السلام عليكم ورحمة الله وبركاته .

والله مدري كيف أقول .. بس ضغطي مرتفع من بنتي مرة . الله يهديها .

بنتي عمرها ثمانية سنوات .. مشكلتها الا مبالاة بشكل مو طبيعي .

أبغ حل مناسب أستخدمه معاها . نفذت كل الحلول اللي عندي .

راح أبدأ لكم القصة من أولها .

كل يوم الصباح أقومها الساعة خمسة وربع تقريبا عشان المدرسة . الباص يجيها ستة وعشرة تقريبا

ولما تنزل مع أبوها للباص أقوم أختها الثانية وأجهزها للمدرسة .

تخيلو تصحى من نومها بعد معاناة والله معاناة (بالرغم إنها تكون نايمة عشر ساعات ) . ولما تصحى

بعد جهد تجلس في الحمام نص ساعة !!!!!!!!!!!!!!!!!!!!!!!!!!

أنا أتجنن .. طبعا باب الحمام أنا أخليه مردود حتى أشوفها وأروح وأجي عليها .. وكل شوي أستعجلها

لكن غير مبالية ولا مهتمة . تفرش أسنانها عشر دقايق . وتتوضأ خمس دقايق . !

وبعدين تدهن الكريم حقها كمان تلاث دقايق . وتصلي سبعة دقايق ..

وأنا أكون منتظرتها عشان ألبسها المريول وأسوي شعرها وأفطرها ..

واكون خلصت شغلي كله من تجهيز لمريولها ومريول أختها وشنطهم وشراريبهم بس منتظرتها تطلع من الحمام

طبعا الباص راح يفوتها أكيد ..

يا الله .. المهم أنا وأبوها أختلفنا على موضوع عقابها ..

أنا خلاص فاض فيني الأسلوب دا . لاتقولولي صحيها أبدر من كدا . يعني أنا أقوم من الساعة خمسة

مستحيل راح أخليها أربعة ونص . !

اليوم أبوها قال لي قوليلها الساعة ستة لازم تكوني مخلصة . وقلت لها ولا أهتمت ..

لبستها المريوم وخلصت لها كل شي وجلست تفطر ببطئئئئئئئئئ إلى الساعة ستة وعشرة تقريبا

أنا قلت لها بما إنك اليوم أتأخرتي . راح ينقص مصروفك اليومي . طبعا سوت حركة إنها مو مهتمة .

وبكرة بأفكر أجيب هدية لها ولأختها ولو قامت بنفس الطريقة دي . ماراح تاخذ الهدية . ولو إني عارفة

ومتأكدة من ردة فعلها إنها ماراح تهتم بتاتا

وكمان لو فاتها الباص وغابت . أحلى ما عندها تحط راسها وتنام (سويناها قبل كدا ). ولا فارقة معاها .

وتفوتها الدروس وأنا اللي أشرح تاني . بالله إيش أسوي ؟

حتى المدرسة ماصارو يحاسبوهم على التأخير .. وتقول لما أروح متأخر محد يقو ل لي شي

تعبت والله تعبت معاناة وحرق أعصاب طووول السنة

وعليكم السلام ورحمة الله وبركاته


بصراحة ياام لجين أنا اعاني نفس معاناتك مع ولدي وتخيلي هو في المتوسط حالياً ومازلت أعاني

ومن صغره وأنا ادفه دف علشان يخلص ويخرج

ومالقيت حل معاه



بس أقترح حل جربيه بما إن بنتك صغيرة وأنا للاسف ماجربته

بس أتوقع ينفع

حطي جدول بأسماء البنات وأيام الأسبوع وكل وحدة تتجهز في الموعد المحدد حطي لها نجمة أمام اليوم اللي تجهزت فيه بدري

وأخر الأسبوع أجمعي النجوم

وأكثر وحدة عندها نجوم اشتري لها هدية اخر الأسبوع

والله يخلي محلات أبو ريالين بعشر ريال خليها تختار خمس هدايا مختلفة


أعتقد كذا بتتحمس


جربي وبشرينا

__________________

في قصة قريتها مره عن طفل نفس حالة بنتك .. تعرفين امه اش سوت ؟؟

قالت له اذا ماكنت جاهز انا بنفسي بشيلك وبدخلك الباص ببجامتك .. طبعا الولد ظن انه امه تضحك .. وفعلا امه قامت سوت هالشي .. ومن بعدها تأدب هي القصه طويله بس ماذكرها عدل ..

بس مغزاها خليها تحس فعلا انك راح تسوي هالشي .. وقولي لها لو تصيحي ولو شتسوي ماراح ارجعك البيت وخليها لو توصل عند الباب انك صج بتطلعينها عقب قولي لها ركض الحين في خمس دقايق اذا ماكنتي جاهزه ابوكي بيشيلك وبيحطك في الباص وساعتها تصرفي مع البنات اللي بيضحكون عليك وعلى المديره اللي بتخاتفك لانك ببجامتك !!!

