سلام للجميع'
مشكلتي يا اخواني واخواتي،، هي زوجي واخواته وامه'ة
من بدايه زواجي ولحد اليوم وهن مش متعاونات معي وأي شي يصير مايخبروني عنه كاني غريبه مش ساكنه معاهم فالبيت' وهو عارف ذا الشي وانا صابره وساكتة بس لما اتضايق افضفض له ومايكون رده الا بالايجابيات لهن وايد يدافع عنهم وهو عارف ان تعاملهن معي غلط' ولما يصير عرس او عزا اوعزومات ورحلات وسفرات وغيره أبدا مايشاركوني معاهم'' الي اعرفه ان أخوات الزوج يعاملن زوجة اخوهن مثل اختهم ويشاركوها معاهم فكل شي'طبعا مب كل الناس بس الى اعرفهم كذا حياتهم بعكسي انا والمشكله ان زوجي دوم واقف معاهم ويدافع عن تصرفاتهم حتى لو انا مظلومه'وهو عارف كل شي بس ساكت' لما يصير عرس يروحن اخواته مع بعض يسافرن ويتسوقن وياخذن فساتين جميله العرس والناس لما تشوف فساتينهم وفستاني يسالوني ليش فستانك عادي اما خوات زوجك وايد حلو!ليش ماتروحي معاهم! ان حرج من الاسئله لكني عادي اطنش، لاتقولو لي اروح مع زوجي نسافر ونتسوق لاني كلمته فهالموضوع وأساسا من اول يوم زواج لشهر العسل ماسافرنا كله بسبب امه ماخلت فلوسه' اكثر واحد من عيالها تطلب منه فلوس مع انها غنيه وعندها محلات وشقق واولادها وبناتها يشتغلو وزوجها يشتغل ورواتبهم الحمدلله' لكن الله يهديها ماتحب ولدها يصرف علينا الا وهي دوم تطلب منه وهو مستعد يعطيها روحه' وهي بعد اسلوبها تخلي روحها جدام ولدها فقيره وماعندها شي تعرف تمثل وايدوهو يصدق تمثيلها ويعطيها على حسابي انا وعيالي'والله من تزوجت وانا ماسافرت مكان حتى لو طلعة بسيطه يقول ماعندي فلوس او الفلوس مايكفي دايما نفس الاعذار' حتى لما نتسوق فجاة ويقول خلص فلوسي يعني ما أخذ راحتي وأشتري الى اريده بس شغله او ثلاث وخلاص ستوب' صارحته يارجال مايصير كذي انت رجال لازم تفكر فينا وفمستقبل عيالك وانا'جمع فلوسك واسعدنا مو كله لامك عندهاخير والحمدلله وبناتها عازبات واولادها وكلهم يعطوها غير اجارات المحلات والشقق' لكن هو ماكو فايده منه كل شي ولا اهله بيضي علشانهم قبلنا نحن'وياما صبرت وصبرت والوضع نفسه ولما اتكلم واتضايق يقول انا عصبيه' طيب ايش اسوي لما اسكت ماشي فايدة ولما اتكلم ماشي فايده' وامه تعرف تمثل تعامله بترحيب وبرود لانه ماقصر معها وانا حارقه اعصابي عوضعنا لكن دون جدوى'ادعولي ياناس انه يتغير من ناحيتنا ويصير رجال يفكر فمستقبلنا'كل شي ولا اهله واخواته ما ياخذني معاهم مكان نفس الشي امهم وهو عادي يدافع عنهم'

السلام عليكم ورحمة الله تعالى وبركاته

الله يهديه يارب !! إذا كلامك فعلاً صحيح فهو مقصر في حقك!! بس أبغى أقولك حاجة لازم تفهمينها!!

