لو فتاة مصرة تتكلم مع زوجك ماذا تفعلين؟!
انا قارئه قديمة جدا في المنتدى واعرف الاعضاء كويس لكني ماتوقعت اني بشارك فيه لكن بسبب هالازمة اللي انا فيها هاليومين اضطريت اني اشترك لاني ابي اخذ رأيي الاعضاء قبل لا اتصرف تصرف واندم عليه..
عمري ماتخيلت اني ممكن امر بهالموقف لكن للاسف مريت فيه..
اول شي بعطيكم نبذه عني انا عمري 26 سنة ومتزوجة من سنتين ونص تقريبا وماعندي اطفال وحاليا مغتربه في امريكا على اساس نكمل دراستنا انا وزوجي..
اول ما تزوجته من سنتين ونص يعني كنت اعرف ان عنده بالمسنجر كم بنت بس ما كنت مهتمه لانه هو ما يهتم فيهم ولاحظت بعدين ان وحده منهم دايم يتكلم عنها يعني يسولف معاي عنها هي من بلد ثاني وتدرس لحالها في كندا وكان مستغرب من اشياء في شخصيتها ويتكلم عنها عادي عندي..
انا لاحظت بعدين انها دايما اون لاين وكثييير تسولف مع زوجي وبدت ترفع ضغطي شوي لكن انا عارفه لو بقوله احذفها وبتهاوش معاه بيحذفها وبعدين يظيفها بايميل ثاني انا مادري عنه مثلا فا مسوية نفسي عادي واحاول اركز لما يتكلم عنها اشوف وش فكرتها ووش فكره هو عنها..
الزبده البنت انخطبت وقلنا الحمدلله وجتنا البعثه قبل كم شهر وكانت هي باجازة في بلدها وشاءت الصدف اننا نتقابل صدفه في مطار واشنطن ( هو يعرف شكلها لانها تحط صورها في المسنجر وعلى فكرة هي محجبه وهو بعد يحط صوره فعرفو بعض يوم شافو بعض) وجت وسلمت عليه وسلمت علي لانه عندهم في بلدهم هالشي عادي تماما..
راحت كندا واحنا رحنا كالفورنيا.. وبدينا ندرس في معهد اللغه ومرة طلبت مننا الاستاذه نفتح موقع فيه برنامج ونسمع ونكتب ملاحظات كواجب يعني وانا حاولت بكمبيوتري ومافتح الموقع بعدين تعبت ونمت وقمت الصباح بدري وزوجي نايم وقتحت اللابتوب حقه عشان اقدر افتح الموقع وعلى فكرة انا اعرف ايميلها لقيت مربع المسنجر يأشر كان ناسي مسنجره مفتوح وعرفت ايميلها وفتحت المربع وياليتني مافتحته..
لقيتها كاتبه كلام تتغزل فيه وتقوله غيابك مر وينك مادخلت مسنجر منزمان وحب وعشق وكلام يرفع الضغط قام قلبي يرجف وانا اقرا الكلام وماعاد قدرت اجمع والواجب سويته خرابيط ورحت المعهد وانا حالتي حاله وكل الاستاذات يحسبوني مريضه وجهي اصفر شي خيالي..
طول اليوم قعدت افكر وش بقول له مادري وش اقول وهو ملاحظ علي يقولي انتي مو طبيعيه اليوم تعبانه ولا وش فيك.. اخر الوقت بالليل فتحت الموضوع وعصب طبعا وكيف تفتحين مسنجري وهذي خصوصياتي والاسطوانه المعروفه المهم نشبت له وقالي ان البنت لها سنتين طبيعيه من شافتنا بمطار واشنطن وهي متغيره ولاحظت انها تعلقت فيني وتوهقت فيها ولاحظي ان لي فتره ادخل اوف لاين (وهو صادق وعشان كذا هي كاتبه له وينك منزمان مادخلت مسنجر) كنت اتهرب منها ومادري وشلون احذفها فجأة.. المهم انا عصبت عليه وقلت له كيف البنت فجأة تمون وتقول احبك ووينك ومشتاقه مستحيل فجأة اكيد صاير كلام قبل..