__________________
يارب فرج كل هموم نساء ورجال المنتدى وارزق كل بنات المنتدى الزوج الصالح ... وارزق من يتمنى الذرية الصالحة .. اللهم آميييين ...

يارب يا رحمن يارحيم يا قادر على كل شي .. يارب فرحني في اختي نايت ... عاجلاً غير اجل ...
يارب نسمع خبر ملكتها على رجل خير طيب صالح فالح يعينون بعض على طاعتك وعبادتك ...

يسعد قلبك يا أم جمانة .. بدأت بتنفيذ الفكرة .. وسطرت الجدول ..

إن شاء الله بصورة وأنزله لكم قريب ..

وراح أجيب الهدايا وأشوف الإسبوع هذا .. وأبشرك ...

المهم أخلص من نكد الصباح والمسلسل اللي موراضي ينتهي ..

مرورك أسعدني

اهلين سمو الاميره شخبارك وبنياتك الله يحفظهم


انا اشوف بنتك هذي ينفع معاها الحرمان

يعني اطلعوا لملاهي سوبر ماركت

واتركوها بالبيت عند جدتها لحالها


وعلميها سبب حرمانها


وكرري العقاب كم يوم

يارب تشوفيهم عرايس

ويكون صلاح لها ....

__________________

	لاتقل أنا طيب فالكل طيب! ولا تقل أنا متعب فالكل متعب! ولا تقل أنا حزين فالكل حزين! بل قل فقط الحمد لله صبحاً ومساءً ، ليخف أنينك وتضمحل أوجاعك وتقل أمطار دموعك ... وعش هانئاً مؤمناً...متسامحاً عفواً متعاطفاً مع الغير..و ابتعد عن النزاعات والأحقاد والانتقام فلن يكسبوك سوا الندامه في الدنيا والآخره..

هلا يا فيافي .. الله يسعدك ويبارك فيكي يارب

أنا بخير والبنات بخير الحمد لله

فكرت أحرمها ...

أنا أزور أهلي تقريبا كل أسبوع .. وفكرت إني الأسبوع هذا ما أخذها .. لكن راح تجلس عند جدتها

وهي عند جدتها راح تنبسط ... أكل وتلفزيون ويمكن يجوهم ضيوف يعني بسطة ..

لكن ممكن أحرمها من أفلام الكرتون اللي هي متابعتها ..

ولو إنها راح تسأل صديقاتها إيش اخر الأخبار .. وسوار لقى أمه ولا لأ .. لكن معليش شوي شوي بأحاول

اليوم رجعت من المدرسة وجات تسلم علي ..فقلت لها أنا اللي يبغ يسلم علي ويحبني لازم يقوم الصباح بدري

سمعت الكلام ومشيت .. مدري فهمت ولا لا

أشكرك حبيبتي علىالمرور .. والسؤال ...

حبيبتي بنتك بعدها صغيرة وهي الحين مثل العجينة تشكلينها مثل ما بدك.

فرحانة الك انك مهتمة بموضوعها خاصة مثل ما قلت انها صغيرة.

وأي أسلوب تشوفيه نفع معاها حاولي تستمري عليه.

وانا بإنتظار نتائج الجدول.

الله يوفقك .

__________________

لا إله إلا الله
محمد رسول الله

والله الله يعينك بنتك غريبة
اسمعي نصيحة حاملة الهم وجربي
بس اتفقي بالاول مع المديرة روحيلها واشرحيلها الوضع
عشان لو اجت بنتك بالبيجاما عالمدرسة ماتناديكي المديرة وتصير مشكلة
فاتفقي معها وقولي لو اجت بنتك بالبيجاما الاسباب وانك بدك تربيها وتعاقبيها
جربي معها الحرمان و الهدايا لاخوتها
ويارب الله يهديها

__________________

آآآآآآآآه ياأم لجين جيت على الجرح انت وحدة ماشاء الله اللي شايلة همها أنا اسم الله خمسة يروحوا المدرسة وكلهم صغار يعني أكبرهم 13 سنة ... تعال شوفي السمفونية الحزينة اللي كل صباح من خصام على التأخير وغيره ... المشكلة عند بنتي سنة أولى لو تقولي لها تعالي بس بصوت مرتفع شوية ماتشوفي غير الدموع آذنت بالهطول مع إن أختها توأمها ماشاء الله عادي ماهي بكاية زيها .... ماودي أطول عليك بس حبيت تشوفي معاناة غيرك عشان تشوفي إن مشكلتك بسيطة والله يعينا ويعينك .....

__________________
اللهم إن أبي نزل بك وأنت خير منزول اللهم أكرم نزله ووسع مدخله وارفع درجته وجازه بالحسنات إحسانا وبالسيئات عفوا وغفرانا .. آمين

ربنا يهديها و تكون زي ما بتحبي
أهم شيء تدعيلها في صلاتك عند السجود ان ربنا يهديها و تصبح مسؤولة و مطيعة لك فدعاء الوالدين مستجاب بإذن الله

__________________