السلام عليكم
أنا سبق وتزوجت بالغصب وطلبت الطلاق وبعد سنتين ونصف وافق يطلقني تحت ضغوط وطلبات
وجلست 7 سنوات ماتزوجت تقدم لي الكثيييير
لاكن إما يفحط أو يستعمل أو معروف بالهستره أو أصغر مني أو خلقه ما أبغاااه مو عاجبني
المهم وبعد 7 سنوات تقدم لي رجل متزوج هجيت من المتزوجين وطحت بمتزوج
مع إني رافضه ناس قمه بسبب إنه متزوج من ضمنهم واحد معلم و واحد طيار ..
المهم تقدم لي هالمتزوج وكنت أمر بظروف عائليه صعبه
وصعبه أقولها تصرفات من أهلي تتعب الواحد نفسيا"
وكنت اطلب من أبوي اتوظف لأني كنت محتاجه بالمررررررره وكان يرفض!!!
وأمي ماتساعده بالعكس أحيان أحس إنها بتصرفها تزيد المشكله فقررت أول واحد يدق بابنا اوافق عليه
وتقدم لي رجل عمره 46 كذبوا علينا وقالوا 39 او 40 المهم وافقت ع طووووول
وقال إن عنده زوجتين وقلت ماعاد تفرق دام متزوج إن شاءالله 3 وانا الرابعه ..
المهم وافقت هو طبعا" شاف سيارتنا قديمه وبيتنا قديم قال ذولي لو اخلي بنتهم عندهم واصرف عليها يمكن مايقولون شي..!!
المهم طلب يشوفني وعلى طول وافق وانا وافقت صدقوني مو عشان الضغوط اول شي ابي اتزوج واعيش حياتي ثاني شي ابرتاح من بعض التصرفات إللي سببت لي حاله نفسيه ..
المهم لما جلسنا ايام جا يتملك انا احسب معاه احد ماكنت ادري عن شي اثاريه جانا بروحه وملك نفسه والشاهدين ابوي وأخوي!!! فطلب اجلس معه انا كنت متجهزه ادري بنتملك بس ماتوقعت بهالطريقه المهم دخل علي ابوي وقال إطلعي للرجال يبغى يجلس معك قلت يبه مابعد تملكنا خل يجي الشيخ إللي يكتب العقد ونتملك واطلع عليه قال ابوي انتم تملكتوا الرجال ملك نفسه قلت كيف يعني قال مو شغلك إطلعي للرجال لاتفضحيننا هو شيخ ومأذون أنكحه..!!
انا طلعت وطلب اطلع معه بالسياره بس رفضت وقال لأبوي وغصب طلعت ابوي انتم ماتعرفوووووووونه يخوف واخاف يفضحني فيه ويفشلني المهم طلعنا وطلبت ماننزل بأي مكان بس ربع ساعه ويرجعني وسكت شوي بعدين وافق...ورجعني وجلسنا 3اسابيع وقال بتزوج !!! مالي حيله وافقت خلصت اغراضي بسرعه وتجهزت دق علي وقال الزواج سكاتي قلت انا اوك بس من ناحيتنا بنعلن يعني حفله عائليه وبنعزم جيراننا حتى يعرفون .. قال طيب موافق انا حسبته ليلة الزواج بيجيب لو رجل واحد أثاريه دخل على اهلي وخوالي وعمامي وبعض قرايبنا بالإستراحه بروحه!!!!!!!!!!!!!!!!!!!!!!!
قلت هذي اول الفشيله..طبعا" سافرنا وجلسنا بس 3 أيام ورجعنا ورجعني ع بيت ابوي ويجلس فتره ويجينا قلت انت متزوجني مسيار ولا وش قصتك قال لا وشو مسياره المسيار بدون مهر وانتي معطيك 40الف قلت انت لو معطيني ميتين الف وتبغاه مسيار مايهمك إسمع ابغى عيال يعني حبوب منع الحمل هذي إللي طلبت بتركها وأبغى بيت انا بيت حمايل ومن راس القبايل وماتنتسوى بي هالسواة ولا طلقني..
قال بفكر قلت بوشو قال يا البي طلبك يا طلاق قلت بعد بتفكر تعطيني عيال وبيت ولا لا هذي ماتبي تفكييييير اقول طلقني بس...وجلسنا 3 أيام وهو مسوي يفكررر وارسل ع جواله رساله قلت أنا بإنتظااار ورقتي طلقني بأسرع وقت اللي هذا أوله ينعاف تاليه.. وطلقني طلقه وحده وجلسنا 3 اسابيع ورجعني وطبعا ما دفعتني حاجتي وما إستغليت وضعه المادي وطلبت رضوه قلت إذا عنده ذوووق بيجيب لي هديه من كيفه بدون طلب ... ومير ماجاب لي لو عطر !! بس ماهمن وما آخذت بخاطري لأني افكر بأكبر من كذا يازواج صاحي مثل الناس يا طلاق...ورجعني وقال ابحطلك بيت وشغاله وش تبين بعد قلت بس هذي وجلسنا سنه وإحنا ع وضعنا نحتري البيت وكل شهر يقول الشهر الجاي وانتي في بيتك بس يسكتني وقلت لاهلي قالوا وش انتي مستعجله عليه خليك عندنا ومتى ماخلص بيتك بيجي ياخذك>>>ردهم يجيب الأعصاب
المهم انا الحين لي سنه وثلاث شهور وانا عند اهلي والناس القريبين والبعيدين اشاعوا إنه مسيار وانا انفي بس لااااا مقتنعين وبيني وبينكم ما ألومهم الناس مالهم إلا الظاهر..طبعا" قلت ابروح اشوف بيتي هاللي انت تقول ووداني وشفت بيت عظم باقيله 4 شهور شكله خاف وشراه ...هذي سالفة البيت
مشكلتي الخاصه مع زوجي يعلم زوجته وعياله باللي يصير بيننا طبعا" زوجته الاولى واولادها اما الثانيه جاحدني عنها...وهذا السبب الرئيسي اللي مخليه يتصرف معي كل هالتصرفات واقول له ادري عشانها وهو يجحد ... المهم لما تزوجته حبيته مووووت وحده 7 سنوات ماتزوجت وهي سبق وتزوجت شي طبيعي تحبه لو إنه ماينحب..وكنت اكشخ له آخر شي ومصروفي يروح ع عطوراتي وشكلي عنده وما أكررر اللبس عنده..إلين أعترف بذوووقي وكشختي ...الحين أنا تعبانه نفسيا" منه واحس بديت اكرهه وامل منه مع إنه ماديته ممتازه ولو تركته بخسر مصروفي بس ماعاد يهمني شي انا صااااااار بي إكتئااااااااااااب مابغى بيتي هاللي مابعد سكنته ولا زوجي أبغى اتطلق بس وش رايكم أبي تنصحوني انا مالي خوات واخواني صغار وامي اميه ومايهمه بتقول اصبري وابوي يقول دايم اصبري لو عشان مصروفك!!!!!؟؟
إنصحووووووني هل لو اطلب الطلاق افضل..وآخاف اتطلق وماعاد يتقدم لي احد للمره الثالثه .. واخاف اطيح بمتزوج مره ثانيه ... شرايكم اصبر ع اللي انا عنده حتى لو إني غير سعيده علما" عمره 46 او 47 وأنا 26؟؟


