السلام عليكم ورحمة الله وبركاته
وجدت هذا المنتدى بالصدفة وقلت اكتب فيه ما اعانى منه لعل الله يرشدنى على يديكم لما فيه الخير
تقدم لى ابن عمتى من حوالى شهر واكثر وهو راجع لسه من السفر وابى وافق عليه بسرعة غريبة وانا صليت استخارة وشوفت رؤيا بشرتنى بالخير وانا على الاستخارة الى الان والله يعلم مدى حيرتى فى امرى فانا خائفة جدا من الزواج وكان فى خيالى شخص اخر غيره هو طيب وحنين وبيحبنى جدا وكمان مستقبله كويس وطبعا الحمد لله بيصلى وساعات بينزل المسجد بس خايفة جدا من حاجتين اول حاجة ماضيه لانه كان عايش فى امريكا وكان سنه صغير وكمان لوحده يعنى خايفة قوى قوى يكون مارس اى حاجة حرام او شرب خمرة او لعب قمار كل الافكار دى لما بتجيلى بموت من الخوف وكمان بكلمه وحش لما بشوفه لانى طبعا خايفة وهو بدأ يحس انى مضايقة وبدأ يقولى لو علاقتك بيا مضايقاكى فانا مقدرش اضايقك وكمان بتخانق معاه كتير وقلعت له الدبلة لانه بيشرب سجاير ووعدنى انه هيبطلها بس بقالنا شهر واكتر وحاول يبطلها بس رجعلها تانى ومش عارفة والله اعمل ايه انا عامة بحبه وربنا اللى يعلم اللى فى قلبى ليه بس تدينه قليل عنى وكمان موضوع السجاير ده هيموتنى لانها معصية وهو بيكلمنى دلوقتى بكل حنية ورقة وانا بكلمه بكل قسوة وعنف وهو برضه مستحملنى ومش عارفة اشيل الشكوك دى ازاى هو اللى انا واثقة منه دلوقتى انه هنا من اول ما رجع مكلمش بنات ولا صاحب وهمه دلوقتى الاول والاخير يلاقى شقة عشان نتجوز وكل مثلا ما يكلمنى ويقولى وحشتينى او نفسى اشوفك اقوله حرام تقولى كده وهو بدأ يتخنق منى وحاسه كمان انى بدأت اكرهه فى الدين مش اساعده عليه. ساعدونى بالله عليكم ازاى اشيل الشكوك دى من دماغى وهل اقبل بيه وهو بيشرب سجاير كده ولا اسيبه خالص لحد ما يبطلها وبعدين ابقى البس الدبلة تانى والله ما انا عارفة واسفة على الاطالة. اختكم فدوى