السلام عليكم ورحمه الله وبركاته

اخواني الاعضاء عندي مشكله واعتقد مب جديده عليكم ..

انا واايد عندي مشاكل مع امي .. واحيانا احس انها تكرهني وفعلا ماتحبني .. وتبدي اخواني الاولاد علي دايما .. ويوم اقول لها ليش وليش تقولي اوكي عيل انتي وحده قليله ادب ..مافي طريقه للتفاهم معاها ..و انا وحده عصبيه جدا جدا ومشكلتي يوم اعصب حالتي كلها تتغير واتعب واصير كأني شخص ثاني وتغير 180 درجه ,, والمشاكل اللي معاها تخليني اروح غرفتي واطلع كل عصبيتي بيني وبين نفسي ,, واحيانا هالعصبيه توصلني لمرحله اسأل نفسي ليش عايشه ؟ مب الانتحار بيريحج؟ ..
ومره كان عندها مشكله مع شخص سويت المستحيل عشانها وحاولت وحاولت بس بعدين يوم صار بيني وبينها خلاف قالتلي انتي ماسويتي اي شي عشاني ..اذا عن مساعدتج انتي ما ساعدتيني.. انا هالكلمه لين الحين تمر في اذني وماقدر انساها,, وكلامها الجارح احيانا يخلي ابوي يقولها لا تقولين للبنت هالكلام ماينفع .. انا عارفه انكم بتقولولي تفاهمي معاها بطريقه اوكي ,, لكن انا حاولت بهالشي والرد منها يكون بكل هدوء صح انا الغلطانه ولكن بطريقه تشوف نفسها مب غلطانه واني انا اللي يالسه اغلط .. وتروح بدون ما تسمع انا شو فيني بالضبط..

انا تعبانه منها كل ليل نايمه ودمعتي على خدي بسببها .. وماعندي اخت او شخص كبير ثاني اقدر اشكيله اللي في قلبي فأنا اكبر وحده.. ولهالسبب اكون 24 ساعه في غرفتي بروحي واطلع حرتي كلها في الدراسه وواعده نفسي ان شالله انه ادرس في الخارج عشان ابتعد عن كل همومي واعتمد على نفسي وماصير عاله عليهم ,, والوالده من ناحيه السفر موافقه وهذا اللي عور قلبي اكثر انها ما عاتبتني مثل باقي الامهات ولا ذره خوف طلعت منها ولكن لأخوي تقوله انت تطلع شوي برع انا قلبي مايتحمل ..ومابا ازيد الكلام..

اتمنى منكم مساعدتي

ممكن اعرف كم عمرك ....؟؟

__________________

إذا اجتمعت حساسية وعاطفة البنت + عصبية = دمار لنفسيتها و كره للي حولها لها..

اتوقع بسبب عصبيتك خليتي امك تعاملك كذا..والله أعلم

أنا أتوقع هذا السبب لأني عندي وحده من خواتي مثلك..

دائم يبين على الوالدة الغضب عليها..ودائما الوالدة تغتاب فيها عند اخوانها..

والسبب إنها كانت عاطفية وعصبية..وكانت دائما تسبب للوالدة المشاكل بعصبيتها وتعاملها..

لكن إذا تبغين والداتك تحبك..انتي حبيها..واصطنعي حبها..وبالأخير راح تحبينها بجد..وراح تبين محبتك بأفعالك معها..وحاولي تكونين هادية وامسكي اعصابك..وتكلمي معها بأدب واحترام..واختاري كلمات مثل..أهم شئ رضاك ياأمي..و تأمرين يالغالية..وانتي امي ومالي ام غيرك في الدنيا..واخدميها بطيبة..

والله راح تحبك..وتنالين الأجر بعد في برك لها

اختي أقدر وضعك وأفهم حقيقة ما نعانين لكن إحدري فمن تتكلمين عنها ليست صديقتك أو أختك الكبرى لتحكمي عليها وتكرهيها أو تعاقبيها من تكلمت عنها في الموضوع هي أمك ومهما فعلت معك فلا يسعك إلا برها والإحسان إليها ومعاملتها بالمعروف أنا أيضا أتعرض للضلم من أهلي من أبي وأمي رغم أني لم أغضب أوأرفع عليهم صوتي يوما ولم أحاسبهم يوما على أفعالهم معي فلهم أسبابهم الخاصة والله وحده يملك الحق في حسابهم لكني أسامحهم فيكفي أن أمي حملتني تسعة أشهر و أرضعتني حليبها ويكفي ان إرادة الله شائت أن آتي إلى هذا العالم بفضلهما وهذا يكفيني كي أحترمهما طول حياتي رغم كل شيء ورغم كل المعاملات السيئة فأنا أيضا لست ملاك ولا تنسي أن رضاء الله في رضاء الوالدين فسامحيها واغفري أخطائها وأحسني معاملتها رغم إسائتها وقولي لها قولا كريما واخفضي لها جناح الدل من الرحمة لتنالي رضى الله وإن نلته لن تشقي إنشاء الله وفقك الله لما تحبين وترضين