وحشتونى . كنت فى مصر فى اجازة اللة وحدة يعلم عدت علية ازاى . المهم انى ماعنديش هناك كمبيوتر علشان كدة اتقطعت عنكم الكام شهر اللى فاتوا مع انى كنت فى اشد الحاجة ليكم كاصدقاء . مش عافة انتم فاكرين مشاركتى ليكم فى مشكلتى وهى ان لزوجى زميلة فى العمل تعدت حدود الزمالة وكانت تصرفاتها معاة غير مريحة خالص بالنسبة لى .احنا ماعندناش اولاد والمشكلة عندنا احنا الاتنين يعنى مش قلقة انة ممكن يكون بيدور على الاطفال . هى اكبر منى ب 7 سنين ومطلقة لاكتر من 6 مرات من 3 رجال وتصرفاتها ليست فوق مستوى الشبهات وهو يعرف كل حاجة عنها وعارف انها (......) ومع ذلك لم يحاول ان يقطع علاقتة بها بدعوى اننا فى غربة وانها لوحدها وانة بيتعامل معاها على اساس انها اختة مش اكتر . والكل نصحنى انى اصاحبها واكون على اتصال بيها علشان اعرف كل تحركاتها. المهم انا نزلت اجازة لوحدى وكانت معايا على نفس الطيارة وزوجى تاخر فى النزول لظروف طارئة لاكتر من شهر . المهم اجازتها هى خلصت ورجعت للشغل وكانوا هما الاتنين هناك لوحدهم وانا فى مصر لوحدى .وفى يوم مش عارفة اية اللى خلانى افتح اليميل بتاعة (كان قال لى على كلمة السر بتاعتة مرة فى وسط الكلام) المهم اتصدمت لما قريت ايميل كانت بعتتة لة من مصر بعد رجوعها لمصر وهو كان لسة فى شغلة .الايميل كان بدايتة كلمة( حبيبى ) والباقى كلة كلام عن انها مش قادرة على غيابة وبتعد الايام علشان ترجع للبلد اللى بيشتغلوا فيها علشان تكون معاه وجانبة .طبعا مش هاقدر اوصف لكم عن الالم والعذاب اللى حسيت بية والهانة كمان انى كنت بادخلها بيتى وبتاكل من اكلى عيش وملح وتكون دى النتيجة .ماحسيتش بنفسى الا وانا باطلبها فى البلد اللى بتشتغل فيه (وهو كان لسة هناك) وقلت لها كلام مش ممكن كنت اتخيل انى ممكن اقولة وهى كانت بتسمع ولم تعلق على اى كلمة .طلبنى زوجى فى نفس اليوم واعتقد انة ماكنش لسة عرف باللى حصل المهم مسكت نفسى جامد انى اقول لة حاجة .تانى يوم اتصلت هى بيه وحاولت تدافع عن نفسها انها بتتعامل معاه على انه اخوها وطبعا انا لم اقتنع باى كلمة قالتها وكل اللى رديت بية عليها انى مش عايزة اعرفها بعد الآن وطلبت منها تبعد عنى وعن زوجى والا هافضحها قدام كل اللى يعرفوها مش بس بموضوع الايميل ولكن باسرار كتير اعرفها عنها تدخلها السجن (مش كلام فى الهواء انا فعلا اعرف حاجات تسجنها)بعدها حسيت ان زوجى متغير معايا فى التليفون زى ما يكون منتظر منى انفجر فى وجهه ولكنى لم افعل وانتظرت لحد ما رجع ولجأت لاختة الكبيرة اللى فى مقام والدتة وحكيت لها عن كل حاجة حصلت خلال السبع سنوات عمر علاقتنا معاها ولم يعجبها ما سمعت ووعدتنى بالتدخل وقد كان تكلمت معة المهم لن اطيل عليكم الخلاصة انة دافع عن نفسة وكل كلامة انة بيحبنى وانها هى اللى فهمت زوقة معاها انة ممكن يكون اهتمام خاص بيها وانة عارف عنها كل حاجة واللى يعرفة عنها لايمكن يخلية على علاقة من اى نوع بيها ولكن هى اللى فارضة نفسها علية وانة لما قرا الايميل ضحك لانة تخيلها مراهقة باعتاه للبوى فريند بتاعها وانة بعد ماعرف انى تالمت قد اية بعد ماقريت الايميل انة هيقطع كل علاقة بيها خارج نطاق العمل كزمايل . ولما رجع البيت ولوحدة طلب منى انى انسى الست دى خالص واقطع كل علاقة لى بيها لانه خايف على سمعتى وسمعتة منها . انا عارفة انة بيحبنى وبيعشق التراب اللى بامشى علية لكن مشكلتة انة بيحب دايما انة يكون فى بؤرة الاهتمام (برج الاسد) وعلاقتها بية بترضى غرورة دى حاجة انا متاكدة منها . تفتكروا اتصرف معاه ومعاها ازاى الفترة اللى باقيه لنا هنا فى الغربة لغاية ما ننزل بلدنا وكل واحد منهم يروح لحالة وهى فترة لن تقل عن سنتين . منتظرة اعرف رايكم فى اللى حصل ومشورتكم فى اللى جاى.