الرجال فينا ماينصر زوجتة على امة حتى لو كانت امة غلطانة!! هاذي ام وموقعها من الأعراب صعب!!
لازم تفهمين هالشي وتستوعبينة!! لأن الرجال يخاف يطلع امه المخطأة قدام زوجتة!! وتستغل الزوجة هالشي مستقبلاً ويمكن تتعدى عليها بكلمة تسوءها خصوصاً انها حاطة ابالها ان زوجها يدري ان امة المخطأة!! وهذا ما لا يطيقة اي رجل حقيقي في هالدنيا!!

عن نفسي لو تجيني زوجتي وتفكر انها تشتكي من أمي بقولها حلالها وتسوي فيك اللي تبي عاجبك عاجبك مو عاجبك مع نفسك!! ف ياليت تقدرين زوجك من هالناحية.

أما أخواتة مالج شغل فيهم ، انتي لج من هالعايلة هالرجل هذا وبس!! سكري عليه باب بيتك ومالك شغل بغيرة!! يروحون ويطلعون ويجون مالج شغل فيهم ، إذا بياخذونك معاهم جزاهم الله خير ، وإذا مابياخذونك ماعليهم خلاف.

بالنسبة لتقصير زوجك قوليلة ترى ربي بيسألك علينا يوم الحساب لانك راعي البيت والنبي يقول كلكم راع وكلكم مسؤول عن رعيتة ، طبعاً بنفسية حلوة وبوقت حميم.

والله يهدية إن شاء الله.

__________________
استغفر الله واتوب إليه

رمضان مبارك .....
ههههههههههههه والله نصف حكيك كاني اسمع زوجتي هي الي تشتكي ههههههههه
على فكره ..معلومتك غلط ان الاخوات يحبون زوجت اخوهم ...ليش

في الغالب اذا كان هذا الاخ سئءء فهم يحبونها لانهم يعتبرونها ضحيه معهم لهذا الانسان
اما عندما يكون الاخ جيد وممتازو وكريم معهم ...فهم لا يحبون زوجته بل يغارون منها لانها ستاخذ اخوهم منهم

وحتى لو لم يعترف احد ...فهذه هي الحقيقه


من خلال كلامك يا اختي ....................بصرحه
حبيت زوجك وحترمته ................لانه ماييبر بامه الا رجال ونعم ....وما يجامل اخواته الا رجال ونعم

وانا متاكد انك انتى عارفه ان فيه ايجابيات كثيره وان كان مقصر

وبصراحه لما تحشرني زوجتي بمثل تساءلاتك اقول لها

يكفي انكي فزتي بي ....ههه...فتركي .....الدنيا الزاءله لهم
والله ياختي بصوت رجل اقول لكي .................ان الانسان يقف عاجز امام اخواته ...وامه ....ولا يمللك الا ان يطيعهن
وان كان على حساب زوجته واولاده
فقد يستطيع ان يعوض زوجته واولاده لكن ...........................لن يستطيع ان يعوض اخواته او امه

نصيحتي
اصبر وصابري ..............زوجكي رجل .....كريم وسيقدر صبركي عليه ....ولا تظنيه غبي هو يرى الفرق ويتقبله على حسابك لانكي زوجته

اصبر وانا متاكد ان مثل هذه الامور لا تدوم بل تتغير فلا تستعجلي ....................

__________________
من الذكى انك تسوي نفسك احيانا غبي .....!!!
ومن الغبى انك تذيكى على اناس اذكيا .......!!!!

الله يهدي لك زوجك وكلام المتفائل بالله صح لازم تذكرين زوجك بحساب رب العالمين
ويارجل اهبل نعم يوجد اخوات يحببن زوجة اخيهن وانا منهم واخواتي نحب زوجة اخينا ونريها
مااشترينا وترينا ايضا ونطلع مع بعض وكل شي واخي كريم على زوجته كرم ماله حدود
الدنيا لسا فيها خير والله يسخر لك زوجك حبيبتي

عزيزتي ..

فقط دخلت لأدعو ربي يفرج همك .. وأن يهدي زوجك لما فيه الخير لكم ..

أم الزوج .. قصة كبيرة .. ومع كل زوجة حكاية عنها .. !!

لكن نلتزم الصمت لعل الله يفرجها بالقريب العاجــل ..

