زوجتي عند أهلها وأفكر بتطليقها
[SIZE="5"][COLOR="DarkGreen"][SIZE="5"]مساء الخير
عمري 27 انسان مستقيم طيب حنون وسيم متعلم
وزوجتي 23 سنة
تزوجت من 3 سنوات
عندي طفله عمرها سنة
ماني مرتاح معها وانصدمت صراحه فيها مابيننا صلة قرابه وحده دلتنا عليهم وشفت البنت وأعجبتني
ثلاث سنوات وأنا أقول بكره تتعدل نصحت هاوشت ماااافيه فايده
.زواجنا كان بأفضل قاعه في المنطقه أخذتها شهر عسل ماتحلم فيه
سكنتها في بيت وأثاث فخم جدا طيب حنون معها لأبعد حد
مااقصرت بشئ أبد لابمعامله حسنه ولابأكل ولابملابس ولابمصروف
كل شئ متوفر لها
زوجتي انسانه مهمله بجميع الجوانب
عدم اهتمام بالمظهر ولانظافه بنفسها ولاكأنها متزوجه
انسانه بس تبي تاكل وتنام وتدخل احسن الأسواق
همها الوحيد الناس وش بيقولون عنها
الطبخ من تزوجتها ماشفت منها شئ جديد أقولها تعلمي نزلت لها جميع كتب الطبخ وتقول ايه أعرفهم
ولاشفنا شئ بالعافيه تطبخ الغدا وتجهزه لي أحيانا أرجع من الدوام وأنزل للمطعم أجيب غدا
اما الخميس والجمعه آكل عند أهلي لأنها ماتصحى إلا المغرب
قهوة المغرب فهمتها وقلت لها نفسي مره أحس أنها مهتمه فيني ومجهزة القهوة لنا لكن للآسف
أحيانا أرجع تسألني تبي قهوة؟!! وأحيانا تسوي وكثير من الأحيان مافيه
مافيه أنوثه لسان حلو مافيه حتى كلمة الله يعطيك العافيه إذا جبت شئ ماأسمعها
عطورات أشري لها ولانشوف شئ
أواني الغدا تجلس إلى اليوم الثاني بوقت العشاء أقول ليش ماغسلتيهم تقول وش دخلك!
قدام التلفزيون هذا الممثل متزوج هذا مطلق هذا عدد عياله كذا وتتكلم وتعلق على أشكال الممثلين!!
حتى في الأسواق شوف الرجال هذا مسوي كذا وغيره عن شكل الرجال
عيونها غطي عيونك غطي عيونك مااافيه فايده تكرر الأخطاء
مثل ماقلت مهمله بكل شئ حتى ملابسي على انها كثيييره ماأحصل شئ نظيف لوتجلس اسبوع وأكثر ماغسلت بحصل ملابس نظيفه لكن شكلها تاخذ فتره أطوووول ماغسلت شئ
تسوي مشكله من اي شئ تافه
مثلا قلت لها انا من كنت بالإبتدائي ماعمري داومت وطلعت إلا بملابس نظيفه وآخرتها أداوم اليوم بثوب وسخ
جلست هي اسبوع ونص زعلانه و بعد هذا الإسبوع والنص تجي تسولف معي عادي ولاكأن صار شئ لأنها طفشت تبي أحد يسولف معها ويطلعها
ماحس منها بإهتمام أوحب لي أدخل البيت ماشوف منها استقبال حلو
سنة كامله كل ليلة تنزل عند أهلي تقهوى وتعشى ويرحبون فيها وأنا أطفش وأطلع من البيت وتقول ليش تطلع قلت لأني ماحصلت زوجة تجلس في بيتها فجلست يومين وصرت ماأطلع وبعده رجعت حليمه لعادتها القديمه
سنة كامله على هذا الوضع..وأهلي ساكتين يستقبلونها بكل حب وهي ماتحط يدها بشئ معهم
حملت وتعبت في حملها وجلست على ظهرها عند أهلي شهر كامل أمي تقوم فيها
آخرتها أمك وأمك وأمك على أشياء تافهه آخرتها أنها مره جالسه هي وأختي يناظرون في طفله
فقالت أمي لثنتين قولوا ماشاءالله..أختي قالت ماشاءالله ..وزوجتي سكتت..
أمي نست الموضوع ماأهتمت..وزوجتي طلعت لي فوق ليش أمك تقول قولي ماشاءالله لييييش والله ماعاد أقول ماشاءالله............
