السلام عليكم ورحمة الله وبركاته..
أعضاء هذا المنتدى الرائع , بعد استخارتي أولا ,ثم طلب حبيبي الخائن (عفوا اقصد زوجي أبو ابني) سأكتب مشكلتي ولا أعلم كيف أبدأ بسرد جروحها,, وأطلب من حضراتكم توجيه الكلام لزوجي لأنه اقسم بالله أن يرضى بحلولكم ,فأرجو أن تكتبوا ما يحرك ضميره ويشعره بناري ولا تنسوا أن كلامكم سيترتب عليه حياة أشخاص,لأني والله الذي لا إله ألا هو أني سأكتب ما حدث من غير أن أظلمه, ونريد حكمكم,,
أبــــــــــــــــــــــــــــــدأ بسم الله...
أحببت زوجي لأنه يمتلك مواصفات جيدة - أمتدحها أمامه- من الطيبة والتسامح , وأحببت أهله ولم أقصر يشي من ناحية زيارتهم وتوجيبهم (بشهادته هو)وهو أحبني على حد قوله,كنت لا أقصر معه بشي (حيث أسأله بين فترة وأخرى وهو من يخبرني بذلك)عشنا أربع سنوات مع بعضنا يتخللها ليال رومنسية أقوم بأعدادها ومفاجئته بها, كذلك أقوم بإهدائه مع العلم اني لست موظفه بل من مكافأة الجامعة واذكر مرة اني بعت من ذهبي لأهديه فاكس كان يحتاجه في شغله المهم لا أنسى شتاء السنه الماضيه مع برودة جو تلك الأيام إلا أن حرارة ما اكتشفه قلبي قد أذاب جليدها, في ذلك اليوم كعادتي قررت أن أفاجأ زوجي بجوال (هديه له) فسألت عن اخر جوال وكلفت اخي بشرائه وأعطيته المال لا أنسى وقتها تعليقات اخواني على مطالبتهم لي بهدايا على سبيل المزح, اخذت الجوال وكتبت كلمات حب على الكمبيوتر وطبعتها بكرت وغلفت الهديه بصندوق احمر يشع حبا ووفاءا من قلبي وارفقت الكرت معه, ورجعت لشقتي ولبست و استعديت لمقابلة زوجي وانا اخفي الهديه خلف ظهري ,,جاء زوجي واعطيتها اياه ,كان ردة فعله غريبة لكن تجاهلتها وقلت اكيد فرحان من الداخل ذهب ونام ,, في صباح اليوم الذي بعده وضع شريحته بالجوال الجديد وبدأ ينقل الارقام من جواله القديم إلى الجديد ولكن ذاكرة البطاقه لم تنقل كل الاسماء ومازالت هناك اسماء في جواله , المهم ترك جواله القديم و أخذ الجديد , وفي عصر يوم الخميس طلب مني زوجي أن اخذ جواله القديم وأضع شريحتي فيه لأنه يحتاج بعض الأرقام وكنت وقتها سأذهب لأهلي وفي طريقي لبيت أهلي قلت له :"تبغى أطلع شريحتي من جهازك واعطيك إياه ,,قال :لا خليه معك وانا اذا بغيت منه رقم دقيت عليك واخذته منك,قلت : خلاص"
بعدها نزلت عند اهلي واخذت أقلب بجهازه اللي عطاني أياه بيده وما اخذته من وراه , واللي راضي اني افتحه وانقل منه الاسماء له , يعني اكيد ماني مذنبه بفتحي للجهاز, ومارحت أفتش من وراه ولا عمري شكيت فيه أو اخذت جواله وفتشت فيه بس لما قدر ربي أني أكشفه وما أظل مخدوعه كتب ربي أنه هو زوجي بنفسه كأن يقول خوذي اقري فضائحي وخيانتي لك وأنتي نايمه واشقة فيني ,,, وربي ياناس اني ما شكيت فيه قبل كذا,,
المهم جتني رساله على جوالي (طبعا الجهاز جهاز زوجي ) فتحتها وبعدها حبيت ارسل رسائله وقعدت ادور في الرسائل ألا والصاعقة كادت أن تقضي على حياتي بالرغم من أني حتى بعد ما قرأتها مازالت أمني نفسي أن زوجي ما أرسلها وأن شخص اخر هو اللي مرسلها من جهازه مع العلم انها مخزنه بحرف (ق) وكان نص الرساله قذر جدا يدعو للزنا وهو( وش رايك ب.............<<<<فعل يدل على الزنا بالعامي لا أود ان اخدش القارئ به..(اكيد كان ناسي يمسح المسح)
