(ملف كامل عن البشرة5)


بعد ما اتكلمت عن التقشير المرة اللي فاتت ووعدتكم في العدد ده إننا نتكلم عن التفتيح..

بنبدأ المرة دي بأول خطوات التفتيح وهي تفتيح الأماكن الغامقة بالجسم، زي البقع الداكنة اللي بتظهر في الوش أو الأماكن الغامقة في الجسم وكده يعني..

وهنعمل الخطوة دي الأول علشان نوحد لونه والخطوة دي بتسبق خطوة تفتيح الجسم بالكامل

تفتيح الأماكن الغامقة بالجسم

هنبدأ بالتفتيح بثنيات الجسم وهي مناطق الركبة والرقبة والكوعين. وده لأن المناطق دي بتتعرض دايما للاحتكاك سواء بالملابس زي الرقبة أو بالسند على الكراسي أو الترابيزات وده بيحصل مع الكوعين أو القعود عليها زي الركبة..


ماسك الشوفان بالليمون



المقادير:

معلقتين كبار شوفان.
معلقتين كبار عصير ليمون.

الطريقة:

اخلطي الشوفان وعصير الليمون مع بعض وادهني بيه مكان السواد في الركبة والكوع والرقبة وسيبيه لمدة ربع ساعة وافركيه برفق وشيليه بالمية الدافية وصابونة التفتيح اللي عملتيها، وبكده تاخدي الفايدتين مرة واحدة.

ماسك الدقيق




المقادير:

معلقة كبيرة دقيق أبيض.
نص كوباية لبن.
ذرة كركم.
عصير نص ليمونة.
منقوع التمر الهندي.

الطريقة:

اخلطي المقادير دي كلها مع بعض وغطي بيها الجسم لمدة 10 دقايق ثم دلكي برفق. والماسك ده استعمليه مرتين في الأسبوع لمدة أسبوعين وبعدين مرة كل أسبوع.



ماسك قشر الموالح



المقادير:

قشر ليمونة ناشف.
قشر برتقالة ناشف.
زيت اللوز المر.
زيت الجلسرين.

الطريقة:

هاتي قشر ليمونة ناشف وقشر برتقالة ناشف واطحنيهم لغاية ما ينعموا وحطيهم في علبة. خدي معلقتين أو حسب المنطقة المراد تفتيحها وضيفي ليهم خليط متجانس من زيت اللوز المر وزيت الجلسرين بالقطارة لغاية ما يبقى الخليط زي المعجون وافردي المعجون على المناطق السمراء 10 دقايق كل يوم.


زيت الخروع



وده مخصوص علشان تفتيح منطقة الإبط والمناطق الحساسة التانية اللي هي مشكلة بتعاني منها أغلب البنات خصوصا المقبلات على الزواج.

الطريقة:

تجيبي زيت الخروع وتدهني بيه المنطقة دي 3 مرات يوميا لمدة شهر وهتشوفي الفرق.


ماسك الملح



المقادير:

زيت الزيتون.
ليمون.
ملح.

الطريقة:

سخني زيت زيتون وحطيه وهو فاتر على المكان اللي عاوزة تفتحيه وادهني برفق لمدة 5 دقائق.. بعد كده هاتي ليمونة مقطوعة لنصين ورشي على وش الليمونة ملح وافركي بيها مكان الزيت.. اعملي كده مرتين كل يوم وقولي للسواد باي باي بإذن الله.


ماسك لتبييض الإيدين



المقادير:

1 معلقة كبيرة عصير ليمون طازج.
3 معالق صغيرة جلسرين.
1 معلقة صغيرة ماء بطاطس مُصفّى.
10 نقط من خلاصة البنزوين "اشتريه من عند الصيدلية".

الطريقة:

يضاف عصير الليمون للجلسرين ثم يضاف لهما ماء البطاطس. ثم يضاف البنزوين "اشتريه من عند الصيدلية" نقطة تلو الأخرى... يقلب الخليط جيداً.. يحفظ المستحضر في زجاجة ثم يُرجّ عدة مرات.. يمكن استعمال هذا المستحضر عدة مرات يومياً.


ماسك الرقبة وحاجات تانية




المقادير:

3 معالق جلسرين.
1 معالق فازلين.
1 معالق زيت زيتون.
صفار بيضة.
عصير ليمونة.
معلقة صغيرة خميرة.

الطريقة:

اخلطي المقادير كلها مع بعض وحطيها على الرقبة والمناطق التانية ساعتين كل يوم وهتشوفي بياض عمرك ما شفتيه قبل كده.
[line]
تفتيح الجسم بالكامل

بعد ما خلصنا تفتيح المناطق الغامقة ندخل على تفتيح الجسم بالكامل.. فيه كذا طريقة لتفتيح الجسم بالكامل.. تعالي وشوفي..

ماسكات الحنة

الطريقة الأولى



المقادير:

نص فنجان حنة.
ربع فنجان ترمس مطحون.
شوية مية للعجن.
الطريقة:
اخلطي المقادير كلها مع بعض لغاية ما تبقى زي الكريمة، سيبي الخليط على الجسم 5 دقايق، وافركي الجسم بالليفة، واغسليه بالصابون اللي عملناه لغاية ما يزول لون الحنة تدريجيا، وادهني الجسم بخليط متساوي من زيت الأطفال وزيت اللوز المر وعصير ليمونتين.



الطريقة التانية

المقادير:

2 معلقة كبيرة حنة.
عصير ليمونة.
شوية زيت زيتون.

الطريقة:

اعجني الحنة بعصير الليمون وشوية زيت زيتون وسيبيها على الجسم دقيقتين أو تلاتة وشيليها بالمية والصابون.


الطريقة المغربية لتفتيح الجسم



المقادير:

5 معالق حنة.
8 معالق سكر.
5 معالق قرنفل مطحون.
معلقة صغيرة كركم ناعم.
زيت لوز أو سمسم.

الطريقة:

اخلطي المقادير الجافة كلها مع بعض، وحطيهم في علبة وعند الاستخدام خدي من الخلطة معلقتين، وضيفي ليها معلقة صغيرة زيت لوز أو زيت السمسم وسيبيه على الجسم ربع ساعة وبعدين شيليهم بمية كتيرة جدا، ويا سلام بقى لو تعملي بعد كده حمام مغربي... وابقي ادعي لي.

ماسك الفازلين



المقادير:

نص علبة فازلين صغيرة.
فنجان زيت الخروع.
فنجان زيت اللوز.
2 معلقة زيت السمسم.
عصير ليمونة ونص.

الطريقة:

اخلطي المكونات دي كلها وخليها على الجسم طول الليل واغسليها الصبح بالمية والصابون.

ماسك شمع العسل



وده بقى ماسك روعة لتفتيح وتنعيم الجسم بالكامل.

المقادير:

2 معلقة كبيرة زيت اللوز المر.
2 معلقة كبيرة زيت الورد.
1 معلقة كبيرة جلسرين سايل.
1 معلقة كبيرة شمع العسل.
1 معلقة كبيرة حلبة مطحونة.
1/4 معلقة عشبة الزيزفون مطحونة.

الطريقة:

اخلطي المكونات كلها مع بعض واعصري عليها نص ليمونة واستخدمي الخلطة دي يوميا لمدة أسبوع وبعدين مرة واحدة في الأسبوع وراح تشوفي الفرق..