آسفه ع الإطاله وعدم ترتيب كلامي إعذروووووني آحس بحالة إكتئاب فضيعه
مالي خلق شي ابغى افضفض وابي الحل ...إدعولي...

شوفي حبيبيتي اولا اللعبي على الوتر الحساس اوصلي لدرجة انه مايقدر يستغنى عنك حسسسيه انه مافي رجال بالعالم الا هو وبعدين اسحبي منه هالشعور وخذي منه مصروفك وكل الي تحتاجينه دام السالفة كذا
اذا وصلتي لدرجة انه مايقدر يستغنى عنك بكل شى حتى بالفراش وقتها ادللي واشرطي شروطك يا كذا يا طلاق بس خليك واثقة انه ماراح يطلقك
الشى الثاني عزيزتي لا تقولي لو طلقني مايجيني غيره ربك كريم بس انتي اهم شى لا تسمحين لنفسك تعيشين عيشة المسيار من حقك البيت والاطفال ومن حقك تعيشين عيشة مستقرة زيك زي اي وحدة تزوجت واهم شى حاولي الان وباسرع وقت تجيبي منه اطفال وقتها لو حملتي بتكوني لويتي ذراعه من جميع النواحي
اهتمي بنفسك ولا تسمحي للاكتئاب يدق بابك خلك قوية واستعيني بالله انتي بالاول والاخير تبين الستر والله يستر عليك دنيا واخرة بس زي ماقلت لك لا تطلبي الطلاق الا لمن تكوني واثقة من قدراتك وانتي الحين ضيعتي معه قرابة السنة وشوي وتطلقين لا ثم لا اصبري عشان تنالي

صابره بدنيتي الله يوفقك ويرزقك ويربط على قلبك بالإيمان
احس إرتحت وربي إرتحت شجعتيني كنت خلاص مجهزه رساله بجوالي ابطلب الطلاق
بس بكلامك هذا قويتيني أعطيتيني دعم نفسي وهذا ما أفتقده الله يوفقك ويجزاك خير ياحياتي
اوك بطبق كلامك لانه بصراحه احسه مو مثل ماتزوجته لااااا متغير للأفضل بس إللي خلاني اكتب قصتي
إحساسي بالإكتئاب والملل بس يلا بنصبر وربي مايضيع احد..