صحيح نسيت أقول لكم أن حتى جهاز جواله القديم والذي استخدم ازراره وتحدث به ليخونني انما هو هدية مني له في ذكرى زواجي الأول.
دارت بي الدنيا, وشعرت بحرارة ووالله وكأننا في عز الصيف مع ان برودة الجو عاليه , تماسكت وانتظرت زوجي ليأتي على موعده في الليل ليأخذني لعشي الذي طالما حلمت أن يضم احب زوجين,, المهم جاء زوجي الساعه 11 تقريبا ركبت معه وانا ساكته من هول الصدمة لأن لم تكن لها مقدمات أو لأني أثق فيه ثقه عمياء ولم يسبق لي ان نبشت خلفه ,,وكنت امني نفسي الى الان ان ليس بصاحب الرساله ,, ولكن ليتها هذه الحقيقة..
فتحت الرساله واعطيته الجوال ونحن في السيارة وسألته :"وش هذي الرساله"سكت شوي :"وقال ما أدري؟
قلت كيف ما تدري وهي بجهازك؟قال ما ادري وبس,,قلت انا ادري ,,بأدق على الرقم اللي ارسلت له الرساله وهو يذكر من اللي مرسلها له,,قال: دقي ,,أخذت ادق من جوالي ع الرقم وما رد حاولت وما رد,,قلت لزوجي بالله عليك ان تقول لي السالفة قربت انها من الصدمه قال:مـــــــــــــــــــــــــــاأدري ,,تخيلوا دخل ينام اخذت جوالي وعاودت الاتصال بالرقم لأنه قال لي زوجي عادي دقي,,سبحان الله كان ضامن انها ما راح ترد لكن قدرة الله وارادته فوق كل شي ,,أراد الله أن يفضحه بعد أن ستر عليه لسنوات,, رد الرقم الذي كان زوجي مرسل لها الرساله القذرة, وإذا بها انثى (عفوا هي اقصد الخائنه,لأني بعد ذلك عرفت انها متزوجه ولها اطفال)
سألتها سؤال مباشر: قلت لها تعرفين صاحب هذا الرقم (..............)ذكرت رقم زوجي .
والله ياناس سبحان من أنطقها تقولون منومه تنويم مغناطيسي قاعدة تجاوب على أسئلتي (فعلا اراد الله ليفضحه) انا ع طول اول ما ردت دخلت على زوجي وانا حاطة السبيكر ابغاه يسمع كل كلمه تقولها واشوف ردة فعله,,
المهم جات الصاعقة على قلبي اكثر من صاعقتني عند قراءة الرسالة لأني كنت أمني نفسي وقتها انه ليس هو المرسل ,, اعترفت بالعلاقه وكانت مدتها 7 سنوات يعني قبل لا يتزوجني , وكانت تقول انها خلاص ما تبغى تكلمه(ما أدري يمكن لقت واحد أفضل) لكن هو (تقصد زوجي )مُصرّ,تحلف انه عشرات الاتصال تلقاها له بالوقت الواحد وهي ناويه تقطع العلاقه وتخيلوا حتى عضوه الذكري مصوره ومرسله لها,, وكل كلامها السابق يسمعه زوجي وانا ساكته لأني جتني صدمه ورغبه بالاستفراغ(اكرم الله الجميع) وأسودت الدنيا بوجهي , وقطعت الاتصال,, وزوجي حبيبي عشيقي الذي اهديه الجوالات ليخونني بها ساكت بدون تعليق,,, سبحان الله العلي العظيم انا غافلة عن زوجي وافعاله لكن عندي رب سبحانه يأخذ حقي حيث أن زوجي لم يستطع ان ينكر أي كلمه قالتها,, ولكم أن تتخيلوا قوة الصدمة على فتاة لم تلبس حتى البنطلون امام النساء, على فتاة حفظت زوجها بالغيب وصانته ليس لأنها ليس لها رغبه بالعلاقات بالجنس الآخر مع العلم ان كل وقت زوجي بالشغل يعني الاغذار جاهزة لدي,,لكن لم أفعل ,,يعلم الله أنه خوف منه أولا ثم صونا لزوجي ومحبته ثانيا,,
