السلام عليكم ورحمة الله وبركاته
بحاول أختصر عليكم موضوعي وابغى رأيكم وتدعون لي برجوع زوجي
انا تزوجة قبل 9 شهور وقبل شهرين تطلقت طلقة وحدة وحامل والسبب نفسية الحمل لأن معاي إكتئاب الحمل
تزوجة واحد الحمدلله محافظ على صلاته طيب معاي بس مشكلته ضعيف الشخصية يروح يقول لأهله كل شئ وطبعاً لأنه أصغر واحد في الأولاد فامه واخواته متعلقين فيه ماكان ناوي يتزوج عشان يخدم اخواته ويأخذ الأجر يعني تعودو يجيبهم ويوديهم انا سكنت تحت أهله وأمه واخواته فوق والبيت أشك انه بيت أخته ملك لها مع أن زوجي يقدر يستأجر برا بس مايقدر عشان ماتزاعل أمه واخواته وإخوانه متزوجين وسأكنين برا وعايشين حياتهم مع زوجاتهم إلا أنا مراقبة اذا سمعو صوت الباب تسكر جات الاتصالات عيونهم علي يدورون الزلة مع اني أقسم بالله ماقصرت معهم تخيلو ثاني شهر من زواجي يقول زوجي يلا نفطر برا اقول نأخذ أخواتك معنا أخذهم نروح السوق سوا اطلع لهم تقريبا كل أسبوع اسوي قهوة وأخذ حلا واطلع
مرضت أمه وصليت الفجر وطلعت أسلم عليها وجلست معها إلى الظهر مع أنه حريم أولادها ماسو زي ماسويت ولا جو زاروها
اتصل عليها لما سافرت كل اسبوع وياليتها ترد علي الله يكتب أجري
بس عنده اخت كبيرة مو متزوجة غيورة بشكل فضيع تحاسبني وتدقني بلكلام على اثاث بيتي على روحتي على كل شئ
اذا رحت لأهلي وراح معاي زوجي تزعل أمه ليه يجلس معاي أهلي طبعا في مدينة ثانية
ابوي جاب لي فاكهه راحو بناتها يعلمون امهم جات تقول لزوجي اذا اشتريت فاكهه لبيتك جيب معك لنا بغيت أتكلم اقول ابوي الي جابها بس سكت
حسبي الله ونعم الوكيل
يوم حملت وبدأ الوحام والنفسية زفت وفوق ذا أخذ حبوب مثبته يمين الله شوي أفقد عقلي منها صرت اتضارب مع زوجي ويرتفع صوتي وأهله مايسكرون ابوابهم فيسمعون تدرون وش قالو عني مريضة
تخيلو حامل نفسية زفت تعب فوق ذا يجون يقولون لزوجي زوجتك قالت وفعلت كرهت زوجي كرهت بيتي محد رحمني وصلت لدرجة أمد يدي على زوجي بس مو ضرب قوي لا بالايدي وكذا وهو مسكين أحيان يمد يده واحيان يسكت
رحت لأهلي في الحج هم استغلو الفرصة مسكو زوجي قلبو رأسه علي وراح هو قالهم عن كل شئ يصير بينا تخيلو ياناس رحت من عند زوجي وهو يكلمني طول الطريق ويوصيني على نفسي وبس طلع لأهله ونزل تغير الرجال خلال ساعة بس غيروه اتصل علي يقول أنتي ماسلمت على أختي تخيلو عشان رحنا لاخوة وجات أخته مدت يدها وماشفتها قالت فلانة سلمي قمت سلمت يعني وربي مو قاصدة هالشي
راحت أخته تفتن تقول لزوجة أخوه اني اقول عنها كلام قالته عن أم زوجي وأقسم بلله ماصار هالشي
رجعت بعد الحج بعد مارجعني ابوي لبيتي وحل المشكلة بيني وبين زوجي
وياليتهم ريحوني أخته بكل حقارة تقول لزوجي جاء مقطع وصخ في التلفزيون تقول فلان طالع انا استحيت ونزلت رأسي وزوجي استحى وقال غيرو القناة
اذا راح يودي اخواته مكان وأتصلت عليه يزعل ويكلمني بأسلوب مو حلو ويرجع البيت يصعب علي مع أنهم يتصلون عليه لما أكون معه وأقول شئ صابره تخيلو من بعد الحج وهو متغير علي الله واعلم وش قالو له عني
صح اني غيورة بشكل فضيع بس كل حرمة تغار
رجع البيت وعصب ليه تتصلين علي وجاء بيطلع من البيت منعته خفت يطلع لاهله ويزيدون الشرارة مابيهدونه مسكني بشعري وسحبني
اليوم الثاني قال يلا بوديك رابغ لاني كنت ابغى ذا الشئ طلع يعطي أهله خبر وطبعا طلب مني مفتاح البيت عشان يعطيه أمه لاحظو مافيه خصوصية طلع وتأخر أرسلت له رسالة قلت انا جاهزة مارد اتصلت مقفل جواله جلست اتصل مقفل طلع محولة شوي نزل معصب ومسكني وجلسني على الكرسي بقوة واذا جيت أقوم يرجع يجلسني حسبي الله ونعم الوكيل عليه ماقدر اني حامل وصفقني كف الله ينتقم من أهله وفصخ شبشبه وانتم بكرامة يبغى يضربني شردت غرفة النوم لحقني
وأتصل على أبوي يقول تعال خذ بنتك انا على طول اتصلت على امه قلت ولدك ضربني قالت لا ولدي مايضرب
وبعدها ندم وجاب اخوه يصلح اخوه ذا عارف خبث اهله
وربي أمه شافتني أبكي وزوجي معصب وأخوه جلس يكلمنا عشان نتصالح أقسم بالله تجي بدال ماتهدي الوضع قامت تقول اني اتضايق اذا ركبو معاي في السيارة الله ينتقم منها أقسم بالله أما اقول لزوجي يلا نأخذ أهلك نطلع حق الاسماك تبغى تزيد الشرارة بيني وبين زوجي
مشيتها له رحت رابغ نكد في نكد لدرجة قلت له تبغى الي في بطني ولا انط من على السرير وانزلها كرهني في عيشتي
رجعنا من رابغ وأهله مقهورين لانا تصالحنا ومشاني في رابغ وصلت فيهم لدرجة مايسلمون علي وطبعا يوم كنا في رابغ عاهدني بلله انه ماعاد يقول لأهله شئ وانا كمان ماقول لأهلي شئ
جاء اليوم الي تطلقت فيه والسبب أخته مقهورة لأنه وداني رابغ وتمشينا سوا صارت بس تدق على اخوها يلا ودني المستوصف وداها اليوم الثاني قلت له ابغى المستشفى بصلح أشعة ومنها حسيت نفسي تعبانة والله ي اعالم اشتغل في المطبخ وارفع رجل وأنزل رجل من التعب وفوق ذا حرم علي مايوديني المستشفى وراح ودى أخته وياليته عشان شئ يستاهل بس عشان تأخذ عذر طبي لانها مدرسة وغابت عصبت صراحة وزعلت ومسكته دفيته بقوة من الزعل والتعب الي فيني وطلع برا وطلق بثلاث الحمد لله الشيخ حسبها وحدة
وجاء عندي قالي يلا نروح لأهلك ماكنت عارفة انه طلق في السيارة كان حزين اساله وش فيك يقول راسي مصدع امسك يده يشيلها بس كان يعاملني باحترام
يوم جابني لأهلي قال لأبوي بروح الصيدلية بعدها اتصل على ابوي يقول جبت بنتك معززة مكرمة أغراضها وورقتها بيوصلونها وانا طلقت واذا تبغى شئ كلم اخوي ابوي زعل يقول ليه يقول كذا انا زوجته ولا زوجة أخوة
قال ابوي طيب وراح ابوي الله يصلحه أرسله اليوم الثاني ارسل النفقة وجيب ملابس وذهب بنتي