المهم انه حلف بالله واقسم انها من بدت تتغير وهو صاير يدخل اوف لاين وقايل اني لو لاقي هالكلام كان يكون عذر ممتاز اني احذفها ولا عاد احاكيها وفعلا حذفها فجأة بدون ما يكلمها.. انا شاكه انه قد صار كلام من قبل عشان كذا هي تجرأت عليه قلتله ابغاك تسألها قدامي ليش كتبتي هالكلام وانا بشوف ردها وطنشني وحذفها وقال انها ارسلت لي ايميل وحذفته مارديت عليها..
بعدها بيومين جاني اضافه على موقع للتعارف منها وقبلت قلت بشوف وش تبي انتظرت يومين جاني ايميل انها كتبت لي شي لما فتحت الموقع كانت مسحت اللي كتبته وبعدين حذفت نفسها من عندي اختفت يعني واستغربت وشكيت مررررة..
اليوم نام هو بدري وانا سهرانه لحالي ولاب توبه يطلع صوت مزعج مرة وكنت ابغا اسكره لقيت ايميله مفتوح وماقاومت بديت ادور ولقيت لها رسايل في مكان الرسايل المحذوفه كاتبه له لو سمحت اقبل ايميلي الثاني صدقني ماعاد احاكيك ولا شي بس ابغا اشوفك اون لاين والله مارح اقولك ولا هاي ولقيت رده عليها اوكي بقبله ومرسله ايميل ثاني تقول ماصدق اني خلاص مارح اقدر احاكيك ولا حتى انادي اسمك والله اني ابكي طول اليوم على الاقل اقدر ارسلك ايميلات عادي مواضيع منوعه يعني ولا ممنوع بعد ولقيت رده عليها ايميلات منوعه يعني قصده مو منها شخصيا معليش وانقهرت مررررررة هو مفهمني انه قطع العلاقه تماما لكن اذا بيستقبل منها ايميلات وبيقبلها بالمسنجر بايميل ثاني يعني مارح تنقطع واكتشفت ليش حذفتني بموقع التعارف هي كانت تحاول توصله عن طريقي لما رد على ايميلاتها حذفت نفسها من عندي حسبي الله ونعم الوكيل..
نسيت اقولكم انها تملكت الحين وعايشه حياتها ولا همها انا الحين محتاره مرة فكرت ارسلها ايميل اهددها اقول اذا ما بعدتي عن زوجي انا بوصل لزوجك واقوله على اللي قاعد يصير تخويف يعني و زوجي ماقدر اقوله شي لانه بينهار اذا درا اني فتشت ايميله هذا اولا وبيكون حريص انه يمسح كل شي ويغبي عني هذا ثانيا وثالثا مارح استفيد المرة الاولى صارحت وزعلت وعصبت والحين اظافته بايميل ثاني ولولا الصدفه يمكن عمري مارح اكتشف بس ارادة الله..
ونسيت اقولكم بالنسبه لزوجي دينه ممتاز وحريص على الصلوات جدا وشخصيته محترمه وما يحب الغلط وحبوب وطيب جدا ولا قد تغير علي ابدا يعني ما لاحظت عليه تغير لا قبلها ولا بعدها يعني فيه غموض شوي وشخصيته قويه.. المهم هو من طبعه يميل الى المثاليه شوي وماتوقع انه ممكن بسهوله انه يخون او يسوي شي زي كذا والحب بيننا كبير الحمدلله وانا اثق فيه لكن بعد هذي صرت اشك فيه واحاول افتش جواله ولابتوبه كل ما سمحت الفرصة..
اعرلف اني طولت عليكم بس حبيت ان الصورة توصل واضحه يارب يارب تساعدوني لاني محتارة مرة ومادري وش اسوي خايفه اسوي تصرف واندم عليه..
التعديل الأخير تم بواسطة ماريا ; 26-10-2009 الساعة 02:51 PM
السبب: توضيح العنوان
26-10-2009, 09:50 AM
ضوابط المشاركة
العرض الشجري