السلام عليكم ..

بقولكم مشكلة صارت بيني و زوجي ..

اليوم الظهر كان زوجي يقلب في جوالي .. وطبعا عادي انا اقلب في جواله وهو يقلب بجوالي عادي ..
وهو يقلب .. علق وطفى .. شغله وقال كم الرقم السري ؟؟
قلت : هات الجوال أنا أفتحه .. كرر الجملة .. كم الرقم السري وبنبره حادة ..
قلت جيب الجوال وأنا أفتحه .. قال ليش ماتعلميني : قلت إذا علمتني رقمك علمتك رقمي .. رمى الجوال وقال أشحذك أنا .. ترى من الثقه اللي فيك ماطلبت أرقامك السريه ومخليك على راحتك .. وتقولين لا تقارن بقارن ترى اللي قبلك : ماخذ كل أرقامها السرية جوالها وإيملاتها وحتى بطاقة الصراف وهي ماتعرف عني شيئ ..؟؟؟؟؟؟؟؟؟؟؟؟؟؟
وانتي رقم جوال ماتبغين تعطيني ..

الحمدلله والشكر قسم مو صاحي .. زعل عشان رقم سري ..
زوجي مطلق .. وسبب طلاقه خيانه ..
وانا شارطه عليه انو مايجيب سيرتها نهائي عندي .. وإذا تهاوشنا راح يقارن ..؟؟ مدري وش أوصفه ؟؟؟

الكلام الظهر .. زعل وقام وتركني .. والعصر جاء مبرطم قلت أبغى أروح لأمي بشوفها .. وداني .. ولما رجعنا بالليل قال بجيب عشا .. تبغين قلت أيه ..
رسميين جدآآآآ ..
المهم قبل شوي لما جيت بفتح الآيباد لقيته حاط رقم سري ؟؟؟؟
وقبل مايدخل ينام قال أنا حاط رقم سري ؟؟

الحمدلله والشكر وش دخل الآيباد بالجوال !!!!..

ماراح أناقشه الا لما يهدأ ويتعدل مزاجه ..


أنا أبغى أعرف هل أخطيت ؟؟؟ مو من حقي انه تكون لي خصوصيات ..
أنا فهمته قبل وكان دايم يتكلم إن اللي يحط رقم سري اكيد عنده بلاوي ؟؟ وش هالتفكير !!!
واللي قلبي على قولته ماراح يتابع وراها إلا لما شاف منها ريبه وشك ...
طيب ليش يعمم ..
والله معاناة مع هالرجااال ...
الليحين شكله خلاص كلش بيقفله عني بأرقم سريه ...
وش هالأنانية يبغى يعرف كل شيئ ومايعلمني ؟؟؟\

للعلم زوجي حساااااس >> عساه يتشافى من هالصفه البايخه اول مره أشوف رجال وحساس ؟؟؟

أبغى مشورتكم ... خاصه أخونا أبو حكيم ..

في نظري أن الخطأ عليك وعليه، أصلاً مايجب أن يكون بين الزوجين الأشياء السرية من أصغر حاجة إلى أكبر حاجة، وقوية جداً أن أحد الزوجين يرفض يعلم الطرف الأخر الرقم السري أو الإيميل أو أي شي يتعلق في ممتلكاتهما إذا اعتبرنا أن الزوجين عبارة عن روح واحدة في جسدين، وصراحة رفض اعطاء الرقم السري لامبرر له أبداً من قبل الطرفين، وهذا يفتح أبوابه ماله داعي، شخصياً ماعمري حطيت جوالي ولا كمبيوتري بأي رقم سري، حتى خواتي واخواني يقلبون فيهم ولا مرة قلت لاتلمسون حاجة لأنه ماشوف شي يستدعي السرية.

نصيحتي تجلسي مع زوجك في حوار صريح وهادي وأجواء جميلة وتناقشينه بكل شفافية ورحابة صدر وتقولي أنه ماتحبي يكون بينكم أمور الأرقام السرية سواء الإيميل أو الكمبيوتر أو بطاقة البنك أو غيره، واتمنى أنه مايكون شي سري بين الزوجين فهذا أدعى للثقة والأحساس بالأمان والراحة، أدعوا لكما بالتوفيق في حياتكما الزوجية

اختي بالله

طلبتي مشوره الاخ الفاضل ابوحكيم وهو بإذن الله اهل لذلك .

اسمحيلي ان ابدي راي بسيط وهو انك تعرفين ان زوجك حساس بهذه المواضيع وله تجربه سابقه يعاني ولها تاثير عليه فكان الأجدر والعلم عند الله ان تعطينه ماطلب وان تكون هذه البدايه بزرع الثقه وتقويتها بينكما وتكون هذه نقطه الانطلاق .
لاتلوميه على انه حساس فقد تلقى صدمه وبأذن الواحد الأحد ان لاتصل الامور بينكما من مرحله انه حساس الى مرحله الشك لاسمح الله .

