السلام عليكم

و تقبل الله طاعتكم

خلال إجازة العيد كنت مع الأهل بعد سفر مدته أسبوعين

و كان من ضمن جدول الأعمال إذابة الجليد عن المشروع الخطير للبحث عن رفيقتي في الزنزانة الذهبية

و مفاوضات ساخنة مع الجنرال \ ماما ، نافذتي الوحيدة على كوكب الزهرة

بعد التحية العسكرية دار بيننا الحوار التالي :


مخي فاصل : هاه بشري يمه عساك لقيت لي عروسة

الماما : لا ما بعد صار شئ

مخي فاصل :كيف يعني ما صار شئ

الماما :فلانة الي بترتب بنت أختي الاجتماع معها بيسافرون و أجلوا الموعد إلى أجل غير مسمى

(الوالدة ذيبة تبي تقابل البنت و لا تبيهم يدرون أنها جايه تستكشف ، حركااااااات
عشان ما يصير فيه ربكة ولا حزازات )

- ما شاء الله الماما كلها ذوق -

مخي فاصل : طيب يمه الله يرحم والديك ، اشتغلي على أكثر من خط

الماما :ما فهمت

مخي فاصل :يعني علانة ( بنت من العائلة )

الماما :هذي صغيرة ولا أتوقع أبوها يزوجها قبل تكمل دراسة ولا يبي أحد من العائلة

مخي فاصل :لا إله إلا الله

مخي فاصل :الا ما قلت لك يمه ترى في تطور جديد في المواصفات

الماما :وش بعد ؟؟؟؟؟

مخي فاصل :غير أنها تكون خلوقة و ذكية و خفيفة دم و يتجلى فيها الجمال العربي

أبيها بعد دوامها طوييييييييل أو دراستها غثيثة

الماما :لييييييش

مخي فاصل :لاني ما أبي وجع رأس و جلسات استجواب ، تشتغل في نفسها و لا تشتغل فيني
وبعدين حريمنا على كل حال موظفة والا عاطلة لازم لها خدامة

الماما :خيييييييييير إن شاء الله و خزتني بعين تشوي الوجه

_________________________________________

الوالدة لها أكثر من سنة تدور ولا صار شئ حتى أنها تفكر باللجوء للخطابات

ربعي - الله يهديهم - يلعبون بي يقولون أنت ما شاء الله ألف بنت تتمناك
الشهادة لله خفوا بي شوي
__________________________

أنا الحمد لله كنت متفوق أيام الدراسة
الآن موظف في شركة الكل يتمناها
راتبي 12 ألف ريال بدون الانتدابات
أحافظ على الصلاة ، بار بوالدي
خلوق حنون ، أحب البزران موووت

__________________________
سلبياتي

زعول شوي (شايب )، فلسفة الحريم كروت و ورد و مدري أيش

هذي كلها ما دخلت مخي

دبيبة شوي

_________________________

بكل صراحة هل أنا كفو لشروطي و طلباتي
وش رأيكم ؟؟؟؟ أفتونا مأجورين

لولا المشقّة ساد الناس كلهم .... الجود يفقر والإقدام قتّال