نعود لموقفي,,اسودت الدنيا بعيني ولم أرى أي شي قمت من عند زوجي بعد أن اقفلت السماعة ولم انطق ولا بكلمة واحدة للساقطة ,, غير الله يستر عليك...
ذهبت لأخذ عباتي حيث كانت الساعة وقتها فوق12 ليلا وطفلي نايم,,طلبت من زوجي ان يذهب بي لبيت أهلي هذي أخر كلمه قلتها له لأني بعدها فقدت الــــــــــــــــــــــــــــــــــــــــــــــــ ـــوعي ولم استيقظ الا وانا بقسم الاسعاف للمستوصف الاهلي وكانوا يحاولون اعطائي ابره مهدئة لأني بحسب كلامهم اني منهـــــــــــــــــــــــــــــــــارة ,, اذكر وقتها اني ملفوفه بعباءة فقط من غير أي غطاء ودموعي ملئت ارجاء غرفة الاسعاف ,بعدها طلبت من زوجي أن يرجعني لشقتي ولا اريد مهدئات ولا شي ,,اللي ابغاه اني ارجع لأهلي,, حاولت اتغطى بعباتي ودفوني بالكرسي للسيارة لأني وقتها ما استطعت أن ألم شتات جسمي وأقف على رجليني ,,رجعت لشقتي وقمت اصرخ لأن طفلي مو موجود والله العظيم احسبه اخر يوم بحياتي مهما شرحت لكم الألم اللي سببه ما راح يحس فيه الا اللي مار فيه,, قال زوجي لا تخافين انا ناديت الجيران يجون ياخذونه من الشقة اول ما طحتي علي والحين هو عندهم بروح اطلع اجيبه,,,وكان يقول لي والله خفت احسبك متي من الصدمه.
المهم ما نمت ذيك الليلية ما صدقت يجي صباح الجمعة الا وادق على سواق اختي ابغاه يجي ياخذني لبيت اهلي,, حتى وانا في قمة ألمي ما نسيت أمر على زوجي وأخبره أني بروح لأهلي مع سواق اختي ,,طلبني ورجاني اني أجلس وقال على الأقل لا تقولين لأهلك شي ,, روحي ارتاحي وانا اجي اخذك ,, طبعا مارديت ولا بكلمه اخذت اغراضي وولدي وجروحي وبقايا قلب وشتات انسانه عاشت في ذيك الشقة وانخانت من غير سبب,,
ما راح ادخل في التفاصيل وموقف اهلي , لأني وقتها ما علمتهم ,,بس قلت لهم اني عندي انخفاض في الضغط وتعبانه وأبغى اريح عندكم,,
بالتأكيد ما توقفت رنات جوالي ورسائله وكلها من زوجي(عفوا من جارحني) بعد يومين فقط من هذه الحادثة اقنعني انه غلطان وندمان وما راح يرجع خاصه وانه شافني بغيت اموت على قوله ,,,بس ولو ,, حطوا نفسكم مكاني,,تخيل /ي يخونك حبيبك وخيانه بشعه من غير سابق انذار واعتراف من قبله وحلوف اني ما قصرت معه,,
طبعا شي لا يطاق,,,ذكرت له ان عودتي مستحيلة لأني ما اقدر انسى وراح تكون حياتنا صعبه(شك,,وجرح,,.....)قال انا راضي,,نارك ولا جنه غيرك,,
راح تستغربون اني رجعت بعد يومين,,من غير شروط ألا ان يتحمل تغيري الذي سببه جرحه لي ويراعي نداوة جرجي الذي مازال ينزف منه,,وافق وذهبت معه وأهلي لم يعلموا عن أي شي..
نزل وزني كثير,,, وتأخرت في دراستي (انا طالبة ماجستير)وصرت ما انام سوى ساعات بسيطة وباقي الليل كله بكاء لوحدي,,وبعد مرور اسبوعين,, ما تتخيلون الصـــــــــــــــــــــــــــــــــــــــــــــــ ـــــــــــــــاعقة الأعظم من الأولى..

