عقدة الرجل الشرقي .. ومعاناة الزوجة
مساكم الله بالخير والمسرات
بدخل بالموضوع على طول من غير مقدمات وبدون فصحى لاني انسانة ما اداني شي اسمه فصحى ..
كثر الحكي عن المراة وانها هي سبب مصايب الرجل بحياته الزوجية وانها وانها .. الخ
وبكل موضوع تصير الدعوى حرب كل واحد يرمي الحمل على الجنس الثاني وانهم هم الي مفروض يبادرون ..
لكن ياحبايبي انتم .. لو كل واحد فينا يشوف موضوع فيه هجوم على بني جنسه يرده بهجوم على الجنس المعاكس .. فما راح يتحسن الوضع ابد .. لو انا مثلا كبنت اشوف موضوع فيه انتقاد لصفة سلبية بالزوجات .. بدل ماقعد اشن هجوم واستنزل وحالتي حالة .. افكر يا ترى هالصفة هل موجودة فيني ؟ صارت موجودة .. هل انا عارفة هالشي واكابر ولا ماني عارفة .. هل عندي استعداد اتخلص من هالصفة السلبية قبل باكر تخرب علي امور كثير ..
يعني صدق من وش رايكم ؟؟ مو كذا احسن من اني ادس خشتي بالتراب كني مادري عن عمري واحاول اصيد لي لي كم خطا اعاير بهم الرجال عموما ؟؟
لذلك المفروض كل واحد يهدي اعصابه ويعين من الله خير .. مو مشكلة نحكي عن الشغلات الي مضايقتنا بالجنس الثاني .. بس عاد ما نصدق عمارنا وما نشوف اخطائنا ! بالذات الرجال والحين اقول لكم ليه بالذات الرجال …
الاستهتار بالواجبات الزوجية وارد من الرجل والمراة ..
ولكنه وارد من الرجل اكثر .. والسبب واضح ..
كلنا قد تربينا على شغلات غلط سواء بقصد او بدون قصد من اهالينا … وكبرت هالاشياء معنا
الفرق ان في ناس صححو هالاشياء الغلط .. وفيه ناس استمرو عليها يانهم مو عارفين انها غلط او عارفين وجايز لهم الوضع لان هالاشياء تخدم مصلحتهم بطريقة ما
فالرجل الشرقي تربى براسه عقدة : انا الرجل والمراة اقل مني بكل شي
بعض الرجال كبرت معهم هالعقدة وحاولو اصلا يرسخونها اكثر .. بانهم فعلا يحاولون يخلون الزوجة اقل منهم بكل شي .. لذلك نشوف نوعية من الرجال يرفضون ان زوجاتهم يكملون تعليمهم العالي او يكونون موظفات .. لانهم مايبون الزوجة تكون احسن منهم .. يطبقون هالعقدة
ونلاحظ الرجل يتزوج وهو راسه منفوخ بفكرة اني انا الرجل وانا الي راحتي مهمة وهي الي مطالبه تراضيني .. للحد الي يخليه يستهتر بواجبه زوج .. نشوف اثار هالعقدة موجودة بتعامل الرجل مع زوجته حتى لو ماهي موظفة حتى لو هي فعليا اقل منه مستوى تعليمي او فكري او اجتماعي .. لا صار فيه اشكاليات يتوقع انها هي الي تتودد له هي الي تحل مشاكلها معه وهي الي تقرا وتتقف وتفهمه وتفهم شخصيته .. حتى رغم علمه بانها اقل منه مستوى فكري وانه هو الي احسن منها مستوى بس لا جا الموضوع على المبادرة والتعب .. يرمي الحمل كله عليها ..
هالنوعية من الرجال ممكن تجيه زوجة بالبداية تمام معه مشتطة وتحوف وتزوف وحالتها حالة .. بس بعدين ! اكيد يبي ينهد حيلها وتتفل العافية .. شي طبيعي جدا .. الرجل الي يفكر انها بتستمر كذا لين نهاية العمر .. رجل غبي بمعنى الكلمة .. لانها بكل بساطة انسانة تتعب وتمل .. زيها زيه بالضبط يعني انا مدري وش يبون بعض الرجال والله لو هي سيارة جماد وهي جماد ما تقدر تفرض عليها توديك الخرج بعشرة ريال !!! فما بالك بانسانة اضعف منك بدن وارهف منك بالمشاعر ؟؟
الحين نجي لاستهتار الزوجة .. باختصار أي زوجة تستهتر بزوجها يا انها :
بالاصل طبيعتها مستهترة وماتحشم احد اساسا
او انها ردة فعل ..
الي بالاصل طبيعتها مستهترة ولاهي راقية لا بفكرها ولا اسلوبها .. هذي من اصله ما تنفع تصير زوجة .. ولو انه فيه احتمال تتغير للاحسن لو حبت زوجها لان حبها له نقطة ضعف يقدر هو يستغلها (اذا هو انسان ذكي وحريص على خياتها معها ) عشان يصحح ياثر فيها ويصحح سلوكياتها ..
واذا كان هالاستهتار ردة فعل .. هذا الشي الي ما يحسب حسابه بعض الرجال الله يهديهم دايم يتعاملون مع اخطاء الزوجة كانها اخطاء بطبيعتها وغير ممكن تصحيحها واتصور يوهمون نفسهم بهالشي عشان مايبون .. ما يبون .. مايبــــــــــــــــون هذاني كررتها لاني اعنيها .. ما يبون يتقبلون فكرة انهم قد يكونون هم السبب بوصولها لهاحال .. يبون يفهمون انفسهم ان الزوجة هي بالاساس كذا .. لذلك النتيجة المحتومة : تتكرر اخطائهم .. والزوجة تستمر بردة فعلها .. وهذا سبب قوي لانهيار العلاقة .. قوي مررة ..
فهمتو كيف ان الرجل ممكن يكون له دور قوي وغير مباشر بتخريب ابو الدنيا ..
الرجل يقدر يفهم اذا زوجته تصرفت تصرف معين كردة فعل .. او ان هالتصرف جزء من طبيعتها .. لذلك من المفروض اذا لقا انه ردة فعل يراجع نفسه .. ويشوف وش الي خلاها تسوي هالشي ويصحح موقفه ناحيتها .. يكون انسان ايجابي انسان حريص على نجاح علاقته مع زوجته .. مو واحد كل همه يحس ان الزوجة هي الي تركض وراه مو هو الي يداريها ... ! جد تفكير عقيم
__________________
شتان .. بين من تسيره مبادئه ، ومن تسيره مصالحه
16-05-2010, 12:38 PM
ضوابط المشاركة
العرض الشجري