السلام عليكم
الأخوة والأخوات في عالم الأسرة والمجتمع ، قبل أبدأ اسرد مشكلتي اللي لها سنين مانحلت أخيراً قررنا انا وزوجي نطرح الموضوع هنا ، بنتابع ارائكم واخترنا منتداكم لأن الأعضاء غير فيه واكرر غير عن باقي منتديات النت أحسهم على علم وثقافه وخبرة واكثرا تفهماً وحلولهم ايجابية ،
للتذكير زوجي وانا نعاني من هالمشكله لها سنين واليوم قلنا اذا المؤيدين بالموضوع كانوا بصالحي واصواتهم وقفت معي بينفذ شرطي واذا الحلول مؤيدة له بنفذ انا شرطة اللي هو ارجع لبيتي
المهم ..
احنا متزوجين لنا 5 سنوات وماعندنا اطفال صارلي شهر ببيت اهلي من هاذي المشكله اللي هي "" الشقة "" ياعالم أنا بتكلم عن نفسي قبل الزواج عشان احطكم بالصورة والله مو مفخرة ولاتكبر ولا شيء حتى زوجي عمري ماشفت نفسي عليه ولاتكبرت
انا كنت ساكنه بقصر مو فيلا والحمد لله ، الله مكرمني واكبر نعم ربي انه رزقني بزوجي هذا اللي احبه ويحبني واعدة اخوي وابوي وصديقي المهم لما تزوجت لحد الان سكني هو فوق اهله بشقه ولي مدخل خاص اللي هو سيب للحوش مشترك مع مستاجر السطح ، من اول شهور وانا عروس احاول فيه نغير شقه وهو مو راضي ضحيت وصبرت بنكمل 5 سنين وكل شوي يوعدني اننا بنغيرها ويماطل ويكذب علي يقول 5 شهور ونطلع او الشهر الفلاني بنطلع او يافلانه بيت بطلعك بعد كذا شهر ولا نطلع قبل سنه رحت بيت اهلي وجلست شهرين ووعدني شهر كذا بنطلع ولا طلعنا والحين انا ببيت اهلي خلاص ماعاد اتحملها .. تبون تعرفون وش فيها الشقة بقولكم:
- الحوش وسخ تراب على حشرات لو اغسل عبايتي امشي يقلب عبايتي من تحت خيشه واروح لاهلي يرمونها بابعد درج من الوساخه والتراب مع اني نبهته لكن الشكوى لله ولا يمكن انظفه انا لان فيه مستاجر وهم اجانب وغير اغراض الغسيل لازم اشتراك من البيت حق اهله اللي مقاطعين بعض من الاساس ، مرة بمشي طالعه لشقتي لقيت قطوة وانا عندي فوبيا من الحيوانات قسم ركضت لباب الشارع لما رجعت السيارة ورجع هو طلعها لان الجيران دايم بابهم مفتوح والبيت مش ولابد وغير التراب الحوش له سنه ماتغسل مظلم ولما شفت القطوة عند باب الشقه صاعدة قعدت ابكي بالسيارة اللي رجعت لها من قلب ع السكن وعاللي يصير لي!
- طيب نخلي الحوش دخلنا الشقه كأبه مابعدها كأبه تعتيق صحراوي اصفر قوي ومعتق البيت من الاساس قديم كيف عاد الشقه اثاث قديم موكيت جلسات ارضيه مساند والغرفه ع شكل مستطيل اتعب بالتنظيف مافي افياش الا بتوصيلات 2-3 عشان اوصل ، ياعالم البيت قديم مغبس مهمها نظفت وبخرت مايبين شي والجدران من فوق لازقه التربان فيه لانه كان مستعمل وماجرينه قبلي الابواب مكسرة او يالله تسكر رايحه فيها وماعندي دورة مياة خاصه وصالحه لان مغسلتي والسخانات والمويه السباكة تعبانه من الغبار والسدد متهالكة اروح لمغاسل الرجال عشان افرش ولا احط كريماتي او استحم مشوار جدااا ، ماحس اني متزوجة ماحس الشقه تخليني استمتع بحياتي واتشيك واسنع بيتي .
- جبت لي غساله صحون تساعدني ماعندي شغاله مافي تصريف صارت تكب الرز وبعض فتات الطعام العالق بالصحون على الارض وهو يشوف بنفسه، المطبخ صار ازمة ماتحمس لدخوله ابداا .
- المجلى بالمطبخ قديم جدا ومصدي لو احلف كله جراثيم من انا عروس وامي الله يطول بعمرها حطت اغراضي قالت ع الاقل نبعي زوجك يغير لك المجلى و حمامك .