__________________
استغفر الله

واحنا جالسين نتقهوا قلت له عطني جوالك (لسبب ذكرته له) المهم تلعثم ,,وانا والله متأكدة ومصدقه انه متأثر ولا تخيلت ان ممكن يصير الى الان في غيه ,,,ولكن الواقع ليس كما يرغبه قلبي واحاسيسي,,بل امرّ من ذلك,اكتشفت انه على علاقه جديدة مع وحده هي من بدأت بمكالمته وهو ماشاء الله ما قصر,, الظاهر قال خلها تحل محل اللي مشت,,, والله ياجماعه اني مذهوله اكثر من اول وللعلم خيانه مرة اخرى وبالجوال الجديد اللي ماله 3 اسابيع شاريته له هديه توقعت ونأكدت أنه متأثر بس لهدرجة ما عنده احساس ,,, قمت ولميت ملابسي وانا ابكي حتى ولدي الصغير رحمته قام يصيح معي,,وهو يحاول يثنيني و يحلف أغلظ الايمان انه مو قصده,,,لكن قررت اني ما رجع لأن ضربتين بالراس توجع..
رحت لبيت اهلي,, لكن هذي المرة علمت امي واكدت عليها انها ما تخبر احد وخبرت امي اني ناوية على الطلاق,
حاول ان يرجعني وبعد مكالمات ومحاولات رجعت مع تأكيدي له ان حياتنا ستصبح لا تطاق بسبب شكي الذي هو سبب فيه,,لكن هو توعدني اني ما أجيب طاري لخيانته لي وقال انسي الموضوع , ولا تنكدين علينا حياتنا<<<<شين وقوي عين
رجعت معه وصارت مشاكل متعلقة بعدم نسياني لجرحه العميق لي,, لكن هو الله يسامحه كان اناني ولا يبغاني حتى ابين حزني ويقول انسي وسامحي,,اللي يسمعه يقول جلست سنين اذكره بخطأة هي شهور وبس اخذت على نفسي عهدت اني افتح صفحة جديده معه وانسى الموضوع (أقصد اتناساه) وفعلا دعييييييييييييييييييييييييييييييييييييت ربي انه يطفي النار اللي بقلبي ويهدا سري وينسيني,, وفعلا جلست سنه و5 شهور وانا ماجبت طاري للموضوع ابد,,,
المهم القصه اعلاه انا ذكرتها لكم لتكونون بالصورة ,,ولتستطيعوا الحكم
بتقولون بعد كذا وين المشكلة اللي تبغيننا نحكم فيها ؟؟
اقولكم قبل كم يوم جاء طاري العلاقات المحرمه المهم جر الموضوع بعضه وقلت لزوجي اصلا معظم البنات اللي يلعبون يكلمون كذا واحد يخلونه يشحن البطاقات واذا ملوا منهم يمشون ويتركون الرجال,, قال لي اكيد بس بعد ما ياخذ منهم اللي هو يبه(اكيد فهمتوا عليه) قلت هذا يمثل حتى رايك انت وينطبق عليك؟ يعني كل رجل له علاقه لابد ان مسوي شي؟؟التفت علي وضحك ضحكة مدري وش تبي..
انا هنا انقهرت وسكتت وضاق صدري وتذكرت الموضوع السابق وعلاقته مع العلم واني والحمدلله ارتحت وما اذكرها بس كلامه السابق أثر فيني وخيل لي ان علاقته السابقه وصلت لمدى ابعد من الرسايل والمكالمات..
كان الحديث السابق بالسيارة نزلت عند اهلي,,ونمت عندهم وبعد ما رجعت كان واضح انه ضايق صدري,,راح مشاني وحبيت اني افضفض له واعرف ليه قالي هالكلام,, بس اول ما بديت اتكلم واقول وش قصدك من كلمتك ذيك ,,الا وينفجر علي ,,اعوذبالله انتي مللتيني,(,أي ملل وانا والله العظيم مثل ما ذكرت اني خلاص ما عاد ذكرته بالموضوع ولا همزة ولا لمزة)
ويقول انتي بتخليني اتزوج وحدة غيرك ما تعرف عن ماضيي شي عشان ارتاح منك,,,وانا خلاص ما ابغى اسمع منك ولاكلمه,,يا ناس والله اني ما استاهل وش سويت له؟؟؟ عشان يهزأني,,اللي يسمعه يقول كل صبح تذكره بمواله وخيانته لي,,هو موضوع وتكلم فيه وما توفق في ذكر رايه يوم جيت ألومه يقول انتي غلطتي علي,,,
بـــــــــــــــــــــــــــــــــــــــــــــــــ ـــــــــــــــــــــــــــــــــالله عليكم اللي ابغاكم تجاوبون عليه,,
هل انا مخطئة والمفروض اني اتحمل اكثر مما لا أطيق؟
هل زوجي مخطئ؟
في الاخير اريد كلام ونصائح توجهونها لزوجي...
الله يوفق كل من يرد,,,ولا اراكم الله مكروها في من تحبون..