ازرعي فيه الثقه فيك وباذن الله راح تكسبيه طول العمر .

تقولين :: حسااااس ..
فليه تثيرين حساسيته ؟!!

الحل ؛؛ تجنبي كل ما يثيره ويزعله ويغيضه منك ...

ابوحكيم ؛؛ الظاهر عنده إجازه ليليه ..
تسلي في ردودنا إلى أن بحضر.. ويعطيك الراي الزين

__________________

وعليكم السلام ورحمة الله وبركات..

عزيزتي ..
أول ماشفت عنوانك.. اتوقعت انك انتِ من تعاني من زوجك.. بوضعه أرقام سرية..
صدقيني لو كان هذا الوضع .. كان يا أنقهرتي أو أتألمتي كثير..

زوجك زي ماقلتي حساس.. وعنده تجربة سابقة .. أكيد مهي سهلة عليه
خلاص جاريه من هذه الناحية..
يعني لو قلتيله رقم جوالك السري ماكان صارت مشكلة بينكم..
والخصوصية ماهي محدودة برقم سري..

بالذات في هذه النقطة.. حاولي تتفادي المشاكل معاه .. لانك عارفة سبب حساسيته

لطفي الجو مع زوجك ولا تحاولي تتصرفي معاه بالمثل..وبالعناد..
سايريه الين يرضى.. ولما يهدا اتناقشوا

و الله يهدّي سركم ويجمعكم على خير..

__________________

>> لا إله إلا أنت سبحانك إني كنت من الظالمين <<

جزاك الله خير أخي على نصيحتك ..

انا وأول ما اخذني ماكنت حاطه أرقام سريه أبد ..

بس جوالي .. وعادي يفتش بالرسايل والاب توب وكل شيئ ..

لدرجة الفاتوره إذا طلعت جاء يناقشني بالمكالمات اللي طولت فيها ..

وأنا معاك بإنه مابيننا ارقام سرية .. بس هو أناني أبغى أعرف بس ما أعطيك .. وش هالتفكير ..

كان عطيتيه وعادي جدا ولو فتحه
أنا لو مكانك أصلا ماراح أحط رقم سري صح ممكن تحطين لو تخافين أحد يشوف رسايلك مع زوجك
وتقولين له هالكلام وعادي عطيته الرقم السري ولو شافك مو حساسه من هالناحيه راح يتعلم منك
وخاصه عنده تجربه سابقه

الله يوفقكم ويسخركم لبعض

__________________

جزاك الله خير أخي على ردك ومرورك ..

أنا مالومه .. لكن شيئ تافه يزعل منه رقم سري؟؟

حتى قبل شوي قلت خلاص خذ الجوال وأعلمك الرقم سفهني وراح ..

بس أبغى ليش فيه انانية يبغى يعرف إيش اللي عندي وأنا ماعرف ؟؟؟؟

ناقشيه وأنا أخوك ، وتكلمي بواقعية معاه وأنه لاينبغي لا هو ولا أنتي أن تلجؤا للأمور السرية

زوجك طالع من خيانة زوجية، ولا يقصم ضهر الرجل ولا يكسر قلبه سوى أن تخونه زوجته، لذلك حاولي تفهمه من ناحية حرصة الشديد على مراقبة مكالماتك، فاحاسيسه مرهفة من هذا الجانب، وصدمته لازالت آثارها بادية من ناحية التدقيق على الفواتر وغيرها، لابد أن تتفهمي وضعه وعليكِ ألا تفتحي باباً للشك، وعليكِ أن تتحدثي معه بأنك لا تردين ذلك وذكريه في بداية الزواج أني لم تكوني تمانعين بتفتيش كل شي حتى أنكِ شاهدتيه يخفي بعض الأشياء ثم عاملتيه بالمثل، اتمنى أن تصلوا لحل أنه لا أرقام سرية في حياتنا من جانبه ومن جانبك بنفس الشي

آمين على دعائك ..

أختي .. شفتي هالعباره بالاحمر .. انا قبل اول زواجي كنت سلبيه معاه اي شيئ ابشر وسم وآمر وأراضيه حتى لو كان الغلطان .. تمادى الرجال ..صارمايهتم لمشاعري أبدآ ..انا كاتبه نبذه عني لرجل الرجل بقسم ساعدني ..
ولما وقفت بوجهه وصرت أعامله بالمثل تأدب عن قبل ..
والتطنيش نفع فيه ..
وانا مداريته .. ومراعيه له .. بس هو خرب على نفسه لما تمادى