مثل كل بنت كنت احلم بالزوج رومانسي يخطفني على حصانه الأبيض الحمد لله ربي عطاني زوج فيه تقريبا اغلب المواصفات الي ابغاها كانت الملكة من احسن ايام حياتي بعد ماتزوجت احس انه تغير علي مو مثل قبل صحيح انه رومانسي ويحب المزح والفرفشة لكن اخف بكثير من ايام الملكه واذا سئلته ليش تغيرت يقول لي بكل بروده ان الزواج مسؤولية مو بس ايام وردية وطلعات وسفريات
اتصلت علي جارتي وعزمتني وهذه اول مره اروح لها اصلا علاقتي معها سطحية مرره وكان الوقت تقريبا 8 الليل اتصلت على زوجي علشان اقوله ان راح اطلع
وجواله مقفل وبعدها تصلت جارتي قالت لي تعالي بسرعة في وحده تبغى تشوفك والحين راح تمشي لأنها مستعجلة مرررة ومن سرعتي نسيت جوالي ماأخذته معي
رحت لها واخذتنا السوالف وربي ان الوقت مر بدون ماحس فيه نهائيا اطالع ساعتي اشوف الساعة وحده الليل
وانا الي كنت انتقد امي اذا قالت ان الوقت مر بدون ماتحس فيه كنت اقولها ليكون قاعدين تناقشون مشاكل الشرق الأوسط وقضايا الفقر والبطالة
افتح الباب واشوف زوجي معصب ويصارخ اول مرة من تزوجنا اشوفه بهذه الحاله قال لي وين كنتي رايحه لأني اتصلت على كل الي يعرفونك قالوا ان مااحد شافك واتصلت على اهلك (اهلي كانوا في مدينة ثانية) وليش ماقلتي ان انتي طالعه خلتيني على اعصابي طول هالوقت
حاولت ان ابرر له موقفي واني اتصلت عليه لكن كان جواله مقفل
قال لي هذا اخر مرة تطلعين وصدقيني لو تطلعين مرة ثانية ماتلومين الا نفسك
(قبل اسبوع كنا في بيت اهله وكانت وحده من خواته تأخرت ولما قال لها ليش تاخرتي قالت له انا اطلع وادخل على كيفي انت مو ولي امري )
لا شعوريا ماادري كيف طلع هالكلام مني قلت له مايحتاج تفرد عضلاتك وتسوي نفسك رجال علي وعندك خواتك تكون معاهم بلا رجوله
اول ماخلصت كلامي عطاني كف حسيت ان الدنيا تدور قعدت فترة اطالع فيه مو مستوعبه شي
لاابوي ولااخواني ماعمرهم مدوا يدهم علي بالعكس كنت في بيت اهلي مدلله وكلن يبغى راحتي
حتى زوجي عمره ماضرب خواته
بعدها كل واحد منا نام في غرفه لحاله يومين على هالوضع حتى كلام بينا مافيه يجلس الصبح يروح الدوام ومايجي الا في الليل وبعدها ينام على طول
كرامتي ماتسمح لي ان اعتذر لأن مو انا الغلطانه مو حلوة بحقي يضربني واجي انا اعتذر منه بعدها اخاف يتعود ان يضربني بدون سبب وصراحة ماعمري اعتذرت لأحد اهلي وصديقاتي حتى اذا كنت غلطانه اهم الي يعتذرون مني

شنو الحل الله يعافيكم