السلام عليكم ورحمة الله وبركاته

استحي اكتب مشكلتي امام كل اللي اقراه لأنها تعتبر جدا بسيطة ولكني محتاره

طبعا الأعضاء تعرفون مشكلتي مع تأخر الانجاب الحمدلله انا وزوجي بدينا بالعلاج وبعد فترة مقبلين على محاوله جديدة.

طبعاً التأخر متعب كل حياتي ونفسيتي صرت اعاني من القالون العصبي والمعدة من كثر التفكير ووجهي شاحب يقولي الطبيب كله من ابر الهرمونات ولكن نحتسب الاجر من رب العالمين

انا طبعا كاتمه وكاتمه وامثل قدام الكل بالعمل بالبيت بالزيارات اني بخير لكن عند أي موقف او ضغط انحط فيه اعصب واتنرفز بس كل شي يطلع على زوجي اضبط اعصابي باي مكان لكن معاه انفجر وممكن اجرح بالكلام على موقف تافه وما يكون سبب الانفجار الا الشي المكتوم داخلي وادخل نوبه بكاء لحد مااهدا خاصه مع تغير الهرمونات كل شهر .

قبل اقل من أسبوعين حصل موقف وعصبت وجرحته اعترف لكنه السبب نرفزني وعصبني مايعرف وش كثر احتاجه وهو دايم مشغول بالعمل اتحسر مرات على نفسي ومشكلته ما يعرف يمتص غضبي ولا يهديني بالعكس يستفزني وما يعرف يتعامل معي بهالمواقف مع اني شرحت له اكثر من مره كيف ممكن اهدا انا مره طيبه وحنونه وحساسه حضن او احتواء على طول بهدا لكن هو يحسب اني اعاند او اني طويله لسان وانا بس من الألم اللي فيني والقهر من أسلوبه مع انه يحبني كثير وحنون .

المهم هو يمر بظروف بعمله مغير عمله والعمل الأول لسا متأخرين مااعطوه حقوقه ولسا توه بالعمل الجديد وعنده مكتبه الخاص وجالس يضبط وضعه في مشروع جديد وورانا التزامات نبني بيت وتعرفون التكاليف والقروض وعندهم اشوي مشاكل في بيت ابوه مع خواته فصاير عليه ضغط كبير زوجي قوي جدا لكن له كم يوم متضايق كثير وزعلان ومهموم وساكت مره وحتى العلاقه الخاصه بينا ما يقدر نجلس فترات طويله مع بعض احسه ما يقرب مني ويقولي ماادري اشفيني يمكن من الادويه ويقوله انه شايل علي وزعلان من اخر كلام وانا اعتذرت منه ووضحت موقفي في كلمه خطأ قلتها وانا مااعرف معناها وحلفت انه مو قصدي وبعدين صار موقف وبرضو غلطت بمثل شايع ينقال قلت له شفت علشان تعرف انه مو قصدي وانه اختلاف كلام بالمناطق والمفاهيم .


انا الحين خايفه انه ما يبيني ولا يبي يصير شي بينا بسبب انه شايل علي ؟؟ وماني عارفه كيف اخفف عنه كل ما كلمته يقولي قلبي يألمني وشكلي بموت ويقول انا مو طبيعي يمكن من الفيتامينات .