مشكلتي مع زوجة أخي ! - منتدى عالم الأسرة والمجتمع

26-12-2007, 05:56 AM

alod

عضو جديد

تاريخ التسجيل: Jul 2007

المشاركات: 40

مشكلتي مع زوجة أخي !

السلام عليكم ورحمة الله وبركاته

كيف حال جميع الاعضاء ؟؟ يارب تكونو بخير وبصحة وبأحسن حال ..

انا اليوم حابه اقلكم مشكله حاصله عندنا بالبيت وبصراحه انتو ناس اثق في ارائهم جدا .. واتمنى كل واحد يقرأ موضوعي ومشكلتي يعطيني حل بعد تفكير عقلاني لاني انا فعلا محتاجه كدا.. والله يجعلو في ميزان حسناتكم .. بس معليش راح اطول عليكم في الكلام شويه .. سامحوني

..

المشكله وهيا انو :

اانا اخوي الكبير متزوج من 3 سنوات تقريبا .. وعنده بنت الله يحفظها .. المشكله في زوجته ..هما ساكنين معانا بنفس العماره يعني نعرف عنهم تقريبا كل شي واغلب الاحيان هما عندنا ..

المهم زوجة اخويا هادي كانت دايما تتكلم عن وعن اخواتي وكنا نطنش ومانعطيها اهتمام ولا فكرنا اننا نسويلها مشكله .. وغير كدا ماتصلي ولا فرض وكنا دايما نحاول ننصحها ونقلها انها لازم تصلي وكدا مايجوز بس مافي فايده وبرضو سكتنا وطبعا الاهم انها ماتهتم بالبيت ولا بأخويا ولا شي يعني بالنهايه كدا هيا انسانه مره مهي قد مسئولية الزواج لكن برضو سكتنا على دا كلو وقلنا ان شاء الله تتحسن مع الايام ودي حياتهم هيا واخويا .. لكن للاسف قبل كم شهر لاحظنا عليها انا واخواتي انو طول الوقت لمن تكون عندنا جوالها يرن وتاخد الجوال وتروح تكلم بعيد وهادا الموقف اتكرر كتير .. وفي يوم كنا انا واختي بنشوف جوالها اكتشفنا في رساله من رقم غريب بإسم اختي استغربنا وانصدمنا اخدنا الرقم واختي اتصلت من رقم تاني ورد علينا رجل!!!

وقالها على طول انتي فلانه الي هو اسم اختي طبعا انصدمنا وقالها بصراحه انا اعرف فلانه في البيت الفلاني في الجامعه وكل مواصفات اختي وقلها انو يكلمهامن زمان ورقمها كذا كذا الي هوا طبعا رقم زوجة اخويا .. طبعا انصدمنا انا واختي وعرفنا انها تكلم رجال بأسمائنا وحاولنا نوصل الموضوع لبابا للكن برضو كنا خايفين نخرب بيتها وقلنا حرام .. اكيد لو هيا فعلا كدا ربنا حيكشفها لوحدو .. وغير كدا كل مانخرج احنا كلنا تتطلع عذر وتقول ابغا اجلس في البيت احنا كلنا نستغرب .. ليش تبغا تجلس في البيت لوحدها!!!

اكيد عندها شي ..
لحد ماجا اليوم الي ربنا كشفها على حقيقتها.. قبل كم يوم احنا ماكنا موجودين وبابا كان في المسجد وقت صلاة المغرب وبس كان موجود في البيت سواقنا وجا ولد شاب وسئلو سواقنا تبغا مين قالو ابغا جاركم فلان الفلاني هاذا واحد ساكن عندنا شقتهم قدام شقة اخويا .. المهم طلع .. لكن سواقنا حس انو فيه شي طلع وراه لقااه يدق الجرس على بابا زوجة اخويا وفتحتلو الباب ودخل عندها وطبعا اخويا مو موجود كان في الدوام مرابط يعني مره مايرجع البيت .. وشويه سواقنا طلع دق عليها الباب وقلها مين دا الي عندك ؟؟ طبعا خافت وارتبكت وقالت هادا واحد يبغا جارنا الي قدامي دخلتو شويه يستناه !!!

شوفو درجة الوقاحه لحد فين يعني عذر اقبح من ذنب ..
طبعا السواق لمن جا بابا من المسجد قلو كل شي وبابا كلم اخويا ورجع وكلم ابوها وجو اتفااهمو والسواق قال هادي مو اول مره يشوف ولد يدخل عندها .. وللمعلوميه السواق دا عندنا من زمان وجدا محترم ويخاف علينا .. المهم بابا قال للسواق يحلف اليمين على المصحف انو هوا صادق والسواق حلف واقسم قدم ابوها واخويا .. وطبعا اخويا قال خلاص يبغا يطلقها ومايبغاها .. وبصراحه كلنا مانبغاها خلاص بعد ماعرفنا انها انسانه كدا حسبي الله عليها ..
لكن المشكله والي قاهرني انو اهلها مو مصدقيننا يحسبونا نتبلى عليها وجلسو يدعو علينا ويتكلمو علينا انا واخواتي مع انو والله فيه اشياء كتير احنا ماقلناها عليها من زمان انا واخواتي لكن ربنا كشفها ..

وغير كدا كلمت اخويا وقالتلو انها راح تشهر بيا انا واخواتي .. والله احنا مالنا ذنب في دا كلو .. انا مني عارفه اش اسوي انا مابغاها تتكلم علينا وبصراحه خايفه منها لانو عندها صور لنا .. واتوقع منها انها تسوي اي شي لانها انسانه ماتخاف الله .. حسبي الله ونعم الوكيل مو كفايه الي عملتو فينا وفي اخويا ..انا ما اقول اخويا ملاك صح هما مو متفاهمين ودايما بينهم مشاكل لكن ماتوصل لدي الدرجه انها تخونو وتدخل رجال بيتها ..صح ولا لا ؟؟

الله يخليكم ساعدوني قولولي الي عملناه صح ولا خطأ؟؟ واحنا من حقنا اننا مانبغااها بعد كدا زوجة لأخونا ؟ ولا احنا بنظلمها ؟؟ يعني ياريتها اعترفت وقالت انا فعلا غلطت وسامحوني لا ابدا انكرت وقالت انو السواق معجب بيها ويبغاها عشان كدا اتبلى عليها وقالت اصلا انا الي مابغا اخوكم ولمت ملابسها على طول ...

الله يخليكم كل الي يقرا موضوعي يقولي احنا نعتبر ظالمين ؟؟ ويقولي اش ممكن اعمل لو فكرت تأذينا انا واخواتي .. اخويا يقول كزابه ماتقدر تسوي شي بس انا متأكده انها تقدر تسوي اي شي ..

وغير كدا هيا اخدت بنتها معاها وبصراحه احنا مانبغاها تعيش معاها بعد ماعرفنا عنها كدا مانبغا البنت تسير زيها .. يعني ابغا اسئل هل من حقنا الشرعي اننا ناخدها دحين هيا عمرها 3 سنوات والله احنا مانبغاها تعيش بعيد عن امها بس ام كدا ماتنفع اكيد اانتو فاهمين ؟؟
هادي المشكله تقريبا اســـــفة اني طولت عليكم لكن محتاجة ليكم بعد الله صدقوني
الله يخليكم ساعدوني بأرائكم ..

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه