السلام عليكم ورحمة
الله وبركاته ..

،،

في كل مرة ألاقي نفسي
بمشكلة محيرة ، ألجأ إلى
الله ثمّ إليكم ،
لأنّي أتوسّم فيكم النآصح
الأمين ،،

،،

أتيتكم مثقلة حزيـــــــــــنة !
وأتمنى التخفيف منكم عنّي
ومناصحتي ، وتوجيهي كما
عهدتُ منكم ،،


أنا أصغر أخواتي ..
بنهاية العشرينات
وهم مثل امهاتي ..
وانا الوحيدة الجامعية ، وطالبة
ماجستير ، وموظفة بمكان
راقي ، ( ماشاء الله )
( من دوافع المشكلة ربما )

خوآتي كبار عني ، أنا في
سن أولادهم وبناتهم ..
ولأنّي الصغيرة ، لكنّي الأكثر
خبرة بالموضة ، وبدقائق الأمور ..
وأنا تعرضت لخيانة وطلاق ،
صرت قوية جدا وعقلانية عكس
خواتي ، الغافلات المستغلات..

مشكلتي :
ماا أقدر أصـبر ما أنصـح خواتـي
وبناتهم ، وداخلي حب وقلب يحترق
وهم طبعا يواجهون نصحي بالعداوة
والخذلان .. !
ويفعلون العكس وانقهر عليهم !!!

استخدمت كل أساليب المناصحة
لكن خواتي شخصياتهم ضعيفة
ومشاكلهم كثيرة ، أغلبها من قراراتهم
لأنهم ما يتشاورون ، ويخبون على بعض
كل شي ( خطوبة ، حمل ، سفر ) وكل
وحدة تخاف من عين الثانية !
مع إنّي أعرفهم مو حسودات ويحبون
الخير لبعض ، بس يعتقدون بالعين
بطريقة منرفزة للغاية !!
،،

وبنات خواتي متباغضات ، وشلل
وبينهم عداوة، فبدت العداوة تتوسع
وبالذات تجاهي ..
أنا أحبّ خوآتي حب يخليني ما أصبر
عن إبداء المشوره لهن .. لكن بناتهم
يقلبون الطاولة علي ، ويظهرون نصيحتي
بمظهر المحتقر ، اللي يبي يمشي رايه ..


أحسن ، ويساء لي .. اتقطع بالنصح ..
ولكن لا حياة لمن تنادي .. طبعا كل وحدة
توصّل لي غيبة الثانية وغيبة بناتها فيني ..
وكيف يفسرون كلامي لبعض وانصدم
بخبث التفسير ..

طبعا أنا عندي مشكلة وهي النسيان ..
أنسى كثير وأحيانا أنسى اماكن ومواقف ..
وانسى اشياء قلتها ، وهم هنا ماخذين عني
فكرة اني اتناسى ، وكذابة ، وجاحدة
والله المستعان على ما يصفون والله يعفو
عنهم !!

هم ملتزمات ، على نياتهم بقوّة ( لدرجة
السذج ) وبناتهم ( تعرفون بنات هالزمن )
وتحاسدهم وتدابرهم ، وماخفي اعظم ؟!
وكلهم أصغر مني بسنوات قليلة فقط !



خواتي ، يقدسون ازواجهم لدرجة انو عادي
الوحدة ما تزور امي اللي ما تزور منطقتنا
الا كل فترة وفترة ، وعذرهم ( رفض زوجي ) !


أزواجهم بعضهم مستغل سيء ومسيء ..
ومتحملات كل الظلم بغباء ، لأنهم يحبون
أزواجهم ومايبون ديرة امي ..


عندهم عقدة طفولة متفق عليها الكل
ذكورا واناثا ( إن زيارة الأهل بالديرة )
من المستكرهات ، عشان الديرة مافيها
خدمات ، بل أبسط الخدمات مو فيها !!


القهر أنا ماعلي من كل هذا ، أنا أبي اجمع
القلوب ، أبي البنات وخالاتهم قلب واحد ..
أبي نعيش جو السعادة اللي غير موجود بينا
كخوات وخالات ..



أعترف أسلوبي شوي قوي .. وسريعة الغضب
كثيرة الشرهة ، بس والله شرهتي بمحلها ..
لو أشرح لكم متأكدة بتأيدوني ..
بس والله خُذلتْ في عز حاجتي لهم ، بفترة
طلاقي وشتاتي ، سمعت منهم الشين في عرضي !
شفت التخلي عني وانا صغيرة السن تاركيني ببيت
لوحدي ، ما يزوروني ، مايقولون وش محتاجة !

