بسم الله الرحمن الرحيم

السلام عليكم ورحمة الله وبركاته...

أول موضوع لي .. أبي مقترحاتكم ..

أنا وظيفتي معلم ... وزوجتي تدرس بالصف الثالث ثانوي...

والبنت قريبة لي .. بنت خالتي .. أنا اكتشفت الموضوع قبل 7 أشهر تقريبا ..

البنت .. أمها معلمة .. وأبوها متقاعد .. وأبوها صديق أبوي من عهد الطفوله .. وصداقتهم متينة جدا ..

وأنا تعينت في مدينة تبعد عن مدينتي اللي أسكن فيها حوالي 400 كيلو .. والبنت تدرس بآخر سنة بالثانوي ونزولا لرغبة أمها >> خالتي .. البنت قعدت عند أهلها تكمل دراسة بنفس المدرسة

يعني أنا تزوجت وقعدت مع البنت فترة لا تتجاوز العشرين يوما .. ثم ذهبت لعملي في مدينه أخرى

وكنت أنزل اسبوعيا .. لزوجتي ..

المهم كنت أنزل الإجازة الاسبوعية وأشوف زوجتي بالليل ما تنام معي .. وتقول أنا بأسهر .. مع إني وضحت لها بداية الزواج أمور أساسية لازم نتفق عليها .. مثل السهر ممنوع .. إلا في الإجازات .. وإلى ساعة معينة بالليل ..
المهم إني وربي ما قصرت معاها في شيء أبد ...
وملبي جميع احتياجاتها .. وقلت لها .. الرسول صلى الله عليه وسلم .. نهى إن الإنسان يضع نفسه موضع الشك ..
وإن الشيطان حريص .. على التفريق بين الناس ..