- نجي لاكبر سبب وهو يعرف حالتي النفسيه اللي مريت فيها من اول شهر وانا عروس ماذقت النوم في الغرفه تجيني كوابيس واشباح تصورو اول حلم لي واول صورة بالحلم لشكل لزوجي على شكل شبح وجاثوم يدور بوجهي صحاني مفزوعه من النوم ، اذا زوجي راح الدوام لايمكن اغمض عيني من اللي اشوفه لو اغفي من التعب الغرفه كلها صجة ولجة وقرقعه كان عندي اطفال يحوسون والله حتى زوجي كانه جاي من الدوام اسمع صوت مسبحته احس السرير يكون فيه احد والله احيان يجي احد جنبي او وراي ، بس اقوم واتلفت مفزوعه والنوم هالكني كنت اروح لبيت اهلي اطيح عليهم انام نوم اسبوع كامل !!!! وهو يشوف حالتي ومايحس ولاكلف يغير وضعنا يقول توسوسين كيف اوسوس اذا هو زوجي بنفسه اخاف منه لانه اذا نام بالليل يبدا يتحرك ويفتح الشبابيك ويسكرها ويرجع يفتح ومرات يشغل ولا يطفي المكيف كانه بزر يلعب وباخر الليل ويمشي بالغرفه ويتكلم واشياء مابي اقولها .
واذا بتقولون شيخ مرتين قالولنا غيروا البيت ووواحد منهم شيخ معروووف قالي يابنتي دامك بهالشقه حتى امورك وامور الاطفال والحمل مو صالحه ولاشايفته دامك بالشقه لازم تطلعين لان احنا متاخرين عن الانجاب ، وابذكرلكم موقف واحد صارلي برمضان مو هذا اللي قبله تسحرنا وخلصنا ونام زوجي وانا انتظر صلاه الفجر ومتوضيه واعرف ان زوجي مهمل بقرائة الاذكار حطيت يدي عليه وقمت اقراء بالنيه عني وعنه الا غفيت مادري شلون وحلمت بواحد يكلمني والله ماكان حلم بالضبط احسها رساله كانه واحد يكلمني كانه بسم الله من سكان الارض وكاني بنفق اسود وصوت بس قالي: تقرين الاذكار ماتقرين انا عايش بينكم!! قمت مفزوعة ويوم صحى وعلمته ع الفطور وبكيت عنده يااخي ارحمني انا خوافه حتى من ظلي ومع ذالك صبرت وكافحت وجلست فيها سنين لاجي احد ولاجيني احد دورك حس فيني .. هو ولاعباله لانه باليوم كله نصه دوام يرجع الساعه 3 يجلس ساعه ساعتين يروح للمكتب وبعدين استراحه مايجي الا الليل يتعشى ويروح للغرفه وينام وانا مقابله هالشقه الكئيبه والاشباح لحالي !!! وحتى لو تشيكت عدل ولبست نفس قمصان المتزوجات مايجي الليل وانا نايمة الا احس بشي مثل الجاثوم اللي يلعب بجسمي وانا مثل المشلوله لانه جاثوم كرهت نفسي ولبسي ماعاد اتحمس حتى للاسواق غيرت غرفه النوم للغرفه للثانيه استنفذت تضحياتي وصبري معه والوضع ماتغير والاشباح حولنا متاكده ان الشقه مسكونه بدليل هالاعراض ماحسها ببيت اهلي ابدا ولاعرفتها الا بعد الزواج .
- على فكرة احس التوحد جاني لان اهلي مايجوني ولااحد يزورني وانا استحي بالقوة اضيف فيها لانها من الاساس فعلا خرابه ومن تزوجت واهلي ماجوني الا مره فقط ولاالومهم يبوني اغيرها لانها بصراحه شقق عمال المدخل خاصه من الحوش مريع جداً كفايه اختي المتزوجة تتمنى تسير علي وامي واخواتي كذالك امنيتي يكون عندي شقه مثل الناس اقل شي سيراميك اقل شي فيها كرسي لو واحد هنا ماحصلته ودي طاوله طعام ودي بكنبه اتابع فيها فيلم ودي التيفي قريب مني مو كل شي بركن ودي اشوف ابجورة وحدة ودي اشغل شمعه وحدة ببيت صاحي ويفتح النفس ودي حالي مثل المتزوجات اسوي قهوتي صديقاتي يجوني اهلي زوجه اخوي وربي ان الشقه تفشل لابعد حد اختي تجي من السفر ماقدر اضيفها ببيتي انا احب الذوق والمودرن احب الاجواء الراقيه والسموع والفوخات والبيت يلق ع سنع احب اعيش الحياه ع اصولها ، الناس تشتري تحفه ولا شي يخص البيت انا لا مقدر كرهت حتى نفسي فيها !!
