مع اني مادرى ايش طبيعة هذا القسم ،، بس اجرب واشوف النتيجة ~
و مع اني ما اصدق احد " سامحني على صراحتي " لكن يمكن القى شي مفيد :

قصتي : ذكرها مو مهم لكن لانك طلبت اقولها بقولها بنظرتي الان مو نظرتي وقت الاحداث لان وقت احداثها ماكنت فاهمة شيء ~

امي تزوجت ابوي وهي الزوجة الثانية ، كانت متزوجة قبل ابوي وعندها بنت هي اجنبية
عشت كاي طفلة معهم الى ما طلقها ابوي و راحت واخذت رانيه اختى معها و تركتنى انا
كان عمري 6سنوات ، جلست مع زوجة ابوى و بناتها ، ما صرت اشوف امي ~
ولا ادرى وين راحت مع اني كنت متعلقة فيها كثير ، دخلت المدرسة و بالصدفة شفت رانيه اختي
سالتها وين راحت هي وامي وليش ما اخذوني معهم ، كانت اكبر مني بصف خامس ..
كانت تجيبلي بساكيت و سندوتشات وعصاير ومصروف وتقول هذى من ماما ، كنت ابكي ابغى اروح معها
بحكم اني كنت معهم لكن فجاة تركوني ، لكنها ما ترضى و تروح وانا اروح مع اخواتي من ابوي ~
تقريبا سنة وانا على هذا الوضع ، و يوم النتيجة وداني ابوي لامي ، كنت مبسوطة و على بالي بجلس عندها
لكن كلها يوم واحد و جابت لى هدية لاني نجحت وقالت لى لازم اكون متفوقة عشان تحبني و تجبلي هدية
كل مرة انجح فيها و اتفوق ~

مرت الاجازة دون ما اشوفها و عانيت في التاقلم مع زوجة ابوي و اخواتي وبدات ادخل في جو اهل ابوي
لاول مرة ، في كل جلسات الحريم بالعائلة يسالون هذى بنت فلانة هذى بنت فلانة ~واللي تناديني و تقول انا عمتك
واللي تقول انا بنت عمك وووو , و من حرمة لحرمه و اسمع كلام بس ما كنت فاهمته ؟!
وكل مكان اروح فيه مع خالتى اللى هي زوجة ابوي و بناتها يسالونها هذى بنتك " طبعا لاني مختلفة عنهم في لون البشرة و الملامح و غيره " فكانت تقول لا !
افتقدت امي لأني كنت متعلقه فيها كثير هي و رانيه ، بس ما كنت اسال عنها لاني على بالى راحت وبترجع !
لما رجعت المدرسة شفت رانيه و قالت لي ان ماما جابت نونو صغير و هي دائم تشيله
فمسكت فيها الا اروح معها لماما ..
رحت معها دون اخواتي يدرون و لما شفتني امي سالتني احد عرف اني جيت عندها قلت لا ..
فقالت لسواق يرجعني ، لكن بكيت و رفضت اروح فكذبت علي و قالت روحي وانا بكرة اجي واخذك
وكان زوجها موجود ، اللي يكون ابو رانية يعني رجعت لزوجها الاول ..
رجعني السواق تقريبا كان قريب المغرب و لما رجعت لابوي كان البيت كله متوتر و ابوي معصب
و صارت مشكلة و صارخ علي و بعدها رانيه ما عادت تجي المدرسة ...
ولا عدت اشوفها ابدا الى ما وصلت لسادس ابتدائي ~
" طبعا امي نقلت رانيه من المدرسة عشان لااجي معها مرة ثانية "

كنت متفوقة جدا جدا والاولى على مستوى المنطقة كل يوم نتيجة عندى امل اروح لامي و رانية
لكن ابوي يقول بعدين الى ما نجحت في سادس وكنت طالعة المتوسطة و بكييت الى ما وافق ابوي يوديني
امي ، رحت لها يوم واحد بس و اعطتني هدية وقالت انها مبسوطة منى ، واعطتني فلوس وقالت لي
روحي لبابا و اسمعي كلامه لانها بتسافر صدقتها لأني كنت كبيره شوي وعارفة انها اجنبية " سنه وسنتين وثلاث و عرفت انها كذبت علي و ما سافرت ..~
حتى ما خلتني اشوف رانية ولا اشوف ولدها ..

كرهتها و تناسيتها ، و اهتميت بتعليمي كنت رايحة للثانوي ، زوجة ابوي سوتلي حرب نفسية و ركزت علي في فترة الثانوي و بناتها بعد ، انواع التحطيم القى منهم ، مع انهم تزوجوا طبعا ولاوحده فيهم كملت تعليم ~
تخرجت من الثانوي بتفوق والاولى على المنطقة كالعادة ، نسيت اقول كان عندي صديقه من الابتدائي كانت بعد متفوقه جدا و امها جد حنونة كنت اروح معها بيتهم بقت معي الى الثانوي ، كنت كثير ما اقارن نفسي فيها ، سوت المنطقة حفل تخرج و ارسلت الاميرة لامي بطاقة دعوة لكنها ماجت ..!

و اخذت مكرمة من سمو الاميرة بموصلة تعليمي على حسابها انا و صديقتي ، طبعا كنت بسجل بكلية الطب
بعدين الابتعاث " كان عندي امل اكون بمركز مرموق بالمجتمع وابدا ما كنت ابغى اتزوج ، رافضة هالفكرة نهائيا" بعيش حرة دون سلطة من احد و اطلع عن ابوي و اهله كلهم ..~

في هذى الفترة جت عمتي سئية خلق و ، و قالت لابوي يزوجني ولدها ، انا رفضت رفض تام
ولدها ما يناسبني تعليمه ابتدائي صايع لا يقرا ولا يكتب الا شيء بسيييط ، فرق بيني و بينه واصلا مو وقت زواج
ولا عندي استعدار للزواج نهائي ، ابوي وافق و زوجة ابوي تشجعه و اخواتي بعد و يقولون لابوي هذا احنا
تزوجنا و ما درسنا ليش هي بتدرس وش فائدة الدراسة ، زوجها احسن لها ؟!
عاندت وقلت لولد عمتي ما ابيك لكن ما اهتم و عاند الا يتزوجني غصب عني ..
كنت ارفض مقابلته فكانوا خواتي يدخلونه غرفتي ..

ابوي ضغط علي من ناحية الجامعة ، وحرمني اكمل ، وهذا بالنسبة لي قمة التحطيم طول عمري احلم
ولما وصلت بيمنعني ، شهر و شهرين و التسجيل بيروح علي ~
تزوجت غصب عني ، و زوجي رفض اكمل ، بالطيب بالقوة الا في الاخير ما وافق بشرط ما ادخل طب ..
كذا اذية فيني ، سجلت ادب انجليزي ، عانيت معاناة كبيرة بسبب زوجي كم مرة يقطع بحوثي و يغيبني
و يسولي مشكلة كل مرة اروح فيها الجامعة ..
طبعا انا كنت اعانده ، لاني اكرهه جدا جدا ، مو متخيلة يكون هذا زوجي ..~~
و امه ما قصرت معي بالاذية ، تدخل واحنا نتهاوش و تسب امي و تقول لزوجي اضربها هذى مثل امها - طعن بالشرف ..
تخرجت واخذت كورس ترجمة ..
كنت اهرب من البيت بالجامعة فاروح قبل محاضرتي بساعة من 7 الصبح واجلس الى 6 المساء حتى لو ماعندي
شي كله عناد بزوجي و كره له ..

طول فترة دراستى ما كنت راضية بوضعي واحس اني حلمي ضاع و مستقبلي انهدم
خاصة لما اقابل صديقتي بالجامعة احيانا و هي دخلت طب و حققت حلمها ..

ما بيني وبين زوجي اي علاقة زوجية ، لكن الشي الوحيد اللي ريحني فيه هو ادمانه على المنشطات
صرت اعرفها واعرف اسماءها واسعارها ومن وين يجيبها وانبسط جدا اذا اخذ نوع معين لآنه يفقد وعيه
و يجلس كم يوم وهو قافل على نفسه وانا امشي كلمتي عليه واعيش حياتي و بعدها ينام كم يوم متواصله و بعدها يصحي فكر احيانا اشترى له كميه و اعطية كل ما صحي وحده ثانية ادمانه نعممممة كبيرة لي ..

صار لي علاقات كثيرة ، مكالمات و لقاءات في اماكن عامة ، عندي اكثر من رقم ..
لدرجة انسى احيانا ارقامي وعلاقاتي ، فكل مرة شخص جديد ..~~
اندم لكن اشعر براحة بعد كل لقاء ، مادري ليش ؟! ادمنت عليها ، اتوب لكن وقت ما احس بضيق
ارجع لها ، تسلية او احساس بالحرية ، و تمرد ...

منعني اواصل دراسات عليا ، و شفت صديقتي تعينت محاضرة بكلية الطب و راحت بعثة الان و ماتزوجت ..
شعرت باحباط شديد ونقمه على كل المحيط فيني ابوي و زوجي و اخواتي ...
صديقتي عاشت حلمي اللي طول عمري احلم فيه ..
وانا ضاع مستقبلي و ضعت معاه ..~~

- ابغى اطلق من زوجي ..!
و اواصل تعليمي او اغير تخصصي ..
- ابغى اعيش حرة ولا اتزوج ابدا ..
- ما ابغى اكون مثل خواتي عقولهم فارغة اقصى طموحهم بيت و عيال و قال و قيل ..
انا غير و طموحي غير ..
لكن ظروفي ما تساعد زوجي مو راضي يطلق ، و ابوي ضدي و العائلة كلها ..
من تحريضات خواتي و زوجة ابوي و عمتي ..~
- ابغى ابطل علاقات ، واشيل من بالى فكرة الانتقام ، و امحي امي وابوي من ذاكرتي ~
- ابغى اشعر بذاتي حقيقة ، وانميها ، واكون اكثر قوة ~

ابغى اكون مثل ما ابغى سيدة مجتمع غصب عن اللي مو راضي

معلومة جانبية ممكن مفيدة او غير مفيدة :
اكره مجالس الحريم اكرها جدا جدا ، اكره فلانة ولدت وفلانة تزوجت و فلانة
تطلقت ، و زيارة لهذى و زيارة لذيك ، احتقر هذى العقليات ..~
اكره اكون زوجة ماعندي الا زوج و عيال ..
مو معناه ماعندي ميول انثوية لا ، لكن انا كذا طموحي جد عالى
واحب نفسي واركز على ذاتي ..~