بسم الله ابدء..
كتبت بالفصحى مالقيتها بردت تسبدي..فكتبت خليط مابين العاميه والفصحى
لعل وعسى..
انا موظفه،جميله جدا ليس الجمال العادي بل الملفت،"والله العظيم مو قصة مدح بنفسي بس عشان تعرفون معاناتي" ابلغ من العمر 36 سنه وتزوجت قبل 4 سنوات
تزوجت متأخر لاني طموحه..
تزوجت من رجل مطلق والسبب اني لم اجد اعزب يبلغ عمر اكبر من عمري الا وفيه
عيب شرعي كبير.. كشراب او سفريات مشبوهه او غيره..
هكذا كنت اظن.. وش يخلي رجال لاوظيفتن مثل العالم والناس وعمره كبير..
ولاماده الا الدجه وقلة السنع..!وابحث عن السبب الاقي به بلى.. وماتشفع عندي
كلمة خوذيه ويتسنع .. ماتسنع وهو بالعشرين مو متسنع الحين..
كنت افتخر انو على جمالي ووضع اهلي مو متشدد ما انحرفت.. وتعرفون غيرة الحريم
مافيه شي لاقين فيه عيب راحوا لعرضي وشرفي ..
وحركات العجايز.. هاه وش رايك بفلانه؟ ميلت الخشه وقالت الله يستر عليها!!
ولاسألتها وش فيها قالت ادعي لها بالستر !!! لحووول
ايه.. ايه .. انا عايشه بمجتمع غيور ووصخ .. وماعندي صديقات.. علاقاتي سطحيه
بعد هالمقدمه الطويله العريضه

وضحت شخصيتي..عقلانيه .مثقفه.. شبه مثاليه..ولماحه..شوية تسلط ع غرور
ولاعندي صبر.. فيني كبرياء عن بلد ..اموووت بمكاني ولا يفرح بدمعتي احد..
وفوق هذا كله اكره السطحيه والغباء واعتبرهم دم ضروسي..

تزوجت نقيضي.. دم خفيف لدرجة السماجه.. شخصيه متردده وخجوله..وملامح
اقرب للقبح حنون طيب .. وابو دميعه حساس ويحب يشتري ورد!
! انا اكره الورد احسه شي مخيس اشتريه اليوم ويذبل بكره.. لو شاري لي بقيمته خاتم اكسسوار ابرك لي..!!

الوكاد ان الله سخرني له واحبه بالرغم من عيوبه .. ولو يقول ارمي نفسك بالنار طمرت..
اكتشفت انه خاين.. وله سنين ع هالحاله راعي علاقات.. طبعا من كثر ثقتي بنفسي
ومن كثر ماهو طيب وحنون ويرقصني بالكلام والفعل .. ماحسيت
كشفته صدفه وسامحته على انها نزوه وخصوصا البنت تعتبر لامميزات ولا شكل ولاصوت.. او اسلوب..تعرفون مغازل الرحمه!!
هذا زوجي.. اي وحده فيها عاهه يغازلها ويصرف عليهاوانا يتحجج بالديون .. ولاقلت له وش ناقصني..؟؟
قال : انتي حبيبتي انتي انتي؟؟ وجلس يبرر خرابيط..
احيانا احس اني امه.. من كثر ما اوجهه مو عشانه عشان عيالي.. وقبل اجيب منه.. تاركته ع دجته.. وهو كان مبسوط.. ولما جبت العيال شديت عليه.. ولما شديت بانت العيوب.. واللامبالاه وعدم المسؤوليه؟وعدم الصرف؟

جالسه افكر بعيد عن عاطفتي هل يستحق اكمل معاه.. خصوصا مع الخيانه الاخيره والحلف الكذب.. وامور كثيره اقرفتني..

عشان عيالي .. مايصلح اب.. يصلح يصير اخوهم واربيه معاهم .. بس اب لا..!!
تعرفون الطفل المراهق المدلع .. كنت امشي هالنظام واستملحه لما كنت خفيفه.. وماعندي اطفال.. يوم كثرت المسؤليات تهرب كاني رجال وهو حرمه.. عجزت اعدله
قبل جونا كله ضحك ووناسه ومقاالب وسفريات.. وكان يخون .. وكنت ما اهتم لانها مكالمات .. ويترك بسرعه.. وتجلس البنت المسكينه تلاحقه وهو مطنش لدرجة ارحمها.. هالحين الدعوه تطورت وصارت فضفضه وعلاقات قويه .. واشك ان فيها مقابلات..!!
طيب وش المطلوب:
انا مابي ملقح بالعربي.. سالفة رجال عايش مراهقته يبي ينبسط ع الفراش وضحك ولعب وخدمه وتاليتها خيانات ولامبالاه ولامصروف مثل العالم والناس..!!
ويمنعني عن الطلاق انو حنون وصبور..
وعيالي لاسألوني عنه؟؟وش اقولهم؟
اخليه ع جنب؟واعيش حياتي؟؟
طيب وخياناته واحتياجاتي كأنثى .. من اني احس اني ماليه عينه..؟
وكرامتي .. ما احس ان فيني شي ناقص.. دلع وخدمه وجمال؟!
عجزت اعرف ليه هو يسوي كذا؟ هل يحس هو بالنقص؟وربي اني اتسيمج معاه واترك له القياده عشان مايحس انو انا كنترول بزياده! وادري انه مبسوط ولايستغني عني؟
انا مو مراهقه وزهرة شبابي وشكلي بيروح.. كلها كم سنه؟،اذا وانا بهالشكل.. والاهتمام.. وهذي حالته؟
شلون لو السنين بينت فيني ..؟ امي تقولي بتدورين رجال جديد؟كلهم يابنيتي كذا؟تختلف بس الاسماء ولا المضمون واحد؟
ماشلت هم الزواج.. مع انكم تعرفون مجتمعي السالف ذكره... لكن شلت هم عيالي..
بيعيشون بين ام مسترجله.. غصبا عنها.. وابو لاهي وعايش جوه..!!
جالسه ببيت اهلي حاليا .. كارهته .. وجالسه استخير بطلاقي..هل فيه مجال يتعدل..
رجال بيدخل عمر 40 .. ولا خلاص .. اتوكل ع الله واتركه؟ ع الاقل ما احس بنقص وغبنه وقهر ودمعتي ع مخدتي كل ليله وانا اسأل وش ناقصني؟