هذي الحقيقه
راح احكي لكم الحقيقه المؤلمه. تربيت انا واخواني في بيئه كلها عنف. من اول ما وعيت على الدنيا وانا اشوف امي وابوي يتخانقون ويا ريت لو بالكلام! عنف وظرب وشتم . اشياء للاسف ما كنا المفروظ نشوفها. حتى الاحترام ما اعتقد انه كان موجود. والله يشهد اني في حياتي كلها ما شفت امي وابوي جاسين مع بعض . كل اللي عشناه كان صراخ وانتقاد. كنا نصحى من النوم على صريخهم واللي يتطور بعدين لاشياء ثانيه. امي انسانه عندها قلق ابدا ما طبيعي . وتشك في كل حاجه. الوالد توفى والله يرحمه والوالده الله يطول في عمرها.
وين المشكله. المشكله اني حاسه بتاثير هذيك الحياه علي. احاول بس شي انزرع في داخلي. احاول اني ما عامل زوجي مثل ما امي كانت تعامل ابوي بس للاسف ما اقدر. للاسف امي ما كانت تحترم ابوي ولا هو بعد والحين انا احس اني نسخه من امي مع اني انسانه متعلمه بس ابدا ما قدر اتحكم في اعصابي . من اقل حاجه اثور واتخانق وما عندي المقدره على تحمل الانتقاد.
احس بعدم استقرار مع زوجي لدرجة اني ابدا ما اثق فيه. احبه وما احبه.
زوجي متلهف يكون عنده اولاد وانا اتحجج بظروف واهيه منها اني اريد اكمل الدكتوراه. كل هذا عشان ما اجيب اولاد يشوفوا اللي شفته.
نفسي والله اكون ام بس مخاوفي والماضي ما تركوا لي مجال. اريد بس اعرف اذا في حل لمشكلتي. اريد احب زوجي واريد احترمه واريد اثق فيه بس كيف ؟ ارجوكم قولوا لي شي.
05-10-2004, 10:41 AM
ضوابط المشاركة
العرض الشجري