__________________
استغفر الله

احيي فيك صبــرك علــى زوجــك

احيي فيك كتمانك لشيء عظيم .. وهذا يتطلب قدرة هائلة

احيي فيك عقلانيتك انك ماتبغين تفضحين زوجك عند اهلك

احيي فيك صبرك واحتسابك في سبيل ان ماينخرب بيتك


اختي الكريمة ..

بدخل في الموضوع على طول ..

انا ماراح اقولك مين الغلطان انتي وله هو في السالفة الي ذكرتيها آخر شي

لكــن كل واحد يحط مكانه في مكان الثاني عشان يرتاح

الرجل عندما يخون ...ويُكتشف امره من قبل زوجته .. يتمنى يتمنى ان ماينجرح بطرفة عيــن

لان مجرد تعطينه .. كلمة وحده .. لو كلمة عتب .. بتصير كأنها سكين تطعن فيه

فى كل هالفترة هو حذر وصاير حساس جدا من اي كلمة تقولينها .. ويمكن مرات تقولين كلام عادي مش قصدك فيه حاجة وهو يفسرها بطريقة خاطئة

انتي ماتستاهلين التهزيأة بس هو مرة ملاحظ انك مش زي قبل ... واصلن ما تنلامين في ذلك

بس خــــايف كــل الخوف ان يسمع منك حرف " عتـــب " لأن هالحــرف كفيـــل بإن يقضــي عليـــه

وان جا يوم سمعتيه كلام من الزين .. راح تنهار مشاعره .. هو بنفسه بيحس انه ماله قيمة قدامك ويفضل ان يبتعد

انا نصيحتي اختي الكريمة .. مثل ماصبـــــرتي " هالصبــر العظيـــم عليـــه "

لا تواخذينه على تهزيأة .. انا بينت لك وضعه ومتأكد منه " لان من المواقف الي ذكريتها تبين انه حساس جدا "

ان اعتبر موضوعك فضفضة هم اكثر من ما هو مشكلة

لانك تبارك الله عليك ماسكة زمام الامور تمام واحنا علينا الدعاء لك ..


ربي يوفقك ويصلح زوجك ويشيل الهم من قلبك ..

ولا تنسين صلاة الليل لانها مرة مريحه ..

وطلبي من زوجك ان يدعي لك بان ينزال الهم الي فيك

تحياتي

__________________

متى زرت والدك آخر مرة ؟

اخيتي ريتاج .. اعانك الله على ما تحملتيه و تتحمليه ...
لا يسعني الا القول ..
من النادر الان ان نجد زوجات يتحملن خيانات الزوج و يمضين قدما في حياتهن
فاقول لزوجك .. لتحمد الله تعالى على هكذا زوجة .. فواحده في مكانها ما كانت لتسكت و ترضى و ترجع لك

خيانتك لم تكن نزوة عابرة... بل امتدت ل 7 سنواااات ,,,
و ليست مرة و انما مرتااننن..
وعادت معك دون ان تخبر احد او تدخل بينكم اناسا او حتى تعذبك لاشهر قبل الرجوع
فقط لانها تحبك ....
قد تحتمل المراة اي شي من زوجها الا الخياااانة....
لا تعتقد بانها ستنسى ماحدث بسهولة .. سيبقى جرح في الذاكرة .. ووجب علك ان تساعدها
على التغاضي عنه و عدم التفكير به ...