ولامره فكرت تعزم أمي على قهوة أقول أعزميهم لوعلى قهوة ,مابي اعزمهم
درج البيت ولامره إكنسته أوأمسحته هي مره وحده من تزوجنا غسلته مع خواتي
انا نفسيا تعبت من كثر مشاكلها التافهه عند النصيحه اوشئ تافه مايروق لها تسوي مشكله وتزعل وتسفهني فتره ثم ترجع ولاكأن شئ صار
آخر مشكله يوم خميس رحت مع أخواني بعد صلاة العشاء لجدتي أسلم عليها بعد مارجعت قلبت ليلتي مشكله وتطول لسانها ليش ماعلمتني أنك بتروح ليش؟؟ وجلست تستهزأ فيني يوم احد عطر يعني تقلدني بإستهزاء
وتقول ليش ماطلعتني نتمشى؟ قلت بدال اليوم بكره بإذن الله نطلع بكره
مافيه فايده تهاوش جيت برد عليها بتكلم وعطتني ظهرها ومشت قلت تعالي لاتروحين وانا ماخلصت كلامي
قالت منو أنت عشان انتظرك تكمل كلامك وتقول وش هالعيشه لامجلات ولادش تقول مافيه قنوات
يااخواني مع أني ألتزمت إلا أني تركت الدش في بيتي عشان ماتطفش عندها جميع القنوات تشوف مسلسلات وأفلام يعني وش تبي غير كذا؟
أخذت مخدتها ونامت في المجلس وأنا سكت ونمت بغرفتي
اليوم الثاني ماصحت إلا المغرب وتمر من عندي وسافهتني قلت اجمعي عفشك بوديك أهلك
لأن طفح الكيل منها طلعت شوي ورجعت عطتني الجوال لأن ابوها على الخط
قال انت عايفها انت عايفها جبها وإلا بجي آخذها
قلت ياعمي موعايفها بنت ماتحترمني لسانها طويل علي ومهمله
قال لا انت عايفها بس جبها لنا وإلا بجي آخذها
قلت لا لاتجي انا بجيبها لك
وأمها تقول 100 واحد يتمناها!!!
بالله هذا كلام يااخواني انا ظنيت أمها تعقلها طالع الأم وش تقول!!
رجعت اليوم اللي بعده من الدوام قلت بنفسي إذا حصلت الحرمه مجهزه غداها ولاجمعت عفشها بتركها لكن لقيتها جامعه عفشها تنتظرني ووديتها أهلها وطول الطريق تقول طلقني طلقني وأنا بقهرك في بنتك اهلي سألوا عن النظام ويقولون البنت عند أمها وأنا بعاندك وأقهرك في بنتك(لأنها تدري وش كثر متعلق في بنتي)
تركتها اسبوع عند أهلها ثم اتصلت فيها
قلت انتي غيري من أسلوبك واحترميني انا زوجك واهتمي بنفسك وبيتك وبنتك وبجي أرجعك
قالت لا ماني مغيره من أسلوبي أنت اللي تغير وجلسنا نتجادل وتطول لسانها ومن ضمن الكلام اللي قالته اني انا سببت لبنتي نور عيوني النفسيه,,و قلت حتى أمك ماتستحي كلامها 100 واحد يتمناها بدل ماتعقلك قالت لاتكلم عن أمي,,قلت أنتي ياما تكلمتي عن أمي
وهي سكرت الخط واتصلت عليها مره ثانيه وموهامها هي بنظرها ماغلطت
قلت هاه بتغيرين من أسلوبك وتحترمين نفسك وتحترميني برجعك غيره لا
قالت لاماني مغيره وطولت لسانها قلت خلاص اجل وسكرت الخط
بعد ساعتين أرسلت رساله تقول فيها أنا محترمه نفسي ,,وأحترامك يصير خير
وطنشتها وصارت تدق وتدق وإلى الآن جاري التطنيش من اسبوع
وأرسلت ناس بيننا يسمعون منها وش اللي مضايقها مني
قالت ليش ماعلمني أنه بيطلع ويروح لجدته
انا مليت منها ومن خبالها ورفالتها وكنت صابر عليها عشان بنتي فقط لاغير وإلا والله لاأسلوب ولاأهتمام ولاغيره وكنت مراعي الله بتعاملي معها آخرتها تستهزأ وتقول أني معيشها عيشة ملكه!!
انا حتى العلاقه الخاصه محروم منها لأنها مومهتمه بنفسها وصابر عشان بنتي مابي بنتي تربى بعيد عن عيني بنتي اللي مافيه احن عليها مني آخرتها تقول اني سببت لها النفسيه والسبب أني ماطلعتهم يوم الخميس
المصيبه أن البنت توها هذا الشهر تكمل سنة أي نفسيه وأي خرابيط
وتقول انها جالسه عندي عشان كلام الناس لأنها شايله هم الناس وش بيقولون عنها إذا تطلقت
اللي يسمع كلامها يقول اني اضربها أومجوعها أو اسبها اواغثها أو مقصر عليها بشئ
انا كرهتها وناوي أطلقها لأني ماقدر اتحملها هذي انسانه طبعها كذا ماتغير
وبنفس الوقت متعذب عشان بنتي ماأنام إلا ودمعتي على خدي بسبة هالبنت
فكرت أتزوج عليها وأتركها معززة مكرمه في بيتها وعند بنتها بس مابينفع معها لأن مشاكلها ماتغير بالعكس ممكن تزيد ومابرتاح من الضغوطات النفسيه وبعد خايف أظلمها معي لأني عايفها,,
أرشدوني لعلي أجد عندكم حلول [/SIZE][/COLOR[/SIZE]]
12-05-2011, 06:28 PM
ضوابط المشاركة
العرض الشجري