كل ما أدخل عليها بالليل .. أحصلها تكلم وإذا شافتني قفلت التلفون .. وفي شغلات كثييرة شككتني فيها ..
يوم طلعت فاتورتها .. سجلت أنا بخدمة في موبايلي .. على النت تجيني الفاتورة وأشوف المكالمات أول بأول أوقاتها وكم مدة المكالمة وفي أي يوم ..
تفاجأت إن أغلب مكالماتها بعد وحده ونص بالليل .. سواء كانت عندي بالبيت أو عند أمها أيام الاسبوع ..
ومكالمات أقلها لمدة 8 دقائق وأكثرها لمدة ساعتين و5 دقائق .. اضطريت أدق على الأرقام اللي زوجتي تدق عليها وطلعوا كلهم شباب وربي إني حتى الأرقام أدق على أصحابي اللي يشتغلون بالإتصالات وموبايلي ويقولون هذه الأرقام بدوون اسم ....
اضطريت وشريت رقم بدون اسم ودقيت على واحد من الشباب ذولا .. وذكرته بربه وقلت اللي تسويه ما ترضاه لأهلك وهذا دين عليك .. ومن هالكلام .. قال : هي اللي تتصل .. وهي تبغى هذا الشيء ..
يوم قفلت جاني اتصال على الرقم الجديد من زوجتي .. بس مارديت عليها .. وتواصلت بالرسائل .. إنو أنا صديق زوجك وأشتغل بموبايلي .. ونصحتها .. .. بعدين كلمتها .. في الموضوع قالت ما أكلم أحد .. أنا قلت خلاص وصلت المعلومه ..
رحت وشريت لها جوال جديد .. بألفين وشريت لها شريحه بألف وحاجة وقلت لها .. يا زوجتي كل إنسان يغلط ..
ووضحت لها كل شيء .. وهي مصرة إنها ما تكلم أحد .. وهذا اللي زعلني ..
قلت لها ابدأي حياة جديدة وانسي الماضي وخافي ربك .. ..
المهم نفس الموااال .. ما تغير شيء .. تكلم شباب بآخر الليل .. ورسائل .. وصور ..
كلمت صاحبي يشتغل بالأمارة .. وقدمت شكوى .. وطلبت تسجيل مكالمات .. وفعلا .. سجلو لي مكالمات
لكن صاحبي جاته شغله .. وما رد علي طيلة 4 أشهر .. وما رد لي قضية التسجيل ..
زوجتي وربي إني ما قصرت معاها بشيء لا عاطفيا .. ولا ماديا ..
ما عمرها في زواجنا أخذت دش ( شور ) إلا يوم طلعت ضميتها وقلت لها كلام حلو ..
وربي ما عمرها صحت من النوم إلا ضميتها .. وقلت لها كلام حلو .. لي متزوجها 9 شهر ما غسلت لي ملابسي إلا مرتين .. وتقول لي ودي ملابسك المغسلة ... الطبخ .. وربي من يوم تزوجتها إن الأيام اللي طبخت لي فيها ما تتعدى أصابع اليدين .. طيلة 9 أشهر .. والله إني أخذت رقم خطابة كنت أبي أتزوج مسيار .. لأنه حتى الجماع ترفض وإذا رضت بعد ما أشحدها شحده ..
والله اللي بخاطري كلام مثيير .. بس ما فكرت في الأشياء هذي إلا لأنها صغيرة وأقول آخر سنة لها بالثانوي ما ودي أضغط عليها ..
يعني مقصرة في حقي وهي معترفة وتقول أنا مقصرة بحقك بالمرررة .. وربي ماهمني .. لأنها مع الأيام بتعرف وش أهمية زوجها وبيتها .. وعيالها ..
أنا اللي همني ورفع ضغطي الشباب اللي تكلمهم .. لأني ما معي دليل أقدر أدينها فيه .. تقول ما أكلم ..
مع إني سألت الشيخ الشريم وقال .. الشك .. مشكلة .. الأصلح لك تطلق حرمتك .. وسألت كم شيخ وقالوا لي كلهم طلقها ..
المهم .. حملت زوجتي .. وقبل فترة مكلمة واحد لمدة ساعتين .. في الصباح .. واضطريت دقيت على الرجال وطلع الحمدلله متفهم .. وقال لي قصته مع زوجتي ..
وزوجتي (حامل بالشهر الثاني) كانت عند اهلها .. فأرسلت رسالة .. لي تقول جيب أغراضي الفلانية ..
فأرسلت دقي على فلان .. (اللي كلمها بالصباح) ما دام خدمتيه بالنت يمكن يخدمكي ويجيب أغراضك ..
وبعدها ما دقيت عليها .. ولمدة ثلاثة أيام .. عند أهلها .. اليوم الرابع جات البيت .. وبدت تقول لي كلام حلو .. واللي ما سمعته من أول ما تزوجت .. وجابت لي الشريحة وكسرتها قدامي .. وقالت لي بيع جوالي .. وجوالها كان بولد 9000
ودخلت غرفتها .. أنا جلست شوي .. ودخلت عليها ..
قالت : عندك شيء بتقوله ..
قلت إيوه .. وبديت أتكلم ..
قالت : خلاص يا .... أنا عارفه خطأي وتبت لربي ..
قلت لها ليش تسوين فيني كذا .. أنا وربي مغبون .. يا ناس 7 شهور وأنا عايش في قلق .. وهم ..والله عالم بحالي ..
قالت : أرسلت مسج على الإيميل روح انظر فيه .. رحت وحصلت عذر أقبح من ذنب .. ومرسله أيضا مقطع من محاضره للشيخ المغامسي عن الستر .. ويعني أنت استر علي .. ومن هالكلام ..
البنت لها 3 أسابيع .. الحقيقة يا جماعة الخير متغيرة .. باين عليها إنها خلاص .. تابت لربها ..
المهم تناقشنا على مدى نص ساعة .. طلع الحق معي في كل صغيرة وكبيرة .. وهي بنفسها مقرة بهذا الشيء ..
ومقرة إنها كانت تكلم شباب .
أنا الحقيقة فقدت الثقة فيها .. وهي تقول .. أنا أرجع الثقة وكانت تبكي قدامي .. وأنا بعقلي أقول هذي دمووع تماسيح ..
يا جماعة أنا في حيرة من أمري .. البنت أحبها وربي من قلبي .. ورفضت بنات كثير خطبهم أبوي لي عشانها ..
لكن خيانتها لي .. ما أدري كيف أوصفها .. من أحب الناس لقلبك تجيك الطعنة .. ومن الخلف ..
أنا الحقيقة فقدت الثقة فيها .. لدرجة إني قلت لها اللي في بطنك مني ولا من غيري لأنها قابلت واحد في بيتي ..
قالت لا والله ... ما صار شيء .. قلت لها .. اللي في بطنك أنا ما أعترف فيه لين نسوي تحليل DNA
قالت اللي تبيه .. وقالت .. لو تبغى تتزوج وربي لأفرح لك والمهر علي ..
يعني أحس من كلامها .. إنها حاسة بالذنب .. وإنها تائبة لربها .. ومستعدة بأي شيء أبغاه أنا ..
مستعدة تسوي أي شيء عشان أستر عليها .. لكن أنا جيتها بالطيب أول شيء .. وما نفع .. ويوم شديت عليها طاحت ..
هل الطلاق حل مناسب .. للخيانة ..
أو كيف أنا أتخلص من المشكلة هذي .. وكيف أرجع الثقة ..؟؟