حبيبتي الغالية اطردي الاكتئاب والملل فديتك
شوفي حبيبتي ضاعت من عمرك سنة وشوي والحين تبين تضيعن كل حاجة لا يالغالية خلك ذكية واوصلي للي تبينه بعقل وحكمة الان ركزي على الاطفال والحمل ولا تعلمينه كيدهن عظيم حبيبتي لازم تستخدمي هالاية
مثل ماقلت لك يالغلا اصبري وخليه يتعلق بيك اكثر من حريمه الثانيات كوني انثى طاغية واعرفي نقط ضعفه وخاصا بغرفة النوم لا تقصري معه بشى واسمحيلي على هالكلام لكن لاجل مصلحتك وانا حاسة فيه كولي بعقله حلاوة على قولتهم ولكن مع هذا يبغالك صبر وحكمة وهدوء فانتي ملكة الهدوء لا تنسين الشى هذا ونالقبتي نفسك بكذا الا فهو فيك
حبيبتي كثر الزواج من ذا وذا مب زين انتي الان زوجة وبيدك كل شى وبيدك تخربين بيتك وبيدك تعيشين ملكة ماعليك من حريمه ابد دامك وافقتي على الوضع في البداية لازم تتحملين واهم شى قولي مع نفسك انا احلى واجمل منهن خلك واثقة من نفسك جدا فهذا راح يساعدك على تجاوز اي اكتئاب بتعرض لك والاهم من هذا حبيبة قلبي لا تنسين الدعاء اللحي على الله وابكي وتذللي له بجوف الليل ماراح يخليك صدقيني
لا تطلبي الطلاق انتبهي لا تصيري كل ماصارت مشكلة تقولي له طلقني ترى بيمل منك وتصرين عنده وجودك والعدم واحد لا تسعين لهالمرحلة بل خليك هو يخاف من انك انتي تطلبي الطلاق خليه هو يحسب اللف حساب لزعلك وكله اذا عرفتي اشلون تمتلكينه ترى لو يتزوج عشر وامتلكته وحدة نقطة انتهى.
اسال الله ان يوفقك ويسعدك ويحقق لك كل ماتتمنيه في القريب العاجل وان احتجتي للفضفضة انا وكل الاعضاء اذان صاغية لك الناس لبعضها حبيبتي الله يسهل امرك يارب ويجعلك ثريا بعيون زوجك

كفت ووفت صابره لبا روحها ... صح لسانك والله ...
وبعدين يالغاليه داومي على الدعاء ان الله يسخره لك ويجعلك ورده بعينه ...تحياتي

عموماً لا اريد ان تخرجو من الموضوع إلا بفائدة شرعية وهي
لا يجوز للمرأة أن تطلب الطلاق إلا عند وجود ما يدعو إلى ذلك ، كسوء العشرة من الزوج عَنْ ثَوْبَانَ رضي الله عنه قَالَ : قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( أَيُّمَا امْرَأَةٍ سَأَلَتْ زَوْجَهَا طَلاقًا فِي غَيْرِ مَا بَأْسٍ فَحَرَامٌ عَلَيْهَا رَائِحَةُ الْجَنَّة ) صححه الألباني
هذا نسخته لك حبيبتي من موضوع المعلمة الي تزوج عليها زوجها انتبهي من كلمة طلقني كل شوي الا للشديد القوي وما حرم الله

..صابره بدنيتي ..

..جزاك الله ألف خير وجعله بميزان حسناتك يارب
مشكوووره على هالكلام ..الله لا يحرمني منك يالحنونه..

فديت روحك وانتي بعد حنونة وطيبة وهذا من طيب اصلك

آكيد صابره ردها بالصميم وكلام وحده عاقله
وناضجه وتتكلم بالعقل فديتها ولا يهون الباقين
وأنتي ألف شكررر لك يا غربة مشاعر وجزاك الله خير الجزاء..

أختي الفاضلة
من خلال ما نشاهد أن المطلقة خاصة التي يتكرر عليها الطلاق في الغالب ما يأتيها إلا متزوج ومعدد . وأنا أنصحك بالإستمرار معه لإن الدنيا ليست كلها على ما نريد ( يوم لك ويوم عليك ) والأيام كفيلة بعد الله أن تحسن الوضع لكن أنصحك بالأنجاب وطلب الذرية لإن هذا الأمر هو المصيدة للزوج الغير جاد . عموما أنصحك أن تعيشي حياة طبيعية وكوني مع الله بصلاتك وصيامك وأكثري الصلة بالله وبحبله المتين . وفقك الله دزاما وأبدا

__________________