وصار ابوي واخوي يحطون توبيكات مالها داعي مثل (تربية النساء لاتخرج إلا أشباه الرجال )واخوي يحط توبيك (اذا اكرمت الئيم تمردا )ومادري وش عاد زوجي زعل وأخوه يتصل على أبوي يقول غشيتونا بنتك مريضة وبشتكيك في المحكمة غشيتنا
تخيلو مرة قلت لزوجي انا كان عندي عين قبل 7 سنين والحمدلله تعافيت من قوة العين جاني وسواس قهري والشيخ نصح ابوي اروح لدكتور نفسي بس ابوي رفض والحمدلله طنشت الوسواس وذلحين انا بخير ندمت لاني قلت لزوجي
واتوقع لآ هو عيب ولاحرام هذا من ربي المصيبة اخوه الي جلس يعايرني ولده فيه مس الله يعافينا وأم زوجي فيها حسد وعين جابو اغراضي وانا في صدمة لأن ابوي ماقالي اانه طلق قال يقول بيطلق واليوم الثالث من يوم جابني عند أهلي ألغى رقمي وزوجة اخوه تقول يقول لاخواته ألغيت رقمها
جلست اتوقع 3 أسابيع ماكلمت زوجي ولا أرسلت له أرسلت له اعتذر له قال أبوك قطع الحبال المفروض يوم قلت له طلقت قال ألعن الشيطان وبنحل مشاكلكم لاكن من ثاني يوم يقول ارسل النفقة مادري وش أهم حياته بنته ولا الفلوس لاكن أبوك مايبغاك ترجعين
كلمه عمي الي مو متزوج قال لا خلاص الي بينا انتهى وبشوف حياتي الجديدة وهي تشوف حياتها الجديدة وحط الغلط على توبيكات ابوي وانا اغلاط بسيطة وحط توبيك انه ألغى الرقم
انا قلت في نفسي كذاب مالغى جواله
جلس أسبوعين وقام فك البلوك عني وفكيت البلوك انا كمان قمت أرسلت انه طلع معاي إكتئاب الحمل الجنين وزنه صغير بسبب نفسيتي قام ارسل رسالة انتي فعلتي وانتي قصرتي معاي وأبوك يحط توبيكات بدال مايصلح شكله متوقع النهاية تخيلو في الحج بعد مارجعت بيتي رجعني ابوي للبيت زوجي يقول لأبوي بنتك تعصب قلت والله مو مني من الحمل قال ابوي لا الحمل مايصلح كذا ويقول لزوجي اذا صلحت شئ اصفق برأسها في الجدار ولاتصير طيب معها بزيادة تخيلو أبو يقول كذا الله يسامحه
قلت انا ندمانة وعرفت اغلاطي فعلا انا كنت اروح أقوله اختك فعلت واخته قالت
قلت انت صادق انا قصرت معاك بس والله موبيدي أهلك جننوني ماريحتني عشان أقدر اسعدك قال انتي اهملتيني واهملتي بيتك وجلستي تطالعين في حركات أخواتي قلت انا ندمانة وعرفت اغلاطي قال رجعه مافيه قلت عمي بيجيك يتفاهم معك ويصلح
قلت رجعني واذا ماتعدلت رجعني بيت اهلي قال قولي لعمك لايتعب نفسه مافيه رجعه أبد ابد قلت طيب
وصكني بلوك طيب ليه فكه وش يبغى ذا
أرسلت له رسالة نصية قلت له وش التناقض مرة تصكني بلوك ومرة تشيله بدال ماتجلس تفكر كيف تصلح بيتك الي انخرب تجلس تفكر كيف تشوه سمعتي وتمسك علي شئ يثبت اني مريضة الله يثبت برائتي عاجل غير آجل والله يعطيني أضعاف نيتي لأن نيتي الإصلاح فك البلوك وأرسل رسالة شوفي أبوك وش كاتب في الحالة ماراح أسامحه ولا أنساها له بدال مايصلحها يولعها
ووأقسم بلله لو ابغى أرجعك كان رجعتك من زمان لاكن الي بينا ماضي وانتهى اقطعي رسائلك واتصالاتك واذا عندك أمل في الرجعه اقطعيه اقسم بلله مارجعك والبنت حلال عليك ماتهمني وانا خطبت وببدأ حياةجديدة وانتي أتمنى لك حياة سعيدة
