الله يوفقكم ويدخلكم الجنة..ساعدوا صديقتي المسكينة
السلام عليكم ورحمة الله وبركاته..
صديقتي تعاني من مشكلة بصراحة وحابة أوقف جنبها خصوصا اني مالقيت لها حل يمكن يساعدها..
هي مخطوبة لشاب طيب وخلوق الحمد لله وراتبه معقول نوعا ما وهي مستعدة تصبر وتتحمل عشانه اي شي..
هو اتغرب عن بلده وضحى بدراسته الجامعية عشان يسافر ويكون نفسه..والى الان خمس سنين وهو يصرف على أهله ومايبقى شي لنفسه وكل ماحاول يوفر شي لنفسه يطلبوا منه أكثر وأكثر مافي شي يشبعهم..البنت قالت مش مشكلة أتحمل وبالعكس هذا الشي طمنها أنه ماراح يخليها أبدا لأنه اللي ماله خير لأهله ماله خير لأحد ومادام هو متفاني ومش مقصر مع أهله فأكيد ماراح يقصر معاها ولا مع أبناؤه بعد كدة..البنت هذي سافرت على أمل أنها ترجع ويكلم أهله بخصوص العقد..لكنها رجعت ولقت الطامة الكبرى..خطيبها استلف من البنك سبعين ألف درهم عشان أهله يبنوا بيت لهم في بلاده..وأصلا سبعين ألف درهم تكفي ايش وللا ايش؟؟ وكمان سفر أخوه للدراسة في الخارج وباقي كم من اسبوع ويخلص وكلهم منتظرين منه أنه يجيبه هنا عشان يدور له شغل وطبعا كل هذي مصاريف..وغير كدة مصاريفهم ماتخلص على طول هات هات هات وياريت عاجبهم بالعكس نفسيته مرة تعبانة لأنه مافي تقدير منهم..ونسيت شي كمان..اخوه اللي عمره أقل من عمر صديقتي..يمكن عمره 22 أو 23 سنة عقد على وحدة وطبعا الكل منتظر منه أنه هو اللي يتكفل بمصاريف زواجه..مع ان خطيب صديقتي هو الكبير فيهم وفي وكمان واحد اصغر منه كمان عازب..والاهل هناك مستعجلين على زواج اخوه هذا ..هو سافر لهم على أساس يشوف ايش سبب عدم رضاهم ويقول انه في مشاكل هناك راح يحلها..بس تعب مرة من طلباتهم وعدم رضاهم ورجع ونفسيته زفت..وفي الاخير قال لصاحبتي انه احسن شي انهم يخلوا بعض وانها حتلاقي انسان افضل منه ..يقول لها هذا الكلام وهو كله ألم واحساس بالعجز والنقص..حتى انه يقول لها أنا نذل أنا لاشيء..هي متأكدة وواثقة من حبه لها مليون بالمرة..ولو كان عندها شك ولو واحد بالمية كان خلته من زمان..واللي زاد الطينة بلة ان أبوها ناويين يقيلوه من العمل بعد انتهاء السنة الدراسية بس عشان خاطر عياله مايطلعوا من المدرسة..هي حاسة بحيرة شديدة..مافكرت أبدا انها تتركه لكن هل ممكن يكون في حل بالنسبة لمشكلة الديون المتراكمة وعدم رضا أهله الدائم وتجاهله له لدرجة عدم سؤالهم عن زواجه؟؟
وهل من واجبه أن يستمر على العطاء المنقطع النظير لأهله والتضحية بنفسه وحبه؟؟
البنت خايفة بكرة تسافر بلدها..وخلاص ويخطبها غيره ويوافقوا وخايفة انها تفقده..نفسها انه يتم عقد بينهم عشان
أهلها مايقدروا يزوجوها لغيره..علما أن البنت في الرابعة والعشرين من عمرها ..جامعية وتحاول الان البحث عن وظيفة علها تقدر تساعد..
ارجوكم ارجوكم اعتبروا المشكلة مشكلتكم..حطوا نفسكم مكان البنت وخطيبها ايش كان ممكن تسووا..وايش سبب عدم رضا أهله هل معقولة بسبب طيبته وعدم تفريطه بهم؟؟
اه صحيح قالت لي شي يشبه النكتة ..لأن هم يضحك وهم يبكي..أول مرة سافر لأهله بعد ماعرفها-صار لهم مخطوبين سنة ونص- رجع هنا وماعنده غير الشي اليسير من ملابسه لأن أهله نفضوه!!
واليوم قالت لي أنه اعطاهم موبايله الجديد اللي طلعت عينه لغاية ماجابه ولما سألته ليش قال لها يعني أقول لهم لا؟؟!! وأعطوه موبايل قديم شكله!!
ذكرت لكم اخر مثالين عشان تعرفوا كيف هو مضحي ويعطيهم كل كل كل شي وكيف هم أنانيين ومايعجبهم العجب؟؟!!!!
ارجوكم..ارجوكم أنتظر الحل
06-02-2004, 06:59 PM
ضوابط المشاركة
العرض الشجري