مرة ترجيت اختي تخلي بناتها ينامون عندي
لأني بالويكند وابي انيسط معهم في بيتي
وبيتي مافيه احد الا اختي تحتي ..
لكن رفضت اختي كل محاولاتي ، جت بنت
اختي وقالت ؛ امي ماتبنا نجي عندك
عشان ماتخربين اخلاقنا !!


وانا والله ماسويت شي يخليهم يحكمون علي
كذا ، بل تعرضت للتهمة والقذف من بعض أولادهم
ومن اعتداء البعض الآخر ، وعانيت وعانيت ..

لكن لا يمكن يصدقون كلامي في عيالهم
مع انهم يحبوني ، ووقفوا معي في كثير من أزماتي
لكن ، ما أبي المجاملات ، ما ابي الحواجز
ابي القلب الواحد ..


حنا خوات ♡
تم تعديل العنوان

حبيبتي ولأنكم خوات لازم تخففي شرهة ونصح

اختي لازم تتأكدي اول شيء ان واجب ع الزوجة م تخرج بدون رضا زوجها

خواتك يحبون ازواجهم طبيعي ،،اذا م جاو وقالو من ازواجهم اكتفي بالدعاء لهم بالتوفيق

البر الواجب عليهم لامهم يعرفونه ،،واكيد انهم يعملو المستحيل لاجل يزورون امهم

وبالنسبة انك تشوفين بناتهم يقلبون الطاولة عليك طبيعي موقفهم

لانهم يحاولون يوقفون نصائحك اللي بالنسبة لهم تدخل غير مرغوب فيه

وانتبهي حبيبتي انتي جالسة تتكلمي عن الجميع خواتك وازواجهم وبناتهم

يعني كل وحدة من خواتك كونت لها اسرة خاصة فيها ،،لها خضوصياتها واسفارها ووو

تبين نصيحتي ؟ اذا اجتمعتي ف خواتك سولفي سوالف عامة ،، خليك بعيدة عن التدخل ف شيءيخصهم

او يخص حياتهم بالذات ازواجهم وبناتهم وتربيتهم


للمعلومية م ف وحدة تحب اختها تقول لها زوجك مسيء او يستغلكً

او بناتك فيهم وفيييهم ،.. وطبيعي بيعادونك اذا ظل اسلوبك كذا .. وهذا م له دخل

بمستواك العلمي او وظيفتك المرموقة او شخصيتك القوية


الله يوفقك

__________________




ربِ هب لي من لدنك ذرية طيبة أنك سميع الدعاء

بديت أكره جمعتنا العائلية
بديت أكره الديرة اللي جامعتنا
بسببهم ..


أفكر أسافر بلد ثاني ، وأعيش
بعيدة عنهم ، لا أتشره إذا احتجت ..
ولا أتدخل فيهم ، ولا يشوفوني إلا
نادرا ، لكن ..
والله ما استانس الا معهم ، احس
اني ما لي غناة عنهم ، انا اختهم
ببداية حياتي ، اذكر وانا صغيرة
كانوا سند لبعض ، لان امي بعيدة
كانوا قلب واحد ، كل وحدة تنام عند
الثانية ، وكل وحدة ترعى اولاد الثانية
كبروا واستغنوا ، طيب انا وش ذنبي
إني صغيرة وتوني احتاجهم ، للأسف
كثير احتجتهم ، وخذلوني ..
ملوا مني ، راعوني بفترة مرضي اللي
أفقدني ذاكرتي جزئيا ، وكنت اعاني
المرض وصدمة الطلاق وفراق الوالدين ..
كنت متوحشة شرسة ، عنيفة ، لكنهم
تحملوني ، لكن عندما تعافيت ، تغيروا
علي ، ليش ما راعوا ضغوط الحياة
وصغر السن ،!
كل أخطائي اللي عاتبوني ، بل ربما
ضربوني عليها ، كل ما انتقدوني فيه
صاروا اولادهم يسوونه ، وهم من يجدون
لأولادهم وبناتهم التبريرات ..



تعرضت للضرب المبرح ..
لاخذ مايرونه ممنوعا كالجوال
وتنانيري القصيرة قليلا ( ميدي )
وعلبة مكياجي ومناكيري !!
وانا في ( الكلية ) !!
لأنواع التحطيم ، على كل تقصير ..


وكل خطاياي صارت حسنات أرى بناتهم
يمارسونها وهم صامتون !!!!

كل شي قبيح في بناتهم يقولون لبناتهم
كنكم ( فلانة ) باسم مكسور !
يقصدونني !!


