هل انا طماعة؟
ما عرفت القسم الانسب لموضوعي .. فحطيته هنا ..
أول ماتزوجت قبل أكثر من 11 سنة عشت مع زوجي في غرفة وصالة والله يكرمكم حمام ببيت أهله ..
وجبت بنتين ماشاء الله في هالمكان وكنت اعاني من اهله شوي لتدخلاتهم بعيالي .. وايضا بناتي لما كبرو شوي اضطريت الغي الصالة واخليها غرفة نوم لهم .. فضقت كثير ان ماعندي مكان للجلوس ..
وكنت اتمنى اهلي يجوني بالاجازات بس مو بيتي .. أنا أستحي وهم يستحون ..
فكان حلمي إني أستقل ببيت ..
بعد 7 سنوات من الزواج طفح الكيل وكنت توني أعمل فأصريت على زوجي نطلع بشقة وانا بدفع معاه لعدم قدرته على تحمل كامل الأيجار ..
والحمد لله إنه وافق اخيرا بعد ماشاف إن الوضع ماينسكت عليه .. شقة صغيرة 3 غرف نوم صغيرة وصالة أيضا صغير ومطبخ ضيق .. لكني كنت سعيدة جدا .. فأخيرا حصلت على استقلاليتي وراحتي ..
بعد 5 شهور من انتقالنا للشقة بفضل من الله ومنته زوجي حصل على قرض الاسكان الحكومي ..
والقرض هذا ما يجيب بيت في المناطق الحيوية .. لازم نقترض من البنك .. وأنا كان راتبي بوقتها شوي .. وزوجي التزاماته وديونه ماتسمح له يقترض أكثر ..
فصار يبحث عن بيت في مناطق خارج المدينة لأنها أقل سعرا .... بس مشكلته في بعده .. وكانت الفكرة انه ياخذه ويأجره ويكون مدخول علينا.. لأني ماحبيت المنطقة لبعدها .. لما شفت البيت عجبني كثير وتخيلت نفسي أعيش فيه من بعد الشقة الضيقة .. وآثرت العيش فيه وغضضت النظر عن بعده وقلت بتحمل ..
فيلا صغيرة .. غرفها تكفينا بما ان احنا اسرة صغيرة .. ولكن الغرف والصالة ضيقة ..
الآن بعد 4 سنوات .. أريد منزلا اكبر ..
اريد بيتا اوسع ..
وغرفا أكثر وأكبر ..
لماذا الآن ..
لما أنجبت بنتي الثالثة .. احسست بأني أريد أبناء أكثر ..
وتمنيت ودعوت الله ومازلت ادعو أن انجب المزيد من الابناء .. ولا أمانع لو وصل العدد إلى 8 ..
طبعا في السابق كنت اقول بالكثير 4 .. ولكن فجأة أحسست باني لا يجب أن اكون انانية ..
بمعنى ارفض أن احمل وألد واربي المزيد من الأبناء بحجة التعب ..
ربما تفسير رغبي هذه أني اشعر بوحده لبعدي عن أهلي .. واتمنى إن عيالي ما يشعرون باللي أشعر فيه ..
أبيهم يكبرون مع اخوة اكثر واخوات اكثر .. بكرة كلن يشيل الثاني ..
أشوف اهل أمي كانوا 10 اخوان ماشالله والترابط بينهم قوي جدا تبارك الرحمن ..
في حين ابي وأخوانه ثلاثة فقط .. وليس هناك الكثير من الترابط بسبب مشاغل الحياة ..
طيب وشدخل الابناء بالبيت ..
بيتي لا يتسع الكثير من الأبناء ..
بكره يكبرون وكلن يبي مساحته .. وأنا أيضا أود بصالة كبيرة وشرحة ومجلس أكبر وغرف نوم أكبر .. وهذا حال أغلب البيوت عندنا ما شاء الله ..
والسبب الثاني بعد المنزل عن العاصمة .. تعبت جدا .. لما أبغي انزل مشوار 10 دقايق .. يتحول إلى ساعتين .. صرت ما اطلع .. واتنازل عن الكثير من المشاوير والطلعات بسبب بعد المسافة ..
احس بالاختناق ..
قلت لزوجي باقترض من البنك بما ان راتبي بفضل الله زاد وأصبح بامكاني ذلك .. ونشوف بيت أكبر وأقرب للعاصمة .. زوجي رافض الموضوع .. يقول البيت يشيلنا ..
انا ماقلت له أني اتمنى أنجب ابناء اكثر .. لأن عندي صعوبة في الحمل ولو انفتح الموضوع بيلومني وكأن الحمل بيدي .. أحيان يقول شدي حيلج .. يعني اشده شلون ؟؟ ألقح بويضاتي بيدي ؟؟
وي شصادني .. فجأة تلخبطت افكاري .. توها مرتبة كانت .. كله من طاري الحمل .. يااارب ماتجي السنة الجديدة إلا وانا ولدي بيدي ..
كيف اقنع زوجي ببيت أكبر ..؟ هو يحس إني طماعة .. ويقول فيه ناس عايشين بأقل .. واحنا شوفي وين كنا ووين صرنا .. ربي لك الحمد والله ماعترضت بالعكس دوم أحمد ربي على اللي انا فيه .. بس اشوف إنه لا مانع الانسان يطمح للافضل .. زوجي يشوف انه يكفي إلى هنا .. قلت له طيب ماعندي مانع بجلس بالبيت بس وسعه .. انا عندي حوش وفيه مساحة كافية من جميع الجوانب .. لو من كل جانب يتوسع متر بيفرق كثير .. مايبغي يحط يده .. أو يمكن ماعنده يدفع .. ويتحجج انه ممنوع لازم في معيار بالبلدية عن بعد المنزل عن السور .. اقول له انت بس أخذ الخارطة للمقاول وشوفه يمكن يصير .. حتى السؤال مايبغيه .. وصار بينا نقاش وشوي كبر ..
أنا سكت عنه وصديت وقلت له خلاص نبقى مثل ما احنا لا أبغي بيت ولا ابغي أكبر بيتي وبنام ..
25-07-2013, 10:54 AM
ضوابط المشاركة
العرض الشجري