض الخطوبة ماكملهم وحتى قبل لا افصل لي فستان اتصل ليي قال لي لاتشترين شي غالي ماعندي فلوس واني جتني الصيحة بس سكت شسوي بعد .. المهم هو عصب وسكر التلفون عليي يوم قلت له نبي نشوف حل يا انا ننفصل احسن .. وبعدين اني طرشت له مسج اذا انت ماتبغيني في الف يبغوني غيرك

وهو عصب وقال لامه وامه قالت لخالته وخالته اتصلت لي وسوت روحها تنصحني وماادري شنو وطلعتني اني الغلطانة .. عاد بعدين هو مااتصل واهلي واهله عرفوا بالسالفة .. ابوي الله يهديه اتصل لخطيبي قال له انا ماعندي طاقة للمشاكل تعال وحل امورك مع خطيبتك .. وهو اتصل لابوي قال بيجي هو مع بيتهم ... وجي وقال لي ابوي انه خطيبي جاي ياخذ بخاطري مع اهله اني استانست قلت يمكن حس بغلطته وبيصلحها .. بس للاسف اكتشفت انه ماقال بياخذ بخاطري لانه قال لي من قال لج اني واهلي جاين ناخذ بخاطرج .. ابوج اللي قال لي وانا جيت .. حسسني اني ولا شي وبعد ماصار الاجتماع بين الاهل .. انحلت المشكلة وماانحلت .. لانه

لانه هم سوو روحهم انهم بس خلاص نسو هو بعد ..واني على بالي بس خلاص مثل مابيتنا تفهموا انه لازم تصير مشاكل بين المتزوجين ..هم بيتفهمون بس اهله عصبو وانقهروا عليي وكرهوني .. حتى هو عادتا يجي ليي ليلة الجمعة بس ماجي ليي و قال لي انه مريض ومايقدر يمشي السيارة كان يجذب عليي بس علشان يتهرب مني واني رحت له مفاجئة وهو تفاجئ مني وانصدم اني جيت له .. ومن يومها بيتهم مايحبوني ويعاملوني كاني حشرة بينهم وحتى اذا يسافرون يشترون لي اخس الاشياء علشان انقهر سوني منبوذة بينهم واذا مارحت محد يسال عني ولا يعزموني اذا عندهم مناسبة علشان يطلعوني اني مغرورة ومو زينة ومااوصل الناس

واني كنت اطنش .. بس كنت اقول لخطيبي عن اللي يسونه ليي وكان يقول لي انتي الغلطانة .. وانتي اللي سويتي السالفة وخليتينهم مايحبونج ويعاملونج جذي ودايما يقول ليي اتصلي لهم واني كنت اتصل لهم ويكلموني من طرف خشمهم .. وقعدو يطرشون ليي مسجات

من ارقام غريبة يقولون ليي اني اتلصق في ولدهم علشان فلوسه

واي فلوس ياحسرة وهو حتى ماعنده شقة ولا غرفة فيها حمام .. الله وكيلكم غرفة قد حمام بيتنا وبعد شايفين روحهم وهو معاشه ضعيف 250 وعليه قرض مال الخطوبة وهو يعطيني 20 دينار مصروفي ولا يسال ولا شي وثياب مايشتري لي بس من عيد لعيد ويقول لي جمعي لفلوس علشان اذا احتجتين تشترين لج شي وبعد اني ساكتة عنه ومااتطلب منه وبعد مو حاط لي قدر .. وامه تسوي سحر .. سوت له سحر علشان مايحبني ويكون دايما في صفهم حسبي الله عليها ماتخاف ربها وخلت خطيبي كله يصيح وخايف ...
وهو بعد من تصير بينا مشكله يتهرب ويسكر تلفونه نفس المراهقين مع انه عمره 25 سنة يعني مو صغير حتى في النوم يقول لي انتي باردة .. ومااتفاعل وياه بس اني مو مني .. هو بعد ماصارت المشكلة دخل عليي غصبا عني واني خفت ومن يومها اني كله خايفة ومااتفاعل وياه ولا شي وبعد فترة قال لي انا دخلت عليج لاني ماابيج تروحين عني لانه وايد في مشاكل بينا .. ومن كم يوم صادتني مشكله مع ابوي وابوي من النوع العصبي نفس خطيبي عاد هو اتصل له الا قال له انه مو طايق بيتنا ولا طايقنا من جذي هو طلع من البيت يغير جو.. اني سالته اتصلت لابوي لانه مريض قال لي لا .. اني عصبت وقلت له اذا قلت لي اتصل لاهلك مابتصل مثل ماانت كل مااقولك اتصل اسال عن ابوي تقول نسيت .. وقال لي اصلا انتو ماتدرون عن ابوكم شي انا اتصلت وهو قال لي كذا وكذا قعد يعايرني لانه ابوي فضفض له .. وهو قعد يتشمت علينا بالله عليكم هذا رجال ..؟؟ وبعدين اني سكرت التلفون وهو اتصل 4 مرات ومارديت عليه .. وبعد مااتصل واني اذا يزعل اتصل فوق المئة مرة ولا يتصل لي .,.وحتى اذا اني غلطانة ماارضى ازعله اتصل فيه ولعلمكم هو فوق انه مايجي بعد مايتصل الا كم دقيقة .. وبعدين يتصل في الليل قبل لاينام واني اتكلم هو يرقد يعني اتكلم وهو نايم من زمان واني اعصب ..شسوي يعني عطوني حل ..
اني مااحبه .. بس اذا يعاملني زين احس روحي احبه .. اماا اذا تهاوشت وياه احس روحي مو ضايقتنه ويثقل في قلبي وهو بعدي قال لي نفس الشعور .. شسوي ؟. ابي حل

شكراااااااا ومسامحة طولت عليكم اعزائي

التعديل الأخير تم بواسطة أم داليا ; 01-07-2010 الساعة 08:02 PM السبب: تعديل في العنوان لبيان المضمون

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
الانتقال إلى العرض العادي الانتقال إلى العرض المتطور العرض الشجري

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه