تركت بيتي بسبب مشاكلي مع زوجي
السلام عليكم ورحمة الله وبركاته
أشكر القائمين على هذا المنتدى ، حيث أستفدت كثيراً من المواضيع وخاصة المواضيع المتعلقة بالمشاكل الزوجية
اخواني أانا أبغى أفضفض ، واذا فيه نصايح لي تعدل من وضع حياتي
أنا متزوجة من 10 سنين ، وعندي 3 اطفال ، يتيمه الأم ، وعندي أخ شقيق لي ، توفت امي وانا صغيره ، وتزوج أبوي عشان يربينا ، وليته ماتزوج ، عانينا أنا وأخوي من زوجة أبوي ، والحمد لله على كل حال ، كبرنا ، أنا تزوجت وشقيقي تزوج وعنده عيال ، وعندي أخوان من أبوي واخوات .
تقدم لي شخص من نفس العائلة ، ووافقت بدون تردد ، للخروج من الحياة إلي كنت عايشتها .
اغلب فترات حياتنا الزوجية كلها مشاكل ، والسبب صغر عقل زوجي ، زوجي طيب ، لكن مشكلته إن عقله صغير بكل ما تعنيه الكلمه .
من أول أيام زواجنا سكنت مع أهله ، وبدأت المشاكل ، من مضايقات من أمه لي، حتى زوجي ضعيف شخصية قدام أهله ، واذا ما احترموه كيف تبغونهم يحترموني ، المهم صبرت ، في سبيل إني أعيش مستقله ، وبعيد عن مشاكل أهلي ، حتى جاء اليوم إلى زوجي قرر إنه يطلع من البيت ويسكن في سكن مستقل عن أهله ، ، رغم إن هذا الشيء كان أمنية حياتي ، لكن ترجيته ما ينقل ، وحاولت معه بكل الطرق يسكن مع أهله ، لأن زوجي أعرفه ، عديم مسؤولية ، وعرفت إن خروجنا من بيت أهله بيسبب مشاكل مالها نهايه ، والمشكله الكبيره خايفه في أي لحظه يرجعنا لهم ، والرجوع اصعب لهم ، على العموم أصر ونقلنا من عند أهله ، وبدأت المشاكل .
أهله يتعقدون إني أنا السبب في الخروج من البيت ، وكل ماراح لهم جلسو يقولون له انت ضعيف شخصيه ، وزوجتك حاطتك خاتم بإصبعها ، وزجي عقله صغير ، يجي عندي معبي وزعلان ، لدرجة لو كحيت تمشكلنا حنا وياه
ما يمر يوم إلا ولازم من مشكله تصير بيني وبينه ، والسبب صغر عقله .
ومو أهله بس ، حتى أصحابه نفس الشي .
أي شخص يقدر يوديه ويجيبه بكلمه .
حاولت بكل الطرق اوضحله محبتي له ، وانه لازم يكبر عقله ، ويصير له شخصيه مستقله ، ويكون مسؤول ويحس بالمسؤولية ، لكن يوم يمشي الحال ، و بكره يرجع على نفس الموال .
يزعل من أتفه الأسباب ، مثلاً ، اذا جا البيت وما ابتسمت يزعل ويقلبها نكد ، راح الحلاق وحلق ورجع ما قلت له نعيماً زعل ، فهمتو كيف المعاناه ، عديم مسؤولية ، يروح عند أصحابه ، يقولون له بنسافر ، يقول معكم ولا يقولي ، الا بعد ما اتصل عليه ، اقوله طيب ليش ماعلمتني على الاقل ، عشان نستعد ، يقول مولازم استاذن منك ، فاهم الزواج غلط ، كأن ما عنده زوجه واطفال . وسواها كثير ، وبعض الاحيان اكون محتاجه أغراض ضروريه للبيت ، وما احصلها ، واطلع اجيبها من برى لوحدي ، يستغل الاطفال في مشاكلنا ، يعني تزاعلنا ، يكلم عياله ما يكلموني ولا يسلمون علي ، ولا يسمعون كلامي .
تكلمت معاه ، ان مهما صار بينا لا تدخل العيال ، لن ما يفهم
بتقولون أعطيه إلي يبغى وبيبسطك ، وهذا الي صار ، لكن ما اقدر اواصل 10 سنين كل يوم نفس السيناريو ، تمر أيام انسى ، وتمر أيام نفسيتي تعبانه ، وبعض الاحيان مريضه ، ورغم ذلك صبرت .وصرت اتصنع له كل الي يبيه ، لكنه تمادى صار يطلب من أشياء فوق استطاعتي ، وهذا كله بدون مقابل ، بعضكم بيعتقد أ،ي لوسمعته كلام حلو بينبسط وبيغرقني كلام حلو ، لا والله العكس ، يصير متسلط وشوف نفسه علي .
ماني من النوع المتسلطه أو أفرض رأيي عليه ، ودايماً أقوله إلين متى ونحنا في مشاكل ، ما تمل ، يقولي تمام ، وينام ويرجع كل شي مثل ما كان .
كل هذا وصابرين وماشيه الأمور ، لكن الوضع تطور ، أكتشفت أنه يتكلم مع بنات ، وقامت مشكله كبيره ، وعلمت أبوي ، وجا للبيت ، وحلف وترجاني اني اسامحه وما يعيدها ، وعديتها ، رغم أنه كسرني من داخل . لكن عشان العيال الصغار .
بعدها بفتره صار يتمادى ، صار ينام برى البيت ، وكثرت مشاكله داخل البيت ، صار يزعل على كل شيء . وليته يزعل على شي يستاهل ، وتكررت خيانته لي مع بنت ، وهنا إنفجرت ، ووصلت مرحله إني لازم أوقفه عند حده ، إتصلت على أخوي ، وجا مع أبوي وجلسو معه ، قالوله ليش تسوي كذا ، بنتنا مقصره معك في شي ، قال لا ، قالوله ليش طيب ، جلس ساكت ، اخوي قاله ، اذا ما تعرف قيمتها عندك ، تراها غاليه عندنا ، وطلب مني ألبس واخذ أغراضي وبياخذني معه لبيته ، وطلب مني أخلي العيال عنده ، رفضت وترجيت أخوي وقالي ، خلي عياله عنده ، هو مسؤول منهم ، إلين يعرف قيمتك ،عندي ولدين في المدرسه ، وولد رضيع عمره سنه ، وأبوي كان مأيده في اللي قاله ،واخذني أخوي وانا أبكي ، ووداني بيته.
وصار الموضوع للحين يومين ، وأنا ألحين عند أخوي ، لكن والله اشتقت لعيالي ، وبالذات الصغير ، مدري وش يسوي ، ومين يهتم فيه ، متأككده إن زوجي بيوديهم عند أهله .
واخوي رافض ، وابوي معه ، إنهم يرجعوني له .ويقولون هذا مرخصك ، لازم يعرف قيمتك ، واليوم الي ما يبغى عياله نحنا نحطهم في عيونا ، لكن رجوع له ، مافيه إلين يحس بقيمتك .
أنا متأكده أنه راح عند أهله ، وبيقولون له شفت كيف خلتك أنت وعيالك ، شفت انها مافيها خير ، ومن ذا الكلام .
وش تنصحوني اسوي ، بصراحه ما افكر في طلاق ، وما ابغى عيالي يتربون في بيئه غير مستقره .
الحمد لله مرتاحه عند أخوي ، وهو وزوجته معيشيني بنعمه ، إرتحت نفسياً ، لكن مشكلتي عيالي ، ابغاهم عندي
هل أستمر بهذا الوضع ، إلين يتعدل ، أو أحاول اتكلم معاه ونحل المشكله
بصراحه احترت
ومشكورين ربي لا يريكم مكروه فيكم ولا في أحبابكم
تم تعديل العنوان ليتناسب مع المضمون
التعديل الأخير تم بواسطة ويبقى الحنين ; 22-03-2017 الساعة 01:39 PM
22-03-2017, 01:17 PM
ضوابط المشاركة
العرض الشجري