بسم الله الرحمن الرحيم

من الصباح وابتسامتي لا تفارقني
مادري ليش هاجمتني ذكريات الطفولة
كنت مشاكسه وجريئه جداَ
سكنا في منطقه جميله
اغلب اهلها عندهم مزارع صغيره في بيوتهم
وكان ولد جيراننا معه دجاج وديك
وع ست الصبح اقوم ع صوت الديك حقهم
اذكر اسمه طارق مواطن وامه اسيويه
يتيم الاب كان عاقل وانطوائي ومسالم
الان هو مهندس طيران "الله يوفقه"
اذكر مره قمت متاخره على ساعه سبع او ثمان
واستغربت ويوم الثاني نفس الشي
فيما بعد عرفت ان طارق باع الديك ههه
اللي كان يصحينا
اذكر كان معي 4 لعبات "دمى"
صبي و3 بنات
الولد اسمه "غانم"
البنات الاولى "تقوى"
الثانييه "سلوى"
والاخيرة "دنيا"

كانت دنيا تكسر خاطري
لانها الوحيده اسفنجيه
والباقيات بين بلستيك وجلد ههههههه
اما غانم حاولت كثير ابحث
له عن اخ لان نادرا يوفرو لعبات ع شكل اولاد

كانو احلا شي في حياتي عيالي اقوم صباح
اول حاجه ادور عليها اللعابي وامسكهم معي حتى
انام المغرب (او بمعنى اخر ادووخ من اللعب)
دايما اهل البيت وقت المغرب يدوروني
اكوون نايمه في غرفه مخصصه لاغراض
زايده ومنها خذيت زاويه لي وللعاب
وعشاني انام المغرب اقوم الصباح مع اللي يروحو
مدارس كانو يتورطو فيني لاني اترجاهم اروح معهم
يقولو انه المعلمين ما يسمحو وبيضربوك بالعصا
فكنت اقتنع لكن عنادا لهم وعشان امشي كلامي
اقول زين خذو اللعابي معاكم (غانم,تقوى,سلوى, دنيا)
مدري ليش كنت اشوفهم بشرر مثلنا وكنت احس انهم يرتاحو
وانهم يريدو يشوفو مدرسه ههههههههههه
اختي الكبيرة لطيفه جدا معي كانت تسايرني واخذتهم معاها
في الشنطه عشان لا ابكي واسوي لهم ربشه
خذوهم وفرحت كثير انهم راحو معهم بس جنيت ع نفسي
ماعد صبرت عنهم انغلب الموضوع عليا
ياربي متى البنات يجو ويرجعو لي اللعابي
اسال امي تقول ساعه 12
زين كيف اصبر ؟؟؟ والله انتظر واذا ساعه
مرت اقول الحمدالله قربو يجو
واخر شي وصلو العيال بالسلامه
وكان درس لي اني ماعد ارسلهم مع احد
هذا كله قبل الدراسه بعدها سجلت للمدرسه
ايش السواات ما اصبر عن العيال
خصصت لهم قسم بالشنطه قسم للكتب
والثاني لهم مالي دخل اهم شي يروحو معي
كان اذا فيه وقت فاضي بين حصه واللي بعدها
افتح الشنطه واطالعهم واسولف معهم
ما اطلع الفسحه مع احد الكل
يسالني ارفض لاني مشغوله
جدا بالي معي كان ولد جارتنا اسمه حسين
هو بعد نفس الشي ياخذ اللعابه معه ويحطهم في
درج الطاوله ويلعب بدون صوت والاستاذ يشرح
وكل عيال الحاره يطقطقو عليه عشان
كذا كنت منتبهه جدا ماحد يعرف اني اخذ اللعابي معي
لان لو عيسى "ولد جيرانا واقرب صديق واكبر عدو لي علاقتنا غريبه "
درى والله رح يفضحني قدام اللعالم شرير ومستفز جدا جدا جدا
مع ذلك ما استغنى عنه لان اهله طيبين وبيتهم مجاوره لنا
المهم يوم من ايام اصرو البنات اني اطلع معهم ورفضت
طلعو وبقت وحده اريد اطلع اللعابي وماريده تقول شي ولا
تخبر احد قلت اعمل هدنه واوريها اللعابي بس لا تخبر احد
والله يهديها تحمست وركضت طيارااان خبرت كل البنات
وكلهن جين احد تمسخر واحد لعب معي بس يومها
ما ارتحت لاني اخاف عليهم كثير قررت اني ما اجيبهم
عشان ما احد ياذيهم كنت اتخيل انهم يتاذو من ايدينهن (خيالات رسوم متحركه)
المهم بعدها قررنا ننتقل لبيتنا لان كنا قبل مستاجرين
ولما بننقل الكل اخذ اغراضه الا انا خذيت عيالي وملابسهم
وكراتين معي وانتقلت لمدرسه اخرى ودخلت مره جديدة
صف ثاني ابتدائي واهملت لاني ما اتقلمت مع حياة جديدة
بيت جديد مدرسه جديدة زملاء ومعلمين جدد
لاني مشغوله بالعيال جبت مركز العاشر
وعائلتنا وقتها اخواتي البنات من الاوائل
وانا في صف اول كنت الاولى ع الصف
يعني من الاولى للعاشرة كارثه بالنسبه للاهل
واتهموني بالاهمال بسبب اللعابي وقررو يحطو لي حد
ويتخلصو من اللعابي
واقنعوني واقتنعت غصب عني والله قلبي كان ينفطر
ولانهم كثير قالو حرام يرموهن عطوهن بنت اسمها دانه
دانه لما خذتهم فرحت كثير وفرحت لها لاني مقتنعه
ودعست ع قلبعابيي
تعرفو وين القهر ؟؟؟





القهر ان دانه اللي الناس تبرعو لها بالعابي عشان اذاكر
صارت طبيبه وتزوجت طبيب ( الله يهنيها ويرحم اللعابي
اشك ان لهم فضل بعد الله )

دانه درست طب وتزوجت طبيب
وحسين تخرج محامي وهو شاعر معروف
عيسى درس معانا هندسه وماعرف وين وصل ..اول سنه دراسيه تقابلنا
ماعرفته بس هو عرفني من العيااارة
بس انا بالصدفه عرفت اسمه من القائمه اسامي الطلاب
اما طارق عوضه الله بمستقبل افضل ودرس في افضل
جامعه في البلد وهو حاليا مهندس طيران


حدثونا عن طفولتكم ,اكتبو ولو جزء بسيييط

__________________
اللهم اغفر لي ولوالدي واخواني واخواتي الاحياء منهم والاموات .. اللهم نسألك حسن خاتمه يارب .. لاتنسوني من دعواتكم