أخاف هالموضوع يطيحني من عينكم ..

بس هالله هالله فيني لاتهاوشون ..تراني حساسة ..وأخاف ..

السالفة ومافيها الله يسلمكم ,,اني ماعرف اطبخ ..

جد والله مااعرف أطبخ نهائياً ..

ماتعلمت على الطباخ من يوم أنا صغيرة..

لما كنت أدخل مع أمي المطبخ أشوفها وهي تطبخ ..تهاوشني وتطردني ..

خواتي ماكانوا يعرفون يطبخون ..بس لما تزوجوا جبرتهم ظروف الحياة وصاروا يطبخون ,,

أشوف اللي حوالي متزوجات وغير متزوجات كل الاعتماد ..على الخدم ..

بيتنا الناس اللي فيه (مو أكيلة أبداً) مو من النوع اللي ياكل ..حتى حتى زوجات اخواني أول ماجو يتنا مساكين يتفننون في الطباخ ..عشان أزواجهم ..صادهم إحباط محد ياكل ..


كل الأسباب أعلاه ساعدتني ..أو خلينا نقول ..وصلتني للحالة إللي انا فيها ..

يعني أعرف أسوي شاي
<<وايد عليج ..

وأعرف أسوي شكشوكة (أتوقع جذي تسمونها بالسعودي )<<بس شكشوكتي حلوة لايعلى عليها ..

ووووووو ..

الصراحة بس ماعرف شي ثاني ..ولاأحب السويت عشان أتعلمه ..

دايم أمي تقول لي تعلمي ..وراج زواج ..

أرد عليها رد واحد مايتغير ..

أقول لها :كله منج ماعلمتيني ..

أو أقول لها ..لحد الآن ماأجبرتني الظروف ,,إذا جبرتني غصبن علي بتعلم ,,وبعدين هذا زمن خدامات ..

بس من كم يوم كنت أتناقش مع زوجة أخوي في هالموضوع تقول اعذروها تعلمي من ألحين احسن ..

أنا أقول لها بتعلم إذا انخطبت ..وانجبرت ..

هي تقول إن اي طبخة محتاجة تسوينها كم مرة عشان يدوب تضبطينها ..

امممممممم ..

بصراحة ماأحب المطبخ ..

وإذا جعت أعرف أصرف نفسي آكل اي شي ..أو اطلب من المطعم ..

والله لو في دورة طبخ للمبتدئين كنت باخذ لي ..

الصراحة لما حد يتقدم لي ..أمي تقول لهم ترى البنت ماتعرف تطبخ ..

يقولون عادي ..هي موظفة ..أصلا ماعندها وقت تطبخ ..

يعني ولا مرة حد رفضني عشان مااعرف ..<<تخيلوا رافضيني على هالسبب صج فشيلة

حتى لما كنت مخطوبة قلت له إني ماأعرف ..قال :عادي بتعلمين ..

إنتوا يابنات شلونكم مع الطباخ ..تحسون نفسكم مهيئين من هالناحية ..

خاصة إن يقولون الطريق إلى قلب الرجل معدته <<رحنا فيها ..مشكلة ..

وبعدين شرايكم شلون أتعلم وبإيش أبدا ..

ولا مافي داعي ..اخليها للظروف ..

والله أنا لاحظت معظم صديقاتي وماكانوا يعرفون يطبخون ..وللآن تزوجوا ولا يعرفون وماشية حياتهم ..

اليوم أول مرة ادخل قسم التغذية والمطبخ ..طاح وجهي في الارض ..شفت واحد من الأعضاء (الذكور)..مسوي طبخة ..حسيت بإحراااااااااااااج ..وأنا ماعرف شي

رجاء لا اطيح من عينكم ..تراني سنعة ..بس ماأعرف أطبخ ..

خلونا نتناقش في هالمواضيع من باب التفاؤل ..والاستعداد ..


وبعدين لا تتسندرون من كثرة مواضيعي هالفترة ..

ترى كلها أسبوعين وتخلص إجازتي ..وبتنحرمون من سوالفي الحلوة ..