السلام عليكم ورحمة الله وبركاته
أنا فتاة عمري 21 سنة مخطوبة (ملكة ) منذ عامين وزواجي بإذن الله تحدد ,,
مشكلتي هي زوجي أو خطيبي زي مايقولون وعمره 28 ,,, مو عارفة أتعامل معاه ,,مع إنه نسيبي بس ماادري وش يرضيه صراحة
الرجال تقليدي ويبغى المرأة بصفات معينة وأنا و الله الشاهد عليي حاولت أتغير عشانه ,,يعني مثلا

يحب طريقة معينة بالحجاب, ليس مثل ماتعودت عليها وغيرتها ,,
عصبي جدا وأنا عصبية مااعرف أتعامل معاه ,,,
وأعاني من قلة بالعاطفة المقدمة لي ,, يعني أحس تعامله معاي مو كأي مخطوبة
كلام حلو نادرا إن لم يكن قليلا جدا
هدايا نااادرا جدا ,,كنت اقدم له ,,بس ماحسيت أنه يهتم بها فصرت ماأهديه
لما اقول أني متضايقة بالدراسة وضغط الأمتحانات لاسيما إني أدرس طب (يقول يعني مكلمة عشان تشتكي لي) أنا أكون مكلمة أبغى حنانه وحبه كأي أمرأة تطلب رجال في هالموضوع بالذات وفي حالات التعب
مثل ماهو لما يكون تعبان يطلب مني أني أقدره وأعذره واريحه

قلت إن السبب قد يكون من المشاكل الكثيرة اللي صارت بيننا وكرهته فيني ,,,بس بجد أنا تغيرت أشياء واجد أحاول أرضيه فيها,, لكن هو ماينسى
يقول لي أنتي قبل سنة قلتي كذا ,,, أو سويتي كذا
يعني حتى لو فكرت أن اتغير يظل يذكر كل أخطائي البسيطة بنظر أي انسان طبيعي والعظيمة في نظره
و الله انا مثقفة وأقرأ كتب وكتب دينية وأتناقش مع الناس وعندي أهل متفهمين ,,حاولت بقدر الامكان أحل مشاكلي ,,عشان أحافظ على زوجي ,, بس مافي فايدة
أنا من النوع اللي أقرأ روايات كثيرجدا وأعتبرها مثل الهواية في أوقات فراغي مثل أي أنسان عنده هواية ,,صار يقول لي أن سبب تفكيري العاطفي هي الروايات وهي اللي تخرب البيوت ويحاول بطريقة أو بإخرى يمنعني منها أو من أتكلم كلمة يقول هذا اللي استفدناه من الروايات,,
أحس روحي محطمة ,,تعبت كثير عشان أحافظ عليه,, وصرت أفكر بالطلاق لأن أنا وحدة أفكر بالعاطفة يقول عني بالرغم أني عقلانية كثير ,, وهو واحد شرقي يقول يستحي يعبر عن عواطفه ومايعرف يقول لزوجته أحبك
لما قلت له خلاص لو مافي حل نتطلق ,,, قال شيلي هالفكرة من بالك أنا ماتزوجت عشان اطلق ,, أنتي لازم ترضي بزوجك مثل ماهو وتحاولي تغيري نفسك لين ماترضيه ,,أصلا هذا المرأة الكاملة
ماقول ماعنده ايجابيات بصراحة
يعتبر كريم على قد حاله ,, مثقف بدرجة كبيرة ,, أحسه على نياته في بعض الامور ورجال أثق فيه ومتدين وأشعر بحبه بعض الاحيان اللي أكون فيها اسعد مخلوقة بالدنيا
خايفة من حياتي القادمة ,,
أنا وحدة بكرة أكون في مستشفى ودوام وبيت وأولاد لو ماحصلت لي الراحة الزوجية اللي مو لايقيتها أحين هل بقدر أسير بيت كامل ,,
أنا طرحت المشكلة لأني أبغى مساعدة ,, هل أنا غلطانة أن واصلت لهالوقت معاه ,,أو هو الغلطان ,, لو كنت غلطانة وشو غلطي وش لازم أسوي ,,,

أدعوا لي بالحياة السعيدة معه

__________________

"لاتطعن في ذوق زوجتك؛؛لأنك احدى اختياراتها"