كانت حياتك جميلة .. اعطاك الله الزوجة الصالحة و الذرية و الحياة الهادئة فتكبرت على هذه النعمة و فضلت طريق يغضبه سبحانه ...
فلترضى الان بالنتائج التي كانت ستكون اقسى لولا رجاحة عقل زوجتك و تسامحها
فغيرها كانت ستفضحك في كل مكان و تفضح تلك المرأة و تطلب الطلاق قتتفكك اسرتكم الجميلة و لاصبح طفلك الان ضائعا بينكما

كل ما استطيع قوله الان هو اولا ان تطلب العفو منه سبحانه... ثم ان تحاول جاهدا لاضفاء الهدوء على حياتكم لاجلكم و لاجل طفلكم الذي لا ذنب له ... لا تهددها بالزواج باخرى و لا تتململ عليها بل اغدقها بالرومانسية
و انسيها ماحدث بالمعاملة الرقيقة و كن صادقا معها و اصبر عليها و اثبت لها ان ما حدث
ماض و لا يمكن ان يتكرر ... ليس خوفا منها و لكن خوفا من الله عز و جل فالزنا من الكبائر ومثلما تدين تدان في هذه الدنيا
اجبرها على الوثوق بك بالعمل و ليس بالقول... وهذه مهمة صعبة فاصبر ..

اقتباس:

ويقول انتي بتخليني اتزوج وحدة غيرك ما تعرف عن ماضيي شي عشان ارتاح منك,,,وانا خلاص ما ابغى اسمع منك ولاكلمه,,يا ناس والله اني ما استاهل وش سويت له؟؟؟ عشان يهزأني,,اللي يسمعه يقول كل صبح تذكره بمواله

الانسان لا يرى نفسه و تصرفاته ... نعم رجعتي معه لبيتك و مملكتك لكن ... هل تعاملك معه كما السابق؟؟
ممكن انك لا تذكريه بخيانته قولا .. لكن قد تكوني تذكرينه بالفعل
مثلا لم تعودي كسابق عهدك معه ,, قد تألمينه بنظراتك ... لم تعودي تهتمي بنفسك كالسابق
او مثلا اهملتيه و اوقفتي لياليك الرومانسية التي ذكرتيها .. فيحللها هو بانك لازلتي تتذكرين ما حدث
اعلم انه من الصعب جدا ان ترجعي مثل ما كنتي ,,, و ترجع علاقتكم كسابق عهدها بوقت قصير
او ان تعودي للتزين و و و لان الجرح موجود .. لكن طالما انك رجعتي لبيتك وقررت مسامحته
فلتكن مسامحة كاملة ... اضغطي على نفسك ... اعطيه اخر فرصة ... عودي فراشة ووردة فواحة تنثر
عبيرها على كل من في البيت ..

في النهاية لا يسعني الا ان اقول لكما معا.. لا تضيعا بيتكما الجميل ... و طفلكما الاجمل ..
فنتي تحبينننه بل و تعشقينه و الا لما سامحته و انت تهواها و تموت فيها و الا ما همك رجوعها لبيتكما
فلتحافظا على هذا الحب .. و تنسيان ماحدث و كأنه لم يحدث .
اجلسا معا و ليبين كل منكما للاخر ما الذي يضايقه منه
اما بالحديث او بالكتابة ... و لتتفقا على بدأ حياة جديدة بالفعل دونما الرجوع للماضي ....
ربي يوفق بينكم و يهدي سركم و يجمع بينكم و يزيد المودة بينكم و يبعد عنكم كل سؤ
اللهم حبب اختنا ريتاج لقلب زوجها و حببه له
اللهم و استر عنه عيوبها و استر عنها عيوبه
و اجعلها الزوجه الصالحة له و اجعله الزوج الصالح لها و احفظ لهم
ابنهم من كل شر يا ارحم الراحمين
قولو امين

__________________
سبحان الله... الحمدلله ... لا اله الا الله .. الله اكبر
سبحانك لا اله الا انت اني كنت من الظالمين
استودعكم الله

أخي الفهدي25...
أولاً أسأل الله العلي العظيم أن يوفقك ولا يريك مكروها..
ثانياً:أفهم من كلامك وتفسيرك لأفعاله ان سبب غضبه هو الخوف من تأنيب الضمير المتجدد له؟؟
وجزاك الله خير على نصيحتك بخصوص صلاة الليل فأنا احمدلله كثيرا ليلا ونهارا ان انعم علي بالراحه بعد ألحاحي ودعائي

__________________
استغفر الله

بالضبـــــــــــط ..