__________________

صارحيه بخصوص موضوع النفقة والسفر .... مو من حقه يتركك ويسافر معهم ويحرمك تمامًا من السفرات

على الأقل سفرة كل ست شهور، ما دام قادر


والنفقة بالذات لا تسكتين عنها، اطلبي منه مبلغ محدد كل شهر لك ولأولادك وحاولي يكون طلبك بطريقة تخلو من الاستعطاف أو الشك، حتى يعطيك ما تريدين


وفقك الله وأعانك على ما ابتلاك به

__________________
إن كان في العمر بقية مما مضى * * فالعيش في صدق هو أول الآمال.

غريب امر الرجال يرون الزوجه مطلومه ويقفون مع امهم وخواتهم ليش كذا ابي افهم كلهم اجمع على هذا الشي واول واحد زوجي صراحه حبيبتي انا عشت فتره مع اهل زوجي والحال كان مثل ما تقولين بالزبط لذا والحل الانسب لهذه المشكله تسكني ببيت لوحدك وبس ما تضغطين على اعصابك علشان احد ما احد يستاهل انك تضايقين علشانه

__________________
سبحانك اني كنت من الظالمين

كلام غير صحيح... احنا نحب مرت اخوي و نعزها و نعتبرها اختنا و اي عزيمة او شي نقول لها عليه... لأنها وحده منا و فينا... و بعد هي ما تقصر.. عمرنا ما حسينا انها مرت اخ.. بالعكس اخت لنا و بنت لأمي... مع ان اخوي كريم معانا و يحبنا و نحبه.. بس ما نغار من زوجته... بالعكس نوصيه عليها... و دوم نذكره بالإحسان لها... طبيعي تصير شوية مناوشات بينا... بس مسرع ما نتكلم عادي... يعني يكون بس اختلاف في الرأي فقط لا غير...

اختي بالنسبة لج... الكلام عن اهل الزوج مع الزوج اكبر غلط... لأنه يظهرج بموقف الإنسانه اللي ما تحبه أهله...

اختي لا تنتظرين من عايلة زوجج اي شي انتي اللي موترج انج تبينهم يعاملونج كانج وحدة منهم وهذا في الواقع مؤ صحيح بتظلين انتي كزوجة اخو غريبة على جسم العائلة وماراح يتقبلونج عدل الا بعد مرور 15 سنة على الاقل
بالنسبة حق ام زوجج فأنتي سوي مثلها تمسكني وسوي نفسج فقيرة

الظاهر انتي يا اختي وايد تجادلينه ويمكن بصوت مرتفع فحتئ لو كنتي مظلومة راح يشوف انج ظالمة بسبب ارتفاع صوتج او مجادلتج

في اشياء وايد ممكن نأخذها بدون لا ننطق بحرف واحد

استخدمي لغة الجسد والايماءات و نظرة العين هذي كلها تغني عن الكلام

ومثل ما قالوا إخواني الرجل الحق هو اللي يدافع عن امه ولو على حساب زوجته

وانتي لعد يا اختي لا تحطين نفسج بمجال مقارنة بينج وبين امه وخواته أكيد راح يوقف بصفهم

انا الصراحة ما اشوف ان في مشكلة كبيرة بقدر ما هي نظرة خاطئة للوضع اللي انتي فيه


الله ييسر امرج ويسخر لج زوجج

__________________
لا اله الا انت سبحانك اني كنت من الظالمين

لا تحشرين نفسك مع أخوات زوجك. بكيفهم يروح ويطلعون وين مايبون
أهم شيء مايقلون ادبهم معك ومثل ماقالت الاخت اللي قبلي تبقين غريبة عنهم
واذا استطعتي تسكنوا بيت لحالكم يكون أفضل.
و تقصير زوجك ترا بمزاجه و امه مي سبب المشكله. يعني بامكانه يقول لأمه ماعندي أو هذا اللي بقي معاي عشانك.
وترا فيه خير أذا بر بأمه وبعد عمر طويل راح يبر بك

__________________