- لو يجي مطر رعد برق ربيع مادري عنه اي شي الا من تويتر والواتس من صديقاتي الشقه مقدر اطلع برا و الشبابيك نظام مادري كيف وانا ماشوف شي من الشقة !!!!
- زوجي موظف مثل اي موظف سعودي راتبه زين لكن جزء منه يروح منه قسط للبنك يعني الصافي 4800 ريال طيب الشعب كله كذا وعايشين بشقق وهو يشوف وضعه مايسمح له وانا شفت بنات جايات من قرى متزوجين هنا وازواجهم حاطين شقق محترمة ع الاقل صالحه للسكن ورواتبهم اقل من زوجي وعندهم اطفال والتزامات لكن انا وضعي حوسه وحتى مو حاسة اني احب بيتي ومتونس فيه الا عله وهم اسود على قلبي احد يخاف من بيته ؟؟؟؟؟ انا قلت بساعدك الاجارات راح ادفعها لك والشقه باثثها التمويل علي ياخي ماااقصرت لاتقولون زوجك مايبي مساعده من احد ، زوجي كثير اسلفه بطلب منه وياخذ مني لكن يوم جاء البيت لانه مو ناوي الطلعه صار مايبي ياخذ مني ! ويبي يجلس بالشقه بعذر بيت اهلي انا بنت ومستعده افارق اهلي لان هذا الزواج حياه واستقلال فكيف هو الرجل ؟! المشكله انا واهله من اول شهور الزواج مشاكل وقطعنا بعض لااجيهم ولايجوني وهم من الاساس مايبوني ويعلم الله اني مااخطيت عليهم بشيء وبشهاده زوجي وكاني يقولي بنفسة خلاص لاتنزلين ولاتجينهم ، المهم المشكله مو هنا المشكله زوجي مارحمني ولارحم ضعفي بهالطلب انا اول مره اشوف شخص يقول احبك ويشوف الطرف الاخر متضرر لابعد حد ومايفكر يراعيني انا صبرت وكافحت وضحيت الى متى ..؟! يبي نقعد الشقه الى مانطلع بيت بدون اطفال مانبيه طيب انت قلت سنه وسنتين وبنطلع للبيت خلاص اوك نروح للشقة وتصرف بعدها باللي تبيه لان انا منهارة وماعاد اقدر اعطي فرصه وعود اخرى !! وماقدر اشيل نفسي وارجع لها.
مو من العدل مرميه بشقه مثل القبر اسمع الناس تحت وحولي وانا ووحيده الى متى العمر يمشي !!! انا ماكلف زوجي من باب الفسقة انا فعلا متضررة جدا وماكذبت بولا حرف او بالغت وزوحي ادري بوضعي وشايف كل شيء .
....... نهاية المشكلة احنا ننتظر الحكم لكم ادري ان ممكن المشكلة تافهه لكنها كبيرة عندنا ومحتاجين وقفتكم معنا
ارجوكم واترجاكم كل شخص قرأ المشكله أنه يعتبر زوجي اخ له وانا اخت له ويساعدنا بقراره لان انا وزوجي اتفقنا الحل يكون بعدد المؤيدين اذا الردود بصالحي بيحط لي شقه واذا بصالحه بيرجعني لشقه الاشباح .
وارجع اذكركم انا ماطلبت سفر ولاطقم ذهب ولاشغالة ولا مصروف ولااكلف عليه بشغلات الحريم ولا طلعت وسعسعت بالشوارع والاسواق وسويت دوريات مثل الحريم انا فقط ابي سكن مثل الاوادم لانه يروح طول اليوم ويتركني في بيت مخيف وموحش وبشع ومعدوم وخراباته واجد جد تخيلوا كنت ساكنه بقصر وصرت اسكن بذي اكيد عذاب نفسي حقي بيتي ارتاح فيه من حقي اهلي يجوني من حقي اعزم صديقاتي فيه مابي فيلا ولا دور فقط شقة لو صغيره لكن كويسه ، لان حتى التعديل فيها ماينفع . لانها بتكون مكلفه ونفسيتي ماتتحملها من الاساس .
وننتظركم انا وزوجي انا ببيت اهلي اقراء الموضوع وهو مادري وبن ارضه بيقراه وبعدها بنقرر وتاكدوا بجي اعقب على الموضوع بشكل جديد لقرارنا واتفاقنا
:: وترا ان وجدت كلمات قاسيه ترا زوجي قراء مسودة الموضوع قبل نشرة وهو عارف اني عايفه الشقه واعطاني الاوكي
يالله ننتظركم ..... ::
تم تعديل العنوان ليتناسب مع المضمون
مستجدات رد 26
16-02-2015, 11:43 PM
ضوابط المشاركة
العرض العادي