أرسلت له البنت يحرم علي ماتجلس معاي ليه مين أبوها رد انا خطبت مو فاضي لها ورجاء خاص خﻻص ﻻعاد ترسلين لي شيء
وش ذنبي عشان توبيكات ابوي واخوي وتحريض اهله يسوي فيني كذا
وينه اليوم الي قبله ماقال لي خطبت نام وصحي وطلع خاطب
المصيبة انه حنون وطيب ماشاء الله عليه ومتعلق في البنت الي في بطني
صراحة متناقض في كلامه مادري هل هو ندم مرة يحط الغلط على ابوي ومرة يقول لو أن أبوك اصلح كان رجعنا ومرة يقول لو ابغى أرجعك كان رجعتك من زمان
صح اني من يوم حملت نكدت عليه عيشته بس كمان اهله ماقصرو
بعد الطلاق بأسبوعين حلمت حلم وطلع تفسيره أن بيرجع زوجي وأنه تبلا علي وأهله وقفو معه وربي بيظهر برائتي وبأنبهم ضميرهم وتنقلب عداوة أهل زوجي لمحبة وفعلا زوجي وأهله اتهموني اني مريضة والله الحلم ذا فسرته عند تقريبا 5 شيوخ قالو لك رجعه لزوجك
حتى صرت أشك أنها حديث نفس مع أن الشيوخ يقولون هذي رؤيا
ورجعت كلمت شيخ ماشاءالله عليه شاطر في التفسير لدرجة ماشاءالله من الرؤيا عرف انا في اي شهر حامل قلت انت فسرت لي حلم وقلت ترجعين لزوجك ذلحين الرجال أقسم بالله مايرجعني ويقول انه خطب هل يعني أنه الحلم مو رؤيا حديث نفس قال لا بس ذلحين يمكن زوجك جالس أحد ينقل له كلام أو ماتدخل أحد حكيم في الموضوع وياما حريم تطلقو ورجعو لازواجهم
ذلحين عندي خالي حكيم وطيب والكل يحبه وله قبول في الأرض كلم زوجي قال ماعاد يبغى يرجع والي بينا انتهى أبوها واخوها ماحاولو يهدون خالي يقول من كلامه متردد ومو واضح في كلامه وماكان صريح مادري هل هو ماكان حازم في كلامه مستحي من خالي ولا هو وده برجعه بس زعلان من توبيكات ابوي واخوي مع أن زوجي يقول أبوك انهى حياتنا برسائله حسسني اني داشر
تخيلو ماقال لخالي انه خطب لو أنه خطب كان قال له
طبعاً عمي اصغر من ابوي كمان ارسل لي يقول أعطيني رقمه بكلمه قلت له أن عمي الي مو متزوج كلمه ورفض قال عمك ذا مايعرف يحل مشاكله وفعلا عمي ذا شباب ماله خبرة في الحياة
وش رأيكم وش اسوي ابغى أرجع لزوجي وتعيش البنت بينا ولا اقدر اشترط بيت برا لأنه مستحيل يطلع
تخيلو إخوانه انانين محد حاول يصلح كل واحد عايش حياته وأهل يبغونه سواق لهم وش ذنبي انا
وذلحين هل ابدا اطلب النفقة قال لابوي بيرسلها لاكن مارسل شئ
ولا اصبر حتى أولد
عمتي تقول اصبري لاتستعجلين أخاف تطلبين وهو له نية برجعه بس يكابر وتخرب مرة ثانية خليه حتى تولدين وشوفي وش يصير يمكن يحن قلبه ويمكن البنت تجمعكم مرة ثانية
والله ياناس مصدومة من كلامه يوم يقول البنت حلال عليك أقسم بالله فرحان فيها ويحسب متى تجي ومحمل برنامج في الجوال حق حساب الحمل
والله اشتريناللبنت بربتوز والله ما جابه مع اغراضي
أدعو لي الله يرجع زوجي لي عاجل غيرآجل ويفرح قلبي برجعته قبل الولادة

وش رأيكم تتوقعون زوجي بيرجع لي ولا خلاص أفقد الأمل
مستجدات رد 225
(تم التعديل ليتناسب مع المضمون)

أهم شرط للرجوع بيت لوحدك ...

اذا بتضلي عندهم بترجعي لاهلك وبتتطلقي حتى تحرمي عليه

لذلك طنشي طليقك لو يبغاك بيرجعك مهما سوو أهلك

ومصيره لو تزوج بيطلق لا تخافي لانه أمثاله يمشونهم حريم عدوات انفسهم


واقلك عجبني تصرف ابوك واخوك لانهم عارفين معدن الرجال يبغونه لما يرجع يفكر صح مو يشاور الماما ع كل صغيره وكبيره في حياته

اثقلي واذا ولدتي بالسلامه شوفي الوضع كيف لو برضه مارجع الله يعوضك

وبعدين من جدك تحرمي انه بنتك تعيش معاك... بالله تتطمني تتركيها مع اهله ع بالك انه بيشيلها اكيد بيعطيها اهله وفي النهايه عندهم انها بنت فلانه الي يكرهونها

ادعي ربك انه يصلح مابينكم بدون ماتترجي فيه يرجعك ...

زوجك يضحك عليك ماراح يتزوج ولا يحزنون بس يبغى يخليك عايشه في قلق

انتي حامل ارتاحي عند أهلك ولا ترسلين له ولا تتصلين وهو من نفسه راح

الله يعيينك
انا اقول نصيحة اصبري شوي لين تولدين
لانه بعد الولادة بتتغير نفسيتج للاحسن
يمكن قلبه يحن اذا شاف البنت
و الله يهدي النفوس
مشكلة تدخلات الاهل
الله يكون في عونك
ما اعرف وش انصحك والله

و اثقلي شوي
مبين عليج انج مشوشه من الحمل
اصبري و اطلبي من الله الهداية و الصبر

أختي أنت طلبتي رأينا فسأقول رأيي وتحملي .. والله أسأله أن يهديك ويوفقك
لمست من خلال كلامك مدحا مبطنا كدليل على ندمك وهذا جيد
1- أنت مخطئة والطلاق تأخر بعد ... وتبين الصدق لو أعرف زوجك خطبت له . ( ابتسامة ) . ولا ينكر خطأ الرجل لكنه يسير هنا وعادي وبعضه ردة فعل ولا يقارن أبدا بتصرفاتك
مثلا أهله أكرموكم كلكم وسكنوكم تحت وهم طلعوا فوق وهذا بيت مستقل لك وله شرعا وعرفا ، لكن شكلك تبين تفرقينهم عن بعض وتبين بيت ماله علاقة فيهم وبعيد عنهم . فخافي الله . هذا لحاله مشكلة لحالها فيك .

2- إخبار الولد لأمه ببعض شؤونه وحضوعه لها ولأخواته ليس ضعفا في الشخصية بل هو بر كبير . وتبقى خصوصيتك معتبرة لكن ليس أنت من يقررها . فقد ترين أن لك حق ويصير مالك حق .

3- الشيء الجميل اللي أنت تسوينه فيهم تعدينه من أفضل المعاريف مثل مرضت أمه وزرتيها ، طيب( خير يا طير ) هذا واجب مع أنك ما قدرت العجوز وطلوعها مع الدرج وتاركة لك البيت الأرضي . وقيسي ع ذلك .
مثل هذولي ناس طيبين بس المشكلة فيك أنت وإلا فيه وحدة تصارخ ع زوجها وتمد يدها عليه حتى لو بالاشارة . وش تبيهم يقولون لما يشوفون مشكلة صغيرة والمرة تصارخ على سبب تافه .. تشرح صحيح مسلم .

4- بعدين أنت ليش اذا صار زوجك في مشاويره مع أهله تتصلين عليه يعني ما تجي طلباتك إلا إذا كان في خدمة أهله . ( المشكلة فيك أنت )
وطبيعي أذا لاحظوا هذا الشيء بيكون لهم ردة فعل .. فأنت تحملي ما جاك .

5- الرجل لا يحب المرأة المكابرة التي ترى أن التنازل لابد أن يكون منه .. خاصة إذا كان هي من أخطأت .

6- أنت اتصلي عليه وارجعي وليس غيرك من يمسك زمام المبادرة بلا كرامة بلا زفت ، وتذكري إذا جبت ولد من يبي يراجع فيه و و و و . المرأة مالها إلا زوجها بالعربي .


7- أما هو طبيعي ما يبي يرجعك .. فأولا توبي إلى الله واستغفريه كثيرا ثم أرسلي له مسجات حلوة تذكرينه بالايام الحلوة واعتذارات رومانسية في الاوقات اللي يكون فيها ما عنده شغل مثلا قبل وقت نومه حتى تضرب معه التفاكير وعاهديه بأن ما تتكرر وإذا تكررت قولي له سو اللي تبيه وأنا تحت أمرك .

الصراحة مرة بس حلوة

أقسم بالله اهله من أول ماخذين الدور الثاني والملحق كمان
يعني مو انا السبب لاتحط اللوم علي

ثانيا لو زوجتك ماترضى انك تروح تقول لاهلك كل شئ بينكم
وتروح تقول لاخوك عن أسرار غرفة النوم

طيب أخته قدام عيوني عشان تقهرني تقول لاخوها شوف مقطع وصخ في التلفزيون وش تسمي ذي الحركة

زواجي أقسم بلله في الغرفة أبكي وقت التصوير من حركاتهم وش تسميه مساكين وانا القوية

كلام الزوج ما عليك منه .. واصلي الرسايل بهدوء وانتبهي للغلط عليه فهو يعتبر نفسه مجروح ومقهور فهو يبي يرد القهر عليك ويبي اعتذارات متواصلة . خاصة إذا كان بينكم حب جارف .

__________________
قال ﷺ ( والذي نفس محمد بيده ما تواد اثنان ففُرق بينهما ؛ إلا بذنب يحدثه أحدهما ) .

يقول لا ترسلين لي شئ واقطعي رسائلك واتصالاتك

صحيح خطأ الكلام عن أسرار العلاقة ومشساهدة المعاصي لكن أنت ما معك دليل افشاء الاسرار وعلى افتراض أنها حصلت فليس الحل بتكبير المشكلة حتى الطلاق .
أنت بينك وبين أخته مناقر حريم .. فحتى لو شافت فيلم جنسي وتوري أخوها أنت وش دخلك ، فيه أمور يا أختي تبي حكمة مو صب قاز ع نار . وأخته مالها أي علاقة في الطلاق اللي صار بينكم .

الطلاق واضح سببه سوء تصرفاتك فأنت من يحاول الحسحسة والدحلسة بينه وبين أهله . فتبين تسيطرين سيطرة كاملة على الزوج وعلى مرأى من أهله . صعبة

المفترض تعينينه على خدمة أهله مو العكس

ولو تجربين تكسبين الاخت ذي وتصيرون أصدقاء وكل من تتوقعين مشاكله ( على افتراض وجوده ) .. تراها اخواته عمات عيالك ، ويمكن بكرة واحد من عيالها يخطب من بناتك أو العكس ، كبري عقلك وارجعي .

__________________
قال ﷺ ( والذي نفس محمد بيده ما تواد اثنان ففُرق بينهما ؛ إلا بذنب يحدثه أحدهما ) .

أقسم بالله ابغى الرجعه بأي طريقة لاكن كيف
كلمه عمي قال أبوها واخوها
كلمه خالي قال نفس الشئ أبوها واخوها ماحاولو يهدون
يعني هو مجروح من ابوي واخوي يقول أبوك حسسني اني داشر من رسائلة
وأبوي زعلان منه يقول كل ماقال شئ قال كلم اخوي ليه مين زوجت هو ولا اخوه
وأبوي زعلان لأنه حطني وقال بروح الصيدلية يقول ابوي ليه ماوجهني زي الرجال