لأن هو من فترة إلى فترة يتذكر الموقف الي صار وعمره ماينساه

ولما تتغيرين بتردين مثل قبل واحسن .. كل ما احسنتي معاملتك معاه راح يتذكر ان في يوم من الايام ان خانك

وراح يلوم نفسه كثيييييير .. اذا مانهلت دمعته قدامك


انا من رأيي دام السالفة صارلها 1 وخمس شهور .. وهالرأي صعب جدا جدا بس حاس انك تقدرين لاني شفت فيك القوة من خلال قصتك .. .. حاولي اتردين مثل قبل .. لان الواحد مايقدر يغير في الماضي ... ولا يقدر يغير في المستقبل شي .. فى لازم الواحد يتمتع بالحاضر الي فيه.. حاولي تتمتعين مع زوجك

اطلبي منه سفرة حق مكان او كم يوم بفندق .. تغيير جو .. وحاولي في هالسفرة تبينين انك تغيرتي للاحسن .هو جدا جدا جدا صعب التغيير. لكن اضغطي على نفسك في البداية .. عشان تحصلين نتيجة افضل في النهاية


اهم شي انك تتمعتين .. طبعا هالذكرى راح تظل في راسك وراسه .. والرجال طبعه كتوم مايحب يبين شي

لكن لي حاولتي تتغيرين هو بيتغير والذكرى راح تقل .. وان شاء الله يجي الحب ويقضي عليها نهائي


انتي بتعيشين معاه بعد عمر طويل .. 30 سنة قدام .. صعب تتمون على هالحالة


لو راح الشغل .. عطيه لمست حنان بمسج فيه كلام حلو يخفف ضغطه في الشغل ..

احتويـــــــــــــــــه حاولي قد ما تقدريـــــن احتويـــــــه عشان مايدور على حد غيرك يحتويــــــــــه

الله يوفقكم ويخليكم لبعض

تحياتي

__________________

متى زرت والدك آخر مرة ؟

انا أؤيد وبشدة رأي الاخت نورة

__________________

متى زرت والدك آخر مرة ؟

أختي الغاليه,,نورا
قبل كل شي..أسأل الله العلي العظيم رب العرش الكريم ان يهدي والدك..وان يرزقك كل مما تتمنيه في الدارين..
ثانيا,,فعلا لم اعد اقوم بالليالي الرومانسية ليس بسبب خيانته ولكن لأنه سبق ان قال انها لا تعني له شي..
أما الهدايا ما زلت اهديه آخرهديه ساعة بمقدار 11 ألف ريال..
ولكن ما أقول الا الحمدلله على كل حال,,
واشكر لك ردك الذي يعني لي الشئ الكثير ويشعرني ان الدنيا لا زالت بخير حتى ولو بدت لنا انها تحتضر

__________________
استغفر الله

أخي الكريم ... الفهدي25
الله يبيض وجهك ما قصرت وردودك كلها بالصميم أسأل الله أنك ما تذوق اللي ذقته,,
بس استوقفني كلام من اللي كتبته وهو
احتويـــــــــــــــــه حاولي قد ما تقدريـــــن احتويـــــــه عشان مايدور على حد غيرك يحتويــــــــــه
ما اختلف معك اني لا بد ان احتويه بس الجزء الثاني لا اوافقك فيه
انا دايم اكرر ان الخيانه ليس لها مبرر,, وأن أخطاء الاخرين لا تدفنعي ان ارتكب اخطاء اخرى ..وألا كان اصبحت خائنه من زمان

اخيرا,,أسأل الله أن يرزقك كل ما تتمنى ويسعدك في حياتك..

__________________
استغفر الله

بالفعل كلامك صحيح بشكل عام

اما بشكل خاص .. زوجك ارتكب الخطأ مرتين .وصعب انه يعيد نفس الكرة. وانا دفعني اقول هالكلام .. بعد ماقال " لاتخليني اتزوج عليك وحدة ثانية "

او يمكن يقص عليه الشيطان .. ويحطها حجة ان يدور وحده ثانية

الرجل دائما يدور على الاهتمام والحنان والحب .. يمكن مايتكلم ويعبر عن مشاعره .. بس يبين بافعاله

لو اهتميتي فيه الحين .. بتشوفين في فرق .. للاحسن ان شاء الله

الانسان لو كان دايم شبعان يتذمر من الاكل ومايعجبه اصناف معينة .. اما لو كان ميت جوووع .. واكل شوي..
بيصير مثل المجنون .. من كثر المتعة واللذة الي وصل لها وهذا راح ينعكس على تصرفاته

عسى الله يهدي زوجك إلى صراطه المستقيم

تحياتي

__________________

متى زرت والدك آخر مرة ؟