والله ما انسى الكبت والضرب والتحكم
مع ان والدي راضين عن كل ما افعل
لكن الله يسامحهم ، اخواتي ، سبب
شقائي في هذه الدنيا منذ طفولتي ..

عالم متناقض ..
يكره الناصح الأمين
ويعشق المتملق صاحب اللسان المعسول !

لم يقنعني كلامك هذا !
اخواتي هذولي !
خواتي ولي حق فيهم مثلي مثل بناتهم !
ليش اخليهم يتشتتون ويتخبطون ..
وانا اعرف الصح واسكت عنه لمجرد عدم رضاهم

ازواجهم وابناءهم ماتدخلت فيهم .. انا اشرح
لكم الواقع .. وإذا على التدخل ، هم مقحمين
انوفهم بحياتي .. لدرجة ان بعض أولادهم
تجرأوا على قذفي في شرفي ، فقط لأني
( مطلقة )
لو كانوا ما يتدخلون فيني ، صدقيني
ماراح اتذخل فيهم !


والشي الثاني انتي تحاولين تفهميني
انو اتسطح بعلاقتي مع شقيقاتي !!

إذا ما امون على خواتي !
على من امون !!


العداوة بين خواتي تكبر حتى بين بعضهم
انتي مو متصوره الوضع ،،

أصلحي هذه فقط وستلحظين التغير .

اللي عدلت العنوان مشكورة ،
كيف اصلح علاقتي وعلاقة اخواتي مع بعض

ليش وجهتوا لي اصابع الاتهام
في كل مرة افتح الموضوع ، اشعر وكأني
الآثمة المقصرة !

ليش العالم صارت بالمقلوب !

آفاق المجد ،

شرحت أسبابي ،
لو وجدت احتواء ومحبة ..
لكنت ألطف مما انا عليه ..
الكل يجلدني من جهة ..

كل ما اطالب به هو حقي فقط !
لو مو محتاجة لهم ..
لاستغنيت بنفس كمية غناهم عني ..

الله المستعان ..

اعرف كل هذه التوجيهات !
وانا استطيع تطبيقها !
لكن : اذا ما لجأت لخواتي وتعايشت معهم
لمين ألجأ بعد الله !

ليش مبعديني عنهم ومقصرين بحقي !
وليش الاتهام !
ليش الظلم وعدم العدالة في نظرتهم لي ولبناتهم
انا كل تصرفاتي خزي واثم وغلط !
وتصرفات بناتهم مراهقة وطيش ، وما ادري كيف !


ليش ما يكونون الكبار هم اللي عليهم الحق
مو الصغير المحتاج

فضلا : اقفوا الملام ، وتحميلي
الذنب ..
إذا لا يوجد عندكم سواه
عن اذنكم ..

غاليتي .. أنت الآن لست بالطفلة المحرومة
بل طالبة دراسات عليا وموظفة ومستقلة
وهذا يعني أنك على درجة عالية من الوعي والنضج الذي يجعلك تفهمين جيدا معنى العبارة القائلة :
كن أنت التغير الذي تريد !
عاملي الناس كما تحبي أن تعاملي أنت
شرحك وتبريرك لشدك وكثرة لومك ليس دافعا لقبولها ممن حولك
لقد جربتها أنت ورأيت النتيجة
العاقل يا غاليتي لا يأتي بالفعل نفسه ليحصل على نتائج مختلفة !
لا بد من إحداث التغيير كي أحصل على النتيجة التي أريد
لابد أن تهدئي من طبعك وتعملي على تطوير ذاتك
والرفق ما كان في شيء إلا زانه وما نزع من شيء إلا شانه !
كوني رقيقة الطبع ولا يبدي رأيك إلا إذا طلب منك
وإذا رأيت منكرا فغيريه باللين والمجادلة بالتي هي أحسن
كوني أنت قدوة لهم كي يتقبلوا منك ما تريدين
ولست والله أتهمك بشيء أبدا
لكن أنت التي جاءت هنا وتكلمت وسردت الأحداث ، فلا يجديني نقد تصرفات أخواتك ولا بناتهن
الذي يعنيني هو مساعدتك للوصول للراحة ولما تأملينه من العلاقة الطيبة بأخواتك وبناتهن
أما مسألة الغيبة فالعرب تقول تقديما : ناقل الشتيمة هو أحد الشاتمين
فلا تسمحي لأحد أن ينقل لك أي أمر تكرهين سماعة
وأخيرا أكرر
كوني أنت التغيير الذي تريدين
أصلحي من نفسك وطوري ذاتك
كوني قدوة في الرفق والحكمة
